ەتنومادەني ورتالىق وكىلى پرەزيدەنتتىڭ اسسامبلەيا كەڭەسىندە ايتقان باستامالارىن قولدايدى
قازاقستان پرەزيدەنتى قاسىم-جومارت توقايەۆتىڭ قاتىسۋمەن وتكەن قازاقستان حالقى اسسامبلەياسىنىڭ كەڭەيتىلگەن وتىرىسىندا ايتىلعان ماسەلەلەرگە قاتىستى «قازاقستان ۇيعىرلارىنىڭ رەسپۋبليكالىق ەتنومادەني ورتالىعى» قوعامدىق بىرلەستىگىنىڭ ءتوراعاسى شايماردان نۇرىموۆ ءوز ويىن ءبىلدىردى، دەپ حابارلايدى Almaty-akshamy.kz
ەتنومادەني ورتالىق وكىلىنىڭ ايتۋىنشا، ەلدەگى ءتىل ماسەلەسىن ول ۇنەمى ايتىپ جۇرەدى. قازاق جەرىندە تۇرعاندىقتان، وسى ەلدىڭ مەملەكەتتىك ءتىلىن ءاربىر ادام ءبىلۋى ءتيىس دەپ سانايدى.
«مەن ءوزىم وسىعان دەيىن قازاقستان پارلامەنتىنىڭ دەپۋتاتى بولعانىمدا، بىرنەشە گازەت-جۋرنالداردا وسى پىكىرىمدى ايتقانمىن. ەگەمەندى ەلدە ءومىر ءسۇرىپ جاتقانىمىزعا 30 جىل بولدى. ءبىز ءقازىر قازاق جەرىندە، قازاقستان ەلىندە تۇرىپ جاتىرمