الماتى قالاسىنىڭ سىبايلاس جەمقورلىققا قارسى قىزمەتى جولداردى سالۋ جانە جوندەۋ جۇمىستارىنداعى جەمقورلىق تاۋەكەلدەرگە تالداۋ جۇرگىزۋ ءۇشىن ارنايى جيىن وتكىزدى. ءىس-شاراعا مەملەكەتتىك ورگاندار، جول اكتيۆتەرى ساپاسىنىڭ ۇلتتىق ورتالىعى الماتى فيليالىنىڭ وكىلدەرى، تاپسىرىس بەرۋشىلەر مەن مەردىگەرلەر كومپانيالار قاتىستى، دەپ حابارلايدى aqshamnews.kz.
الماتىنىڭ جول ينفراقۇرىلىمى ازاماتتار تاراپىنان دا، بۇقارالىق اقپارات قۇرالدارى تاراپىنان دا ءجيى سىنعا ۇشىرايدى. وسىعان بايلانىستى سىبايلاس جەمقورلىققا قارسى مەكەمە جولداردى سالۋ مەن جوندەۋگە بيۋدجەت قاراجاتىن جوسپارلاۋ جانە جۇمساۋ پروسەستەرىن ەگجەي-تەگجەيلى تالداۋعا ەرەكشە نازار اۋدارۋدا. الماتى قالالىق سىبايلاس جەمقورلىققا قارسى قىزمەتىنىڭ باسشىسى مەملەكەتتىك ورگاندار بىرلەسىپ جۇمىس ىستەۋ كەرەگىن اتاپ ءوتتى.
«الماتى قالاسىندا جول سالۋ مەن جول جوندەۋ سالسىنداعى قازىرگى ماسەلەلەردى شەشۋ ءۇشىن بارلىق مۇددەلى تاراپتاردىڭ كۇش-جىگەرىن بىرىكتىرۋ قاجەت. ويتكەنى ساپالى جول قۇرىلىسى تۇراقتى ەكونوميكالىق ءوسۋ، ينۆەستيسيالىق تارتىمدىلىقتى ارتتىرۋ جانە ازاماتتاردىڭ ءومىر ءسۇرۋ ساپاسىن جاقسارتۋ ءۇشىن وتە ماڭىزدى»، - دەدى ارمان راحيموۆ.
2020-2024 جىلدار كەزەڭىندە الماتى قالاسىنىڭ جولدارىن جوندەۋگە شامامەن 242،4 ملرد. تەڭگە ءبولىندى. بولىنەتىن قاراجاتتىڭ كولەمى قوماقتى. الايدا وسى سالاداعى كەمشىلىكتەر مەن سىبايلاس جەمقورلىق تاۋەكەلدەرى انىقتالدى:
- ءتيىمسىز جوسپارلاۋ (ىسكە اسىرىلماعان جوبالىق سمەتالىق قۇجاتتار، جىلۋ-سۋمەن جابدىقتاۋ جەلىلەرىن جوندەۋدەن كەيىن جول توسەمىن قايتا قالپىنا كەلتىرمەۋ)؛
- مەملەكەتتىك ساتىپ الۋ تۋرالى شارتتاردىڭ مەرزىمدەرىن ۇزارتۋ كەزىندەگى ولقىلىقتار؛
- ءبىر كوشەدە جوندەۋ جۇمىستارىن ەكى رەت ورىنداۋ فاكتىسى؛
- شەكارالار مەن ىرگەلەس اۋماققا قويىلاتىن تالاپتاردى قامتاماسىز ەتپەۋ؛
- قوسالقى مەردىگەرلەردە جول قۇرىلىسى سالاسىندا ءتيىستى ماتەريالدىق-تەحنيكالىق جاراقتاندىرۋدىڭ جانە تاجىريبەنىڭ بولماۋى.
بۇدان باسقا، ءىس-شارا بارىسىندا ارنايى جۇمىس توبىنىڭ كوشپەلى مونيتورينگىنىڭ ناتيجەلەرى ايتىلدى، وندا انىقتالعان بۇزۋشىلىقتار تولتىرىلىپ جانە ۋاكىلەتتى ورگانداردىڭ اتىنا ءتيىستى ۇسىنىمدار ەنگىزىلەدى. جول اكتيۆتەرى ساپاسىنىڭ ۇلتتىق ورتالىعى الماتى فيليالىنىڭ ماماندارى قۇرىلىس نىساندارىن بىرلەسىپ تەكسەرۋلەرگە تۇراقتى تۇردە قاتىسىپ، انىقتالعان كەمشىلىكتەردى حابارلايدى.
«قازىرگى تاڭدا الماتى قالاسىندا جولداردى ورتاشا جوندەۋ مەن اعىمداعى جوندەۋ جۇمىستارى قارقىندى جۇزەگە اسۋدا. ءبىزدىڭ مەكەمە قالا جول جەلىلەرىنىڭ ساپاسىن تەكسەرۋمەن، جول قۇرىلىسى بارىسىن قاداعالاۋمەن تۇراقتى تۇردە اينالىسادى. فيليال ماماندارىنا جەمقورلىقتىڭ الدىن الۋ، جەمقورلىق تاۋەكەلدەردى بولدىرماۋ بويىنشا ۇنەمى پروفيلاكتيكالىق جۇمىس جۇرگىزىلەدى. ال جولداردى تەكسەرۋ بارىسىندا انىقتالعان كەمشىلىكتەر بىردەن ورتاق بازاعا ەنگىزىلىپ، ءتيىستى ورگاندارعا جولدانادى»، - دەيدى فيليال ديرەكتورى ماۋلەن توقتارباي ۇلى.
باسقوسۋ بارىسىندا مەردىگەرلىك ۇيىمداردىڭ پىكىرلەرى مەن ۇسىنىستارى تىڭدالدى. پروبلەمالىق ماسەلەلەر تالقىلانىپ، مەملەكەتتىك ورگاندار مەن مۇددەلى تۇلعالارعا ناقتى ۇسىنىستار بەرىلدى. تاراپتار وتكىزىلگەن ءىس-شارانى سىندارلى جانە جەمىستى دەپ تانىپ، وسىعان ۇقساس ءىس-شارالاردى جۇيەلى تۇردە وتكىزۋ تۋرالى ۋاعدالاستىققا قول جەتكىزدى.