ول ءۇشىن بي – جاي عانا ونەر ەمەس، ءومىردىڭ ءوزى. جارتى عاسىرعا جۋىق عۇمىرىن ونەرگە ارناعان ناعىز تالانت يەسى. كىم دەيسىز عوي؟ شىمىلدىقتىڭ ارتىندا شيراق قيمىلمەن بيلەپ، بۇلدىرشىندەرگە بي ۇيرەتىپ تۇرعان قاريانى جەلىدەن كورگەن بولارسىز. بۇل – 76 جاستاعى حورەوگراف ەرسىن ءجۇسىپوۆ. اqshamnews.kz ءتىلشىسى ءومىرىن ونەرگە ارناعان اتامەن سۇحباتتاسىپ، تۇتاس ۇرپاقتىڭ شابىتىن وياتقان جاننىڭ اڭگىمەسىن تىڭدادى.
ەرسىن ءجۇسىپوۆ - قوستاناي وبلىسى، امانكەلدى اۋدانى، بايعابىل اۋىلىندا دۇنيەگە كەلگەن. قوستاناي پەداگوگيكالىق ينستيتۋتىندا حيميا-بيولوگيا ءپانى بويىنشا ءبىلىم الىپ، اۋىل مەكتەبىندە ءمۇعالىم بولىپ ەڭبەك ەتتى. العاشقى كاسىبي قادامىن ۆەتەرينار ماماندىعىمەن باستاعانىمەن، ونەرگە دەگەن ماحاببات ونى ساحناعا سۇيرەدى. ۇستازدىق قىزمەتىنەن بوس ۋاقىتىندا بالالارعا بي ۇيرەتىپ ءجۇرىپ، سول كەزدەگى قوعامدىق جۇمىستار ونىڭ تاعدىرىن تۇبەگەيلى وزگەرتىپ جىبەردى.
ۆەتەريناردان – حورەوگرافقا دەيىنگى جول
ەرسىن مىرزا، مانسابىن عىلىمنان باستاپ، ونەرگە دەگەن سۇيىسپەنشىلىك قايتا شىعارماشىلىققا جەتەلەدى. بارلىعى قالاي باستالعانىن بىلايشا اڭگىمەلەپ بەردى ول:
"قوستانايداعى پەداگوگيكالىق ينستيتۋتقا ءتۇسىپ، ساباق بەرە ءجۇرىپ، بالالارعا بي ۇيرەتۋدى دە قاتار الىپ ءجۇردىم. سول كەزدىڭ وزىندە-اق مەكتەپ باسشىلىعى بايقاپ، مەنى تاربيە ءىسى جونىندەگى مەڭگەرۋشى ەتىپ قويدى. ءسويتىپ ءجۇرىپ، اۋداندىق مادەنيەت ۇيىنە شاقىرتىلىپ، ونەر سالاسىنا بەت بۇردىم. 1996 جىلى ارقالىق قالاسىنا قونىس اۋدارىپ، №6 مەكتەپتە جانە قالالىق مادەنيەت سارايىندا ءبىر جولا بيدەن ساباق بەرۋگە كوشتىم" دەيدى ەرسىن اتا.
ەرسىن ءجۇسىپوۆ مادەنيەت سارايىندا "اقبوتا" بي ءانسامبلىن اشىپ، 2004 جىلى وعان «حالىقتىق» اتاق اپەرگەن.
وزبەكالى جانىبەكوۆ ايتقان ءبىر اۋىز ءسوز...
1971 جىلى ەرسىن ءجۇسىپوۆ 25 جاسىندا تورعاي وبلىسىنا بي بايقاۋىنا 16 وقۋشىنى اپارادى. سول جەردە بولاشاق قازاق مادەنيەتىنىڭ ۇلى تۇلعاسى – وزبەكالى جانىبەكوۆتىڭ نازارىنا ىلىگەدى.
"وزبەكالى جانىبەكوۆ مەنى شاقىرىپ الىپ: «تورعاي جىگىتتەرىنىڭ ءبيىن دايىنداڭىز، تازا قازاقى ستيلدە» دەدى. بۇل – مەن ءۇشىن ۇلكەن سەنىم بولدى. سول ءسوزى ءالى كۇنگە دەيىن جادىمدا جاڭعىرىپ تۇر"، – دەيدى ەرسىن اتا.
وسى وقيعادان كەيىن ەرسىن جۇسىپوۆكە "رايكوم" تاراپىنان بۇيرىق ءتۇسىپ، ول اۋداندىق مادەنيەت ۇيىنە ادىسكەر بولىپ قابىلدانادى. ءقازىر ول استانانىڭ ىرگەسىندەگى قوياندى اۋىلىندا تۇرادى. وسى ەلدى مەكەندە «ميراس» بي ءانسامبلىن قۇردى. ءبىر جارىم جىلدىڭ ىشىندە 10-نان استام بايقاۋعا قاتىسىپ، ۇنەمى قانجىعاسى بوس قايتقان ەمەس.
"مەن جۇلدىز ەمەسپىن – مىندەتىمدى اتقارىپ ءجۇرمىن"
زەينەتكە شىقسا دا سۇيىكتى ىسىمەن اينالىسۋىن قويماعان ەرسىن اتا شيراق قيمىلداۋىنىڭ قۇپياسىن ءبولىستى. ونىڭ سوزىنشە دەنساۋلىقتى جاقسى ساقتاۋ ءۇشىن قيىن فورمۋلا قاجەت ەمەس.
"76 جاسىڭدا بيدەن ساباق بەرۋ وڭاي ەمەس. دەگەنمەن دەنساۋلىقتىڭ ارقاسىندا ىستەپ ءجۇرمىن. دەنساۋلىقتى جاقسى ساقتاۋ ءۇشىن پالەندەي قىر سىرى جوق شىعار. اركىم وزىنە سەنىمدى بولۋ كەرەك. كۇن رەجىمىن ساقتاپ، ادەتتەنگەنمىن. بي دە سپورتتىڭ ءبىر ءتۇرى سەكىلدى عوي. وسىنداي وزىڭە ۇنايتىن، وزىڭە پايداسى بار ىسپەن اينالىسۋ جانە جانۇياڭداعى جاقسى جاعداي، تىنىشتىق، سىيلاستىق دەنساۋلىققا تەك پايدا تيگىزەرى ءسوزسىز" دەيدى ول.
سونداي-اق، ەرسىن اتا الەۋمەتتىك جەلىدە تاراعان بەينە جايلى:
"جەلىدە تاراعان ۆيدەومدى كورىپ ءوزىم دە تاڭعالدىم. ۆيدەونى كىم تۇسىرگەنىن بىلمەيمىن. نەمەرەم «اتا، جۇلدىز بولىپ كەتىپسىز عوي» دەيدى. ۇيالىپ تا قالدىم. مەن جۇلدىز ەمەسپىن، تەك مىندەتىمدى اتقارىپ ءجۇرمىن عوي" دەپ اڭگىمەلەدى.
ميراسىم-مۇرام: "جاس بۋىنعا جول اشسام دەيمىن"
ءقازىر ەرسىن اتا بالالارمەن عانا ەمەس، بولاشاقپەن جۇمىس ىستەپ ءجۇر. جوسپارلارىنىڭ ىشىندە قوياندىدا جاڭا مادەنيەت ءۇيىنىڭ اشىلۋى، اجەلەر مەن اتالاردان قۇرالعان "قازىنا" بي ءانسامبلىن قۇرۋ، ۇلتتىق سالت-داستۇرگە نەگىزدەلگەن سيۋجەتتىك بيلەر قويىلىمى بار.
— جاس مامان كەلسە، قۋانا-قۋانا ورنىمدى بوساتام. ءبىراز ۋاقىت قولداۋ كورسەتىپ، "ميراسىمدى" سوعان تاپسىرىپ كەتكىم كەلەدى. ونەر جالعاسۋى كەرەك. ول مەنىڭ عانا ەمەس، اۋىلدىڭ دا رۋحاني مۇراسى، – دەيدى ەرسىن اتا ۇمىتپەن.
