كيكىلجىڭدەر، كليماتتىڭ وزگەرۋى، جاپپاي قىمباتشىلىق ازىق-تۇلىك قاۋىپسىزدىگىنە ءقاۋىپ ءتوندىرىپ تۇر
«ازىق-تۇلىك داعدارىسى گۋمانيتارلىق اپاتقا اكەپ سوعۋى مۇمكىن». بۇۇ ازىق-تۇلىك باعدارلاماسىنىڭ باسشىلىعى جاھان جۇرتىن داعدارىسپەن كۇرەستە كۇش بىرىكتىرۋگە شاقىرۋدا، دەپ حابارلايدى Almaty-akshamy.kz.
ۇيىمنىڭ مالىمەتىنشە، ءقازىر الەمدە 900 ملن استام ادام اشتىقتىڭ زاردابىن تارتىپ وتىر. ءبىر ءتىلىم نانعا ءزارۋ جاندارعا قول ۇشىن سوزۋ ءۇشىن الەمدىك قاۋىمداستىق بريۋسسەلدە «كومەك» كورمەسىن ۇيىمداستىردى.
افريكالىق 1،5 جاسار ءناوميدىڭ سالماعى بار-جوعى التى كەلى. اشتىقتىڭ كەسىرىنەن سومالي، نيگەريا مەن سۋداندا ءقازىر 5 جاسقا دەيىنگى 20 ملن بالا ءولىم اۋزىندا جاتىر. اشرافي جاھان جۇرتىنان كومەك سۇراۋ ءۇشىن بريۋسسەلدەگى كورمەگە ارنايى كەلىپتى، دەپ جازدى qazaqstan.tv.
«جازدا سۋ بولماي، ايماعىمىزدا ەگىن شىقپادى. سوعىستىڭ كەسىرىنەن ۋكراينانىڭ بيدايى بىزگە جەتپەي جاتىر. اشتىقتان بيىل ولكەمىزدە 250 مىڭ ادام قايتىس بولدى»،- دەيدى «افريكاعا كومەك» ۇيىمىنىڭ جەتەكشىسى اشرافي بەنۋدجي.
بۇۇ مالىمەتىنشە، ءقازىر الەمنىڭ 48 ەلىندە 924 ملن ادام اشتىقتىڭ زاردابىن تارتىپ وتىر. دەنى افريكا، وڭتۇستىك ازيا مەن لاتىن امەريكاسىنىڭ حالقى. بريۋسسەلدەگى كورمەدە دونور مەملەكەتتەر كومەككە مۇقتاج جاندارعا جىبەرەتىن ازىق-تۇلىك، دارى-دارمەكتەرىن سورەگە شىعاردى.
«كيكىلجىڭدەر، كليماتتىڭ وزگەرۋى، جاپپاي قىمباتشىلىق ازىق-تۇلىك قاۋىپسىزدىگىنە ءقاۋىپ ءتوندىرىپ تۇر. حالىقارالىق قاۋىمداستىق كۇش بىرىكتىرىپ، مۇقتاج ەلدەرگە بار كومەكتى جىبەرۋى ءتيىس. ءۇمىت اقش پەن باتىس ەلدەرىندە»،- دەيدى گۋمانيتارلىق كومەك قورىنىڭ باس ديرەكتورى ايدىن دۋرمۋش.
بۇل داعدارىس ەۋروپا ەلدەرىندە جەمىس-جيدەك، كوكونىس، ازىق-تۇلىك قۇنىنىڭ شارىقتاۋىنا اكەپ سوقتى. «شىعىنعا شاش ەتەكتەن باتتىق»-دەگەن شارۋالار ءقازىر وزگە تۇگىلى ءوز نارىعىن قاجەتتى ازىق-تۇلىكپەن قامتۋعا قاۋقارسىز. سوعىس توقتاماسا، الەمدە اشتىقتان قىرىلاتىنداردىڭ، كەدەيلەردىڭ سانى كوبەيەدى. حالىقتىڭ نارازىلىعى كۇشەيەتىن بولسا، جاھاندىق بەيبىتشىلىككە ءقاۋىپ تونەدى،-دەيدى ساراپشىلار.