پرەزيدەنت ايتقانداي، ءاربىر وتباسى ەلىمىز پايدالانىپ جاتقان ۇلتتىق بايلىقتىڭ يگىلىگىن كورۋى كەرەك.
جوبانىڭ ماقساتى – ۇلتتىق قوردىڭ جىل سايىنعى ينۆەستيسيالىق تابىسىنىڭ 50 پايىزىن بالالاردىڭ ارناۋلى جيناقتاۋشى ەسەپشوتىنا اۋدارىپ وتىرۋ، دەپ حابارلايدى Almaty-akshamy.kz
سوندىقتان بيىل قاسىم-جومارت توقايەۆ بالالار جىلىنىڭ اياسىندا «ۇلتتىق قور – بالالارعا» اتتى مۇلدە جاڭا باعدارلامانى جۇزەگە اسىرۋدى تاپسىردى. جوبانىڭ ماقساتى – ۇلتتىق قوردىڭ جىل سايىنعى ينۆەستيسيالىق تابىسىنىڭ 50 پايىزىن بالالاردىڭ ارناۋلى جيناقتاۋشى ەسەپشوتىنا اۋدارىپ وتىرۋ. قارجى ءار بالا 18 جاسقا تولعانعا دەيىن اۋدارىلىپ تۇرادى. ونى مەرزىمىنەن بۇرىن ەسەپشوتتان شەشىپ الۋعا بولمايدى. جيناقتالعان قارجى بالالار كامەلەت جاسىنا تولعاننان كەيىن ولاردىڭ باسپانا نەمەسە ءبىلىم الۋىنا جۇمسالاتىن بولادى.
«بۇل قاراجات وسكەلەڭ ۇرپاقتىڭ ۇلكەن ومىرگە قادام باسۋىنا مۇمكىندىك بەرەدى. قور، شىن مانىندە، ۇلتتىق مارتەبەگە يە بولىپ، حالقىمىزدىڭ يگىلىگىنە قىزمەت ەتەدى. باستامانى مۇقيات ازىرلەۋ قاجەتتىگىن ەسكەرە وتىرىپ، جوبانى 2024 جىلعى 1 قاڭتاردان جۇزەگە اسىرا باستاۋدى تاپسىرامىن»، دەدى مەملەكەت باسشىسى.
جوبانى جۇزەگە اسىرۋ تەتىكتەرى مەن رەگلامەنتى ۇكىمەت پەن ۇلتتىق بانك بىرلەسە وتىرىپ پىسىقتاعاننان كەيىن جاريا بولماق. ازىرشە بۇل جايىندا بىردەڭە ايتۋ ورىنسىز. دەگەنمەن، جاقىندا ۇلتتىق ەكونوميكا ۆيسە-مينيسترى تيمۋر جاقسىلىقوۆ ءبىرىڭعاي جيناقتاۋشى زەينەتاقى قورى بالالارعا ارنالعان ەسەپشوتتاردىڭ وپەراتورى بولاتىنىن حابارلادى.