الماتى قالاسىنىڭ ءبىلىم باسقارماسى قوعامدىق كەڭەس مۇشەلەرىمەن بىرلەسىپ بارلىق بالالار لاگەرىنىڭ جۇمىسىن تەكسەردى. اتاپ ايتقاندا، بالالارعا جاسالعان جاعداي، ولاردىڭ كەلۋ باعدارلاماسى جانە ت.ب. ءارى جازعى كەزەڭدە بالالار دەمالىسىن ۇيىمداستىرۋ ماسەلەسى بويىنشا مامانداندىرىلعان بالالار مەكەمەلەرىنىڭ كۋراتورلارىمەن بىرگە جۇمىس كۇشەيتىلدى.
الماتىدا دەمالىس كەزىندە كوپبالالى جانە از قامتىلعان وتباسىلاردان شىققان 3000-عا جۋىق بالا، اتا-اناسىنىڭ قامقورلىعىنسىز قالعان 100 بالا، سونىمەن قاتار، ەرەكشە ءبىلىم بەرۋ قاجەتتىلىگى بار بالالاردى قالا سىرتىنداعى لاگەرلەرگە دەمالۋعا جىبەرۋ جوسپارلانۋدا.
ايتا كەتەرلىگى، ءتيىستى تالاپقا ساي ەمەس ەكى لاگەردەگى جاعدايعا بايلانىستى ءبىلىم باسقارماسى بارلىق بالانى باسقا ەكى لاگەرگە كەزەڭ-كەزەڭىمەن جىبەرۋ تۋرالى شەشىم قابىلدادى. وسىلايشا، «بەل ريچي» جشس-نە («ارمان دالا» لاگەرى) قاتىستى قىزمەت كورسەتۋ شارتىن بۇزۋ تۋرالى شەشىم قابىلداندى، جاۋاپسىز قىزمەت كورسەتۋشى دەپ تانۋ تۋرالى تالاپ ارىز بەرىلدى. اقشا تولەنبەدى.
بۇعان قوسا، قالالىق ءبىلىم باسقارماسىنىڭ قىزمەتكەرلەرى «تاۋ سامالى» لاگەرىنە («ايسۇلۋ جانە ت» ج ش س) بالالاردى كىرگىزبەۋ تۋرالى شەشىم قابىلدادى. لاگەرگە جولدىڭ قاشىقتىعىن جانە بالالاردىڭ ەرەكشە ءبىلىم بەرۋ قاجەتتىلىگىن ەسكەرە وتىرىپ، ولار قاسكەلەڭ قالاسىنداعى جەكە مەكتەپتە ۋاقىتشا ورنالاستىرىلدى. بالالاردىڭ قاۋىپسىزدىگىن قامتاماسىز ەتۋ ءۇشىن مەديسينالىق قىزمەتكەرلەر تاۋلىك بويى كەزەكشىلىك ەتەدى. «جانۇيا» مامانداندىرىلعان كەشەنىنىڭ تاربيەلەنۋشىلەرى وسى مەكتەپتە بولعان كەزەڭدە ولارعا التى رەت تاماقتاندىرۋ، مادەني ءىس-شارالار جانە ت.ب. ۇيىمداستىرىلدى. ايتا كەتەيىك، بۇعان دەيىن ماۋسىم – شىلدە ايىنىڭ باسىندا «جانۇيا» مك تاربيەلەنۋشىلەرى «ورنەك»، «يۋنىي دوموسترويتەل» قالا ماڭىنداعى لاگەرلەردە، الاكول كولىندە دەمالعان بولاتىن.
قازىرگى تاڭدۆ الماتى قالاسىنىڭ ءبىلىم باسقارماسى بالالاردىڭ جازعى دەمالىسىن ۇيىمداستىرۋ بويىنشا شارتتا بەلگىلەنگەن مىندەتتەمەلەردىڭ ساپاسىز ورىندالۋىنا بايلانىستى «ايسۇلۋ جانە ت» جشس-نە شارتتى بۇزۋ تۋرالى ەسكەرتۋ جىبەردى.
بيىل 19 شىلدەدە الماتى اكىمدىگى ب ا ق وكىلدەرى ءۇشىن بالالار لاگەرلەرى بويىنشا باسپا ءسوز تۋرىن ۇيىمداستىرادى.