بالالاردى ەمدەۋ – ەرەكشە ميسسيا. بالالار دارىگەرى ماماندىعى ۇلكەن ادالدىقتى، ىزدەنىستى جانە اسا جاۋاپكەرشىلىكتى تالاپ ەتەدى. جاڭادان دۇنيەگە كەلگەن ءسابي اۋىرىپ تۇرعان جەرىن ايتا المايدى، وسى جاعدايدا اۋرۋدىڭ جازىلۋىنا كومەكتەسەتىن بالالار دارىگەرىنىڭ ءرولى ەرەكشە ماڭىزدى. الماتى قالاسىنداعى №2 قالالىق بالالار كلينيكالىق اۋرۋحاناسىنىڭ پەدياتر-دارىگەرى يرادا كۇردايەۆا وسىنداي بىلىكتى مامانداردىڭ ءبىرى.
نەلىكتەن يرادا كۇردايەۆا پەدياتريانى تاڭدادى؟
يرادا كۇردايەۆا مەديسينا ۋنيۆەرسيتەتىندە ءبىرىنشى كۋرستان باستاپ پەدياتر بولعىسى كەلگەن.
"مەن بالالاردى قاتتى جاقسى كورەمىن. ەڭ اسەرلى ساتتەر – بالالار العىسى. قابىلداۋدان كەيىن قۇشاقتاپ، العىس بىلدىرەدى. دۇنيەدە بۇدان ارتىق باقىت بار ما؟ ەڭ باستىسى، بالالاردىڭ اتا-انالارى ءبىز جازىپ بەرگەن ەمدەردى ورىنداسا، ءبىز بالا دەنساۋلىعىنىڭ جاقسارعانىن بايقايمىز،" – دەيدى يرادا باتال قىزى.
يرادا كۇردايەۆانىڭ مەديسينا سالاسىنداعى جولى
يرادا باتال قىزى سالىستىرمالى تۇردە جاس مامان. ول 2008-2013 جىلدارى قازاقستان-رەسەي مەديسينالىق ۋنيۆەرسيتەتىندە وقىدى (مەديسينا باكالاۆرى ديپلومى). 2013-2015 جىلدارى جالپى پراكتيكا دارىگەرى ماماندىعىن وقىپ، 2017 جىلى پەدياتريا بويىنشا رەزيدەنتۋرانى ءتامامدادى. جۇمىس ءوتىلى 8 جىل بولسا دا، يرادا ءوزىن كاسىبي داعدىلارى مەن ءبىلىمى بار، ءوز جۇمىسىندا بەلگىلى جەتىستىكتەرگە جەتكەن ساۋاتتى جانە پەرسپەكتيۆالى مامان رەتىندە كورسەتتى.
يرادا باتال قىزى كەلەسى مىندەتتەردى اتقارادى:
- پاسيەنتتەردىڭ پروفيلاكتيكاسىن، دياگنوستيكاسىن، ەمدەلۋىن جانە وڭالتۋىن جۇزەگە اسىرۋ.
- بىلىكتى، جەدەل جاردەم جانە باسقا دا مەديسينالىق كومەك تۇرلەرىن كورسەتۋ.
- ناۋقاستى تەكسەرۋ جوسپارىن ازىرلەۋ جانە جۇرگىزۋ تاكتيكاسىن انىقتاۋ.
- كلينيكالىق باقىلاۋلار مەن تەكسەرۋ، انامنەز جيناۋ، كلينيكالىق-زەرتحانالىق جانە اسپاپتىق زەرتتەۋلەردىڭ دەرەكتەرى نەگىزىندە دياگنوزدى بەلگىلەۋ.
- اۋرۋلاردىڭ ەرتە جانە جاسىرىن تۇرلەرىن جانە ءقاۋىپ فاكتورلارىن انىقتاۋ.
- پاسيەنتتەردىڭ ەڭبەككە جارامسىزدىق جاعدايىن انىقتاۋ جانە مەديسينالىق الەۋمەتتىك ساراپتاماعا جىبەرۋ.
- دەنساۋلىق جاعدايىنا تالداۋ جۇرگىزۋ جانە مەديسينالىق قۇجاتتامانى جۇرگىزۋ.
- مەديسينالىق ەتيكا جانە ىشكى ەڭبەك ءتارتىبىنىڭ، ورتكە قارسى قاۋىپسىزدىك پەن سانيتارلىق-ەپيدەميولوگيالىق رەجيمنىڭ ەرەجەلەرىن ساقتاۋ.
بىلىكتىلىگىن ارتتىرۋ جانە بولاشاققا جوسپار
يرادا كۇردايەۆا ۇنەمى ءوز بىلىكتىلىگىن ارتتىرۋ ءۇشىن جۇمىس ىستەيدى، قوسىمشا بىلىمگە نازار اۋدارادى جانە ۋاقىت بولەدى. ونىڭ جۇمىس قابىلەتتىلىگى، سترەسسكە توزىمدىلىگى، جاۋاپكەرشىلىگى، جاڭا تەحنولوگيالاردى يگەرۋگە ۇمتىلۋى جانە ونى وڭاي ءارى تەز ۇيرەنۋى بولاشاقتا ساۋاتتى مامان ەتەتىنى انىق. ەگەر جاس دارىگەرلەر قاتارىندا يرادا كۇردايەۆا سياقتى تابىستى جانە ىزدەنىمپاز ماماندار بولسا، قازاقستاندىق مەديسينانىڭ بولاشاعى زور بولاتىنىنا سەنىمدىمىز.