بالالىق شاعى مەن كەدەيلىككە دەگەن كەك كىتاپقۇمارلىققا اكەلگەن

الەمدە تالاي قىزىق بار!

72 جاستاعى مۇحاممەد ازيز الەمدە سۋرەتكە ەڭ كوپ رەت تۇسىرىلگەن كىتاپ ساتۋشى. كۇنى بويى كىتاپتان باس المايتىن ەرەكشە كىتاپ ساتۋشى ماروككونىڭ رابات قالاسىندا تۇرادى، دەپ حابارلايدى Almaty-akshamy.kz.

حالىقتىڭ 26% - ى ءالى حات تانىمايتىن ەلدە كىتاپ ساتۋ ءىسى - بۇل ءوز قالاسى مەن ادەبيەتىنە دەگەن سۇيىسپەنشىلىكتەن بولسا كەرەك.

6 جاسىنان باستاپ جەتىم قالعان ءازيزدىڭ ءومىرى قيىندىققا تولى بولعانى سونداي، ول ورتا مەكتەپتى اياقتاي الماعان.  ويتكەنى ونىڭ وقۋلىق ساتىپ الاتىن جاعدايى بولماعان. 1963 جىلى 15 جاسىندا ول العاش رەت كىتاپ ساتۋشى رەتىندەگى ءىسىن 9 كىتاپتان باستاعان. اعاش استىندا وتىرىپ، كىلەمگە جايىپ ساتا باستاعان مۇحاممەد ازيزدىڭ دۇكەنىندە بۇگىندە مىڭداعان كىتاپ بار.

ءبىر قىزىعى، ونىڭ بۇكىل ءومىرى سول كىتاپتارىنىڭ اراسىندا ءوتىپ جاتىر. ول ۋاقىتىنىڭ باسىم بولىگىن، ياعني كۇنىنە 6-دان 8 ساعاتقا دەيىن كىتاپ وقۋعا جۇمسايدى جانە تەك تاماقتانۋعا، دۇعا ەتۋگە، تەمەكى شەگۋگە جانە كليەنتتەرگە كومەكتەسۋ ءۇشىن ءۇزىلىس جاسايدى ەكەن. قالعان ۋاقىتتا ول كەيىنىرەك ءوز دۇكەنىندە ساتىلاتىن كىتاپتاردى ىزدەۋ ءۇشىن اۋدانداردى ارالايدى.

بۇل ارەكەتىن كىتاپقۇمار ادام ءوزىنىڭ بالالىق شاعى پەن كەدەيلىكتەن العان ءوشى دەپ سانايدى. 

"مەن اراب، فرانسۋز، اعىلشىن نەمەسە يسپان تىلدەرىندە 4000-نان استام كىتاپ وقىدىم، ياعني 4000-نان استام ءومىر ءسۇردىم دەۋگە بولادى. اركىمنىڭ وسىنداي مۇمكىندىگى بولۋى كەرەك! مەنىڭ كۇنىمنىڭ ويداعىداي ءوتۋى  ءۇشىن ماعان تەك ەكى جاستىق پەن كىتاپ بولسا جەتكىلىكتى"، - دەيدى مۇحاممەد ازيز.