قازاقستان رەسپۋبليكاسىنىڭ وقۋ-اعارتۋ مينيسترلىگىندە مەملەكەت باسشىسى قاسىم-جومارت توقايەۆتىڭ ءبىلىم بەرۋ جۇيەسىن دامىتۋ جونىندەگى تاپسىرمالارىنىڭ ىسكە اسىرىلۋى، سونداي-اق ءبىلىم بەرۋ ساپاسىن ارتتىرۋ، بالالاردىڭ قاۋىپسىزدىگىن قامتاماسىز ەتۋ ماسەلەلەرى تالقىلاندى، - دەپ حابارلايدى Aqshamnews.kz.
جيىنعا مينيسترلىكتىڭ قۇرىلىمدىق بولىمشەلەرىنىڭ، وڭىرلىك ءبىلىم باسقارمالارىنىڭ جانە اۋماقتىق ءبىلىم سالاسىنداعى ساپانى قامتاماسىز ەتۋ دەپارتامەنتتەرىنىڭ باسشىلارى قاتىستى.
ءبىلىم سالاسىندا ساپانى قامتاماسىز ەتۋ كوميتەتىنىڭ ءتوراعاسى سەرىك ءاشىروۆ «كەلەشەك مەكتەپتەرى» ۇلتتىق جوباسى اياسىنداعى مەكتەپتەردى ليسەنزيالاۋ بارىسى، كۇردەلى جوندەۋ ءجۇرىپ جاتقان مەكتەپتەردە وقۋ پروسەسىن ۇيىمداستىرۋ، ورتا ءبىلىم بەرۋ كوميتەتىنىڭ ءتوراعاسى قانىبەك جۇماشيەۆ «ءبىلىم بەرۋدەگى وزگەرىستەردىڭ 1000 كوشباسشىسى» جوباسىنىڭ جۇزەگە اسىرىلۋى، ينفراقۇرىلىمدىق دامۋ دەپارتامەنتىنىڭ ديرەكتورى ادىلبەك مۇسابايەۆ وقۋشىلاردى مەكتەپكە تاسىمالداۋدى ۇيىمداستىرۋ جۇمىستارى تۋرالى باياندادى.
مينيستر جۇلدىز سۇلەيمەنوۆا ءار ءوڭىر باسشىلارىنىڭ ەسەپتەرىن دە تىڭداپ، بۇل باعىتتاعى جۇمىستاردى جەتىلدىرۋدى تاپسىردى. سونداي-اق بالالار مەن پەداگوگتەر ءۇشىن جايلى ءارى ءقاۋىپسىز ءبىلىم بەرۋ ورتاسىن قالىپتاستىرۋ، بۇگىنگى سىن-قاتەرلەرگە سايكەس ءبىلىم ساپاسىن ارتتىرۋ جانە وسى باعىتتا پەداگوگتەردىڭ الەۋەتىن كوتەرۋ مەملەكەتتىك ءبىلىم بەرۋ ساياساتىنىڭ باسىمدىعى ەكەنىن اتاپ كورسەتتى.
«وقۋ جىلىنىڭ باسىنان بالالار اراسىندا ورىن العان قۇقىقبۇزۋشىلىقتاردىڭ كوبەيۋى اسا الاڭداتارلىق ماسەلە. ءبىزدىڭ نەگىزگى مىندەتىمىز، ءبىلىم بەرۋ ۇيىمدارىندا ءاربىر بالانىڭ ساپالى ءبىلىم الۋىمەن بىرگە، زاڭ مەن ءتارتىپ قاعيداتىنىڭ ساقتالۋىن قامتاماسىز ەتۋ. بۇل باعىتتا بالالارمەن تاربيەلىك جۇمىستار، اتا-انالارمەن ىنتىماقتاستىق مازمۇندى تۇردە كۇشەيتىلۋى كەرەك. بالالاردىڭ اپاتتى عيماراتتاردا ءبىلىم الۋىنا جول بەرىلمەۋى، مەكتەپكە تاسىمالداۋدا ولاردىڭ قاۋىپسىزدىگىنە نۇقسان كەلتىرىلمەۋى ءتيىس. بۇل بۇكىل ءبىلىم بەرۋ جۇيەسى قىزمەتكەرلەرىنىڭ ورتاق مىندەتى»، — دەدى مينيستر جۇلدىز سۇلەيمەنوۆا.
سونداي-اق، جيىندا تۇرعىندارمەن، اقپارات قۇرالدارىمەن كەرى بايلانىستى جولعا قويۋ ماسەلەسى دە كوتەرىلدى. جيىندى قورىتىندىلاي كەلە، مينيستر اۋىلدىق جانە شالعاي ەلدى مەكەندەردەگى بالالاردى مەكتەپكە تاسىمالداۋدى ءتيىمدى ۇيىمداستىرۋ، بالانىڭ قاۋىپسىزدىگى مەن قۇقىقتارىنىڭ قورعالۋىنا باعىتتالعان جۇمىستاردى كۇشەيتۋ جانە ءبىلىم بەرۋ ءىسىنىڭ بارلىق قاتىسۋشىلارى ءۇشىن تيىمدىلىگىن ارتتىرۋ ءۇشىن ولاردىڭ وتىنىشتەرىنە جەرگىلىكتى جەرلەردە جەدەل دەن قويۋدى ۇيىمداستىرۋ تۋرالى ءبىلىم باسقارمالارى مەن اۋماقتىق دەپارتامەنت باسشىلارىنا ناقتى تاپسىرمالار جۇكتەدى.