قازىرگى كۇنى اتا-انا مەن بالا اراسىنداعى قارىم-قاتىناستا پروبلەما از ەمەس. ءار ءجاسوسپىرىمنىڭ پسيحولوگيالىق جاعدايىن زەرتتەمەي كەڭەس بەرۋ وتە قيىن. دەگەنمەن، اتا-انا مەن بالا بىر-بىرىنە جاقىن بولۋى كەرەك. ءبىر-بىرىنىڭ ومىرىنە قىزىعۋشىلىق تانىتىپ، سۇحباتتاسۋ پارىز.
بۇل پىكىرلەردى ق ر دەنساۋلىق ساقتاۋ مينيسترلىگىنىڭ شتاتتان تىس بالالار پسيحياترى جانە الماتىداعى رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعىنىڭ بالالار ءبولىمىنىڭ مەڭگەرۋشىسى مارينا ۆيحنوۆسكايا ايتتى.
– وكىنىشكە قاراي، قازىرگى ۋاقىتتا اتا-انالاردىڭ بالا تاربيەسىمەن اينالىسۋعا ۋاقىتى جوق. كۇنى بويى جۇمىستا نەمەسە ءوزىنىڭ كاسىبىن دوڭگەلەتۋ ءۇشىن پەرزەنتىنىڭ قالاي وسكەنىن بىلمەيدى، كەيدە ۇل-قىزىنا ەشنارسە بەرمەيدى، شامادان تىس قامقورلىق جاساپ، قوماقتى اقشا بەرىپ، قىمبات سىيلىقتار ساتىپ اپەرىپ، شەكتەن تىس ەركەلەتەدى. بۇگىنگى كۇنى بالامەن سويلەسىپ، ونىڭ ومىرىندە بولىپ جاتقان وقيعالاردى، وزگەرىستەردى بىلەتىن وتباسىنى سيرەك كەزدەستىرۋگە بولادى. دەگەنمەن، جاسوسپىرىمدەردىڭ ومىرىنە شەكتەن تىس ارالاسىپ، باسقان ادىمىن اڭدۋعا دا بولمايدى. مۇنداي قارىم-قاتىناستان بالا سىزدەن الشاقتاپ، تۇيىقتالۋى مۇمكىن، – دەيدى پسيحيكالىق اۋرۋعا شالدىققان بالالار مەن جاسوسپىرىمدەردى 33 جىلدان بەرى ەمدەپ كەلە جاتقان بالالار پسيحياترى.
ورتالىقتىڭ «بالالار پسيحياترياسى» بولىمىندە جىلىنا 600-دەي بالا ەمدەلەدى. وندا ماماندار ەرەكشە ناۋقاستارعا تاۋلىك بويى قىزمەت كورسەتەدى.
مارينا ۆيحنوۆسكايانىڭ ايتۋىنشا، كارانتين كەزىندە اتا-انالار ۇيدە وتىرىپ، بالالارىنىڭ پسيحيكاسىندا بۇرىن بايقاماعان پروبلەمالارعا كۋا بولىپ، وزدەرى دابىل قاعىپتى. كەزىندە الەمدى ابىگەرگە سالعان كوروناۆيرۋس ىندەتى تۇسىندا ەرىكسىز ۇيگە قامالعان تالاي اكە-شەشە ۇلى مەن قىزىنىڭ نەمەن اينالىسىپ جۇرگەنىن، مىنەزى قانداي ەكەنىن ەندى ءبىلىپ، پسيحولوگيالىق كومەككە جۇگىنە باستاعان. بالالار پسيحياترى پاندەميا بالالار مەن اتا-انا اراسىنداعى قارىم-قاتىناسقا ەرەكشە سەرپىلىس بەردى دەيدى.
بالالار پسيحياترى جاسوسپىرىمدەردى سۋيسيد جاساۋعا نە يتەرمەلەيتىنى تۋرالى دا تىلگە تيەك ەتتى.
– ءبىز ءوز ومىرىنە قول جۇمساۋعا وقتالعان بالالارمەن جۇمىس ىستەيمىز. ەڭ الدىمەن، ونى ولىمگە يتەرمەلەگەن سەبەپتى ايقىنداۋ كەرەك. ءسۋيسيدتىڭ ەكى ءتۇرى بار. ءبىرىنشىسى، كەيبىر ناۋقاستار شىنىمەن ءوز ومىرىمەن قوشتاسۋعا بەل بۋادى. ەندى وسىنداي ارەكەتتىڭ تاعى ءبىر ءتۇرى سۋيسيدتىك ارەكەتىن دەمونستراتيۆتى تۇردە كورسەتەدى. قاتىگەز شەشىم قابىلداۋعا وتباسىنداعى كيكىلجىڭ، مەكتەپتەگى پروبلەما نەمەسە پسيحيكالىق اۋىتقۋشىلىق، الەۋمەتتىك جەلىدەگى پسيحولوگيالىق قىسىمعا ۇشىراۋ، ونى اينالاسىنداعى ادامداردىڭ تۇسىنبەۋى، ۇرەي سياقتى تۇيتكىلدەر تۇرتكى بولادى. سوندىقتان ءجاسوسپىرىمنىڭ مىنەز-قۇلقىنان ءبىر وزگەرىس بايقاساڭىزدار، تىكەلەي پسيحولوگتىڭ كومەگىنە جۇگىنۋ كەرەك، – دەيدى مامان.
بالالار پسيحياترى وسىدان 20 جىل بۇرىنعى بالالار مەن قازىرگى جەتكىنشەكتەردىڭ اراسىندا ايىرماشىلىق بارىن ايتىپ وتىر. ونىڭ ايتۋىنشا، بۇگىنگى بالانىڭ وي-ساناسى كوش ىلگەرى. سەبەبى، ولاردىڭ بارلىعى قازىرگى تەحنولوگيانى مەڭگەرگەن. ناۋقاس ءوزىنىڭ دەرتى جايلى اقپاراتتى ينتەرنەتتەن وقىپ، نە ىستەۋ كەرەك نەمەسە نەنىڭ دەنساۋلىعىنا ءقاۋىپتى ەكەنىن بىلە الادى. دەگەنمەن، ءومىرىمىزدىڭ اجىراماس بولىگىنە اينالعان اقپاراتتىق تەحنولوگيانى ۇرشىقشا يىرگەنى ءبىر جاعىنان تاماشا، ەكىنشى جاعىنان كەرى اسەرىن دە جوققا شىعارا المايمىز. ماسەلەن، بۇعاناسى قاتپاعان، ويى، ساناسى تولىق جەتىلمەگەن ۇلدىڭ دا، قىزدىڭ دا وسىنداي اقپاراتتارعا قولجەتىمدىلىگىنىڭ ناتيجەسىندە پسيحوبەلسەندى زاتتاردى ەرتە تۇتىنۋ، جىنىستىق قاتىناس، دەمونستراتيۆتى سۋيسيدكە بەيىمدەلۋ سياقتى وزەكتى ماسەلەلەردىڭ تۋىنداپ جاتقانى جاسىرىن ەمەس. سوندىقتان ءار نارسەنىڭ ءوز ورنىمەن بولعانى ابزال دەيدى بالالار پسيحياترى.