كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا جاس جىگىتكە جۇرەك ترانسپلانتاسياسى جاسالدى.
دارىگەرلەردىڭ ايتۋىنشا، الماتىنىڭ 53 جاستاعى تۇرعىنى ءتورت ادامنىڭ ءومىرىن امان الىپ قالدى.
ول ەكىنشى رەت ميدىڭ ولىمىنە اكەپ سوقتىرعان يشەميالىق ينسۋلتقا شالدىققان.
دونور الماتىداعى № 4 اۋرۋحانادا قايتىس بولعان. اعزانى الۋ شارالارى اتالعان مەديسينالىق مەكەمەدە جاسالدى.
«13 شىلدە كۇنى تۋىستارى مارقۇمنىڭ اعزاسىن الۋعا كەلىسىم بەردى. ونىڭ جۇرەگى 23 جاستاعى جاس جىگىتتىڭ ءومىرى ساقتاپ قالدى. وعان بۇعان دەيىن ەكى رەت وتا جاسالعان. 2013 جىلى جۇرەك جەتكىلىكسىزدىگى دياگنوزى قويىلدى. سودان بەرى ونىڭ جاعدايى ناشارلاي ءتۇستى. جالعىز جول- جۇرەك اۋىستىرۋ بولدى. ەندى وپەراسيادان سوڭ پاسيەنتتىڭ ساپالى جانە ۇزاق ءومىر سۇرۋىنە مۇمكىندىگى بار»، - دەيدى كارديوحيرۋرگيا بولىمشەسىنىڭ مەڭگەرۋشىسى رۇستەم تولەۋتايەۆ.
كارديولوگيا جانە ىشكى اۋرۋلار عزي باسقارما ءتوراعاسى مارات پاشيموۆتىڭ ايتۋىنشا، كۇردەلى وپەراسيا 6 ساعاتقا سوزىلدى.
وتا ۇلتتىق عىلىمي كارديوحيرۋرگيالىق ورتالىقپەن بىرلەسىپ، ەلىمىزدىڭ جەتەكشى كارديوحيرۋرگى يۋريي پيانىڭ تىكەلەي باسشىلىعىمەن جاسالدى.
«الماتىدا جۇرەكتى العاشقى الماستىرۋ ۇلتتىق عىلىمي كارديوحيرۋرگيالىق ورتالىق ماماندارىنىڭ قولداۋى مەن كارديولوگيا جانە ىشكى اۋرۋلار عزي كومانداسىنىڭ ۇيلەسىمدى جۇمىسىنىڭ ارقاسىندا مۇمكىن بولدى»، - دەدى ول.
قازاق ۇلتتىق مەديسينا ۋنيۆەرسيتەتىنە رەكتورى مارات شورانوۆتىڭ سوزىنشە، قايتىس بولعان ايەلدىڭ جۇرەگىنەن باسقا ەكى بۇيرەگى جانە باۋىرى دا الىنىپ، كەزەكتە تۇرعان ناۋقاستارعا ترانسپلانتاسيا جاسالعان.
«ءقازىر ەلىمىزدە ءتورت مىڭعا جۋىق ادام اعزا اۋىستىرۋ كەزەگىندە تۇر. ونىڭ ىشىندە 147 ناۋقاس جۇرەك ترانسپلانتاسياسى بويىنشا تىزىمگە قويىلعان»،-دەدى مارات شورانوۆ.