جاڭا وقۋ جىلىنىڭ باستالۋىنا ەكى اپتاعا جۋىق ۋاقىت بار. كوپشىلىك ۇيدەگى وقۋشىلارىنىڭ وقۋ-قۇرالدارىن، كيىم-كەشەكتەرىن تۇگەندەپ بولسا، جازعى دەمالىس پەن جۇمىستان قولى تيمەگەندەر اراسىندا ءالى دە قامدانباعاندار بار ەكەن. ءبىر بالانى مەكتەپكە دايىنداۋعا ورتا ەسەپپەن قانشا قاراجات شىعادى؟
بۇگىن وسى تاقىرىپتى سارالاپ كوردىك:
الىسقا بارماي، ۇيدە دە وقۋشىلار ءوسىرىپ وتىرعاننان كەيىن، سول ءوزىم قاتارلى اتا-انالار چاتىنا «مەكتەپكە دايىندىق قالاي؟ قانشا اقشا جۇمساپ جاتىرسىزدار؟ ءبىر بالاعا ورتا ەسەپپەن قانشا اقشا جۇمسادىڭىزدار؟» دەپ ساۋال تاستادىم. جاۋاپتار سان ءتۇرلى.
- بىلتىر 3 بالاعا 300 مىڭداي كەتتى، بيىل ءالى بارمادىق.
- گلاسماننان ەكى كوفتا، ءبىر يۋبكا (بەلدەمشە) 27000 بولدى.
- شالبار مەن كوستيۋم عانا 26000 بولدى.
- 35000 تگ. 7سىنىپقا كوستيۋم-شالبار عانا باراحولكادان الىندى.
- وسى جولى قىمبات، بىلتىر ونداي بولماعان.
- مەن كەشە باردىم باراحولكاعا، وڭكەي قىتايدىڭ كيىمدەرى ساپاسىز. كيىم كوپ، بايكاپ كاراماساڭىزدار، قىتايدىكىن تۇركيا دەپ ساتىپ جىبەرەدى ەكەن.
- تۇركيادا شىعارىلعان كيىمدەردى ارەڭ تاپتىق، كوك بازارعا قاراعاندا ارزان كىشكەنە بولسا دا
- تەك كوستيۋم مەن سپورتيۆكاسىنا 50 مىڭ كەتتى، ءالى اياق كيىمدەرىن المادىق.
- اق جەيدە 11500، تۋفلي 26500-گە الدىق، ريۋكزاك 17000، كروسسوۆكي 15500. ءالى الىنباعان زاتتار بار. شەتىنەن الىپ جاتىرمىز.
پىكىرلەر دە، باعالار دا ءار ءتۇرلى. دەگەنمەن، جىل وتكەن سايىن بالانى مەكتەپكە دايىنداۋدا تاجىريبەلى بولىپ العان انالار دا كەزدەسەدى ەكەن:
"مەن بالالارىمدى بۇرىن قىمبات كيىندىرەتىن ەدىم. وسى جولى كوزىم جەتكەنى، بالاعا قىمبات زاتتار الۋدىڭ قاجەتى جوق ەكەن. ويتكەنى بالا جىلدا ءوسىپ كەتەدى، وقۋ جىلى بىتپەي جاتىپ، كيىمدەرى وزدەرىنە شاق بولماي قالادى ەكەن. سول ءۇشىن وسى جىلى كانس توۆارلاردىڭ بارلىعىن المادىم، ەڭ باستا كەرەكتەرىن عانا الدىم قالعاندارىن سۇراپ جاتسا الىپ بەرەمىن دەدىم. وسى جولى ءۇش بالامنىڭ كيىمىنە اياق كيىمىنە بارلىعى 40 مىڭ جۇمسادىم. اياق كيىمدەر جەڭىلدىكپەن ساتىلىپ جاتىر ەكەن، ءدال ءتۇستىم. وسى جولى سومكە دا الىپ بەرمەدىم، ويتكەنى سۋمكالارى بار. تازا، جىرتىلماعان. بالاعا قىمبات نارسە الۋدىڭ قاجەتى جوق ەكەن، سونى ءتۇسىندىم. ويتكەنى جىل سايىن الۋ كەرەك، جىل سايىن بالا ءوسىپ كەتەدى. بۇل اقشانى ۇنەمدەۋ ەمەس، ماعان ءتيىمدىسى وسى بولىپ تۇر"، - دەيدى ءۇش وقۋشىنى ءتيىمدى باعادا مەكتەپكە ازىرلەگەن انا.
