تاعى ءبىر كۇدىكتى اسا ءىرى كولەمدە الاياقتىق جاساعانى ءۇشىن قىلمىستىق جاۋاپتىلىققا تارتۋ ماقساتىندا رەسەيدەن قازاقستانعا ەكستراديسيالاندى.
كۇدىكتى پاۆلوداردا 2019-2023 جىلدار ارالىعىندا تانىستارىنان بيزنەستى دامىتۋ ءۇشىن اقشا الىپ، كەپىلدىك رەتىندە وزىنە تيەسىلى ەمەس پاتەردى ۇسىنعان.
ونىڭ قىلمىستىق ارەكەتتەرى سالدارىنان پاۆلودار قالاسىنىڭ 66 تۇرعىنىنا جالپى سوماسى 223 ملن تەڭگەدەن اسا شىعىن كەلتىرىلدى، دەپ حابارلايدى aqshamnews.kz باس پروكۋراتۋراعا سىلتەمە جاساپ.
قىلمىس جاساعاننان كەيىن كۇدىكتى جاسىرىنىپ، سوعان بايلانىستى ول حالىقارالىق ىزدەۋگە جاريالانعان.
وتكەن جىلدىڭ جەلتوقسان ايىندا ول رەسەي فەدەراسياسى ادىگەيا رەسپۋبليكاسىنىڭ اۋماعىندا ۇستالدى، سودان كەيىن قازاقستان رەسپۋبليكاسى باس پروكۋراتۋراسىنىڭ ءوتىنىشى بويىنشا قازاقستانعا ەكستراديسيالاندى.
قازىرگى ۋاقىتتا كۇدىكتى ۋاقىتشا ۇستاۋ يزولياتورىنا قامالدى.
ايىپتالعان قىلمىستى جاساعانى ءۇشىن مۇلكى تاركىلەنىپ، بەس جىلدان ون جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان.