بايقاۋعا 109 ءان كەلىپ ءتۇستى.
رەسپۋبليكا كۇنى قارساڭىندا ەلوردادا بالالار جىلىنا وراي «قازاقستان» تەلەراديوكورپوراسياسى جاريالاعان «بالداۋرەن» بالالارعا ارنالعان اندەر بايقاۋىنىڭ جەڭىمپازدارىن ماراپاتتاۋ ءراسىمى ءوتتى، دەپ حابارلايدى Almaty-akshamy.kz Elorda.info-عا سىلتەمە جاساپ.
ءىس-شاراعا دەپۋتاتتار، قوعام قايراتكەرلەرى، ب ا ق وكىلدەرى جانە ەلوردالىق مەكتەپ وقۋشىلارى مەن اتا-انالار قاتىستى.
2022 جىلدىڭ باسىندا جاريالانعان بايقاۋعا ەلىمىزدىڭ بارلىق ايماعىنان 60-قا جۋىق اۆتوردان 109 ءان كەلىپ ءتۇستى. قازىلار القاسىنىڭ شەشىمى بويىنشا، 109 ءاننىڭ اراسىنان سۇلۋشاش سۇلتانوۆانىڭ «قۋىرشاعىم» (ءسوزى عايني داۋىلبايەۆا)، دۋمان بايتىلەۋوۆتىڭ «جاۋ، جاڭبىر!» (ءسوزى باۋىرجان ەرمان)، ۇشقىن جامالبەكتىڭ «بالاپانىم» (ءسوزى ايتبەك تۇرسىنباي)، بەكجىگىت سەردالىنىڭ «اڭگەلەك» (ءسوزى سابىرحان اسانوۆ) جانە التىن ماحانبەتوۆانىڭ «كوكوراي كوكتەم» (ءسوزى ءابدىراحمان اسىلبەكوۆ) اندەرى ۇزدىك دەپ تانىلدى.
- «بالداۋرەن» بايقاۋىن وتكىزۋدەگى باستى ماقساتىمىز – بالالار اندەرىنىڭ كوبەيۋىنە ۇلەس قوسۋ. سەبەبى، ەلىمىزدە بالالاردىڭ ورىنداۋىنا لايىقتالعان اندەر وتە از. سوندىقتان دا بالاپاندارىمىز ورىس، اعىلشىن تىلىندەگى اندەرمەن ءوسىپ كەلەدى. ءبىز بيىل 4 مىڭ بالا قاتىسقان «قازاقستان داۋىسى. بالالار» تەليەۆيزيالىق جوباسىن وتكىزگەن كەزدە، وسى ماسەلەنى قاتتى سەزىندىك. كورەرمەندەر تاراپىنان كوپتەگەن سىن ايتىلدى. شىن مانىندە ايتىلعان ءاربىر سىننىڭ استارىندا شىندىق بار. وسىدان كەيىن، ويلانا كەلە بالالار جىلىندا بالالار شىعارماشىلىعىنا تارتۋىمىز بولسىن دەپ اندەر بايقاۋىن جاريالادىق. ۇزدىك شىققان 5 انگە «قازاقستان» تەلەراديوكورپوراسياسى ارنايى بەينەبايادار ءتۇسىردى. بۇل كليپتەر جاقىندا «Qazaqstan» جانە «Balapan» ارنالارىنىڭ ەفيرىنەن كورسەتىلە باستايدى، - دەدى باسقارما ءتورايىمى ءلاززات تانىسباي.
باسقارما ءتورايىمى بايقاۋعا قاتىسۋشىلارعا العىس ءبىلدىرىپ، «ۇزدىكتەر قاتارىنا قوسىلماعان قالعان 100 ءان بولاشاقتا بالالاردىڭ ورىنداۋىندا جارىققا شىعىپ، ءار ۇيدە جانە ۇلكەن ساحنالاردا شىرقالاتىنىنا سەنەمىز»، - دەدى.
جەڭىمپازداردى كورپوراسيانىڭ كوركەمدىك كەڭەسىنەن بولەك، ارنايى قۇرىلعان قازىلار القاسى ىرىكتەدى. قازىلار القاسىنىڭ قۇرامىندا مەملەكەتتىك سىيلىقتىڭ لاۋرەاتى، قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت، كومپوزيتور، ق ر كومپوزيتورلارى وداعىنىڭ ءتوراعاسى سەرىك ءابدىنۇروۆ، كومپوزيتور، مۋزىكانت حاميت شانعالييەۆ جانە بالالار اقىنى، جۋرناليست سەرىكبول حاسان بار.
ايتا كەتەرلىگى، بالالارعان ارنالعان اندەر بايقاۋى تاۋەلسىز قازاقستان تاريحىندا تۇڭعىش رەت ۇيىمداستىرىلدى. ءوتىنىم جولداعاندار اراسىندا ەلىمىزگە تانىمال كاسىبي كومپوزيتورلارمەن قاتار جاڭا اۆتورلار دا بولدى.