2024 جىلعى 17 ماۋسىم مەن 17 تامىز ارالىعىندا الماتى قالاسىنىڭ مەدەۋ اۋدانىنداعى قۇرمانعازى كوشەسى بويىمەن پۋشكين كوشەسىنەن دوستىق داڭعىلىنا دەيىن جانە دوستىق داڭعىلىنان زەنكوۆ كوشەسىنە دەيىن اۆتوكولىك قوزعالىسى جابىلادى، دەپ حابارلايدى almaty-akshamy.kz «الماتى جىلۋ جەلىلەرى» جشس-نە سىلتەمە جاساپ.
دوستىق داڭعىلىنان زەنكوۆ كوشەسىنە دەيىنگى قوزعالىس ەكى جاققا دا جابىلادى.
1986 جىلدان بەرى پايدالانىلىپ كەلە جاتقان اتالعان كوشە سەگمەنتىنىڭ ءجۇرىس بولىگىنىڭ استىنان وتەتىن جالپى ۇزىندىعى 305 مەتر قۇبىردى قايتا جاڭارتۋ ۋچاسكەسىندە جوسپارلى جۇمىستاردى جۇرگىزۋ قاۋىپسىزدىگىن قامتاماسىز ەتۋ ءۇشىن ۋاقىتشا شەكتەۋلەر ەنگىزىلەدى.
سوڭعى 5 جىلدا بۇل ۋچاسكەدە 10-عا جۋىق اقاۋ جويىلدى.
بۇل قۇبىر ۋچاسكەسى جىلۋمەن جانە ىستىق سۋمەن 5 كوپپاتەرلى تۇرعىن ءۇيدى جانە 4 وزگە دە وبەكتىلەردى قامتاماسىز ەتەدى. اتالعان تۇتىنۋشىلارعا رەكونسترۋكسيا جۇرگىزۋ كەزەڭىندە ىستىق سۋ بەرىلەتىن بولادى.
ۋاقىتشا قولايسىزدىقتارعا تۇسىنىستىكپەن قاراۋدى جانە كورسەتىلگەن ۋچاسكەنى اينالىپ ءوتۋ جولدارىن الدىن الا قاراستىرۋدى سۇرايمىز.