قارجىنى ءقايتىپ جەتكىزەمىن دەگەن اتا-انالارعا پايدالى-اق كەڭەس.
الماتىدا نە كوپ!؟ بازار مەن ساۋدا ورىندارى كوپ. سولاي بولا تۇرا، قالتاسىنىڭ تۇبىنە قاراعان قاراشا قازاق وتباسىلارى باراحولكا جاعالايتىنى انىق. ەندەشە، سول باراحولكانىڭ باعاسىنا قاراپ مەكتەپكە دايىندىق باعاسىن باعامداي بەرەيىك. ەسكەرتۋ: ءبىز بۇل جەردە ورتاشا باعانى كورسەتۋگە تىرىستىق:
كوستيۋم-شالبار (قىزداردا سارافان نەمەسە كوستيۋم-يۋبكا) – 18-25 مىڭ، (10-15 مىڭعا دا تابۋعا بولادى، ءبىراق ساپاسى باعاسىنا ساي)
سپورت كيىمى – 15-20 مىڭ (11-13 مىڭ تەڭگەگە دە تابۋعا بولادى، ءبىراق تاعى دا ساپاسىنا قاراۋ كەرەك)
كروسسوۆكا – كيۋگە بولادى دەپ اقشانى بارىنشا قىسىپ العاننىڭ وزىندە قالىپتى باعالارى 25 مىڭنان باستالادى
تۋفلي - 15-20 مىڭ (ەڭ ارزاندارىن 5-6 مىڭعا تابۋعا بولادى)
اق جەيدە – ارزانى 5 مىڭنان باستالادى، جاقسى دەگەندەرى 15 مىڭنان ارى كەتە بەرەدى
كيىمدى تۇگەندەپ بولساق، وقۋ قۇرالدارىن دا ۇمىتپايىق.
سومكە – 10-15 مىڭنىڭ ماڭىندا (ارزان دەگەندەرى 5-6 مىڭنان باستالادى)
داپتەر، قالام-قارىنداش، سۋرەت داپتەرى، كىتاپ-داپتەردىڭ تىسى، سىزعىش، جەلىم، ت.ب. تىزىمدەگى تاۋسىلمايتىن «كەڭسە قۇرالدارى» دەپ اتالاتىن زاتتارعا دا از دەگەندە 25-30 مىڭ جۇمسالادى. ءبىر بالاعا. ەندى ار جاعىن ءار بالاعا قوسىپ، كوبەيتە بەرسەڭىز بولادى.
ءبىز ءوزىمىز بارىپ، كوزبەن كورگەندەگى باعالاردى ۇسىنىپ وتىرمىز. ساتۋشىلار ايتپاقشى، «اسپاننان العان باعا» ەمەس.
بۇل – ءوزىمىز ۇيرەنگەن «باراحولكانىڭ» باعالارى. باسقالارىنىڭ باعالارى ايتپاسا دا تۇسىنىكتى بولار. ءبىر بالانى مەكتەپكە دايىنداۋعا ءجۇز مىڭ ەشتەڭە ەمەس بوپ قالادى. ءۇمىت ەتىپ وتىرعان كوزدەرىنىڭ نۇرى – بالالارىن اتا-انالارىن قاتارىنان قالدىرماۋعا تىرىساتىنى انىق. وقىرمان قاۋىمعا وي سالىپ، بالا وقىتىپ، ونى ءوسىرۋ وڭاي شارۋا ەمەس ەكەنىن ەسكە سالىپ قويعىمىز كەلدى. باستىسى – ءبىلىم مەن تاربيە باسقا قونسا بولعانى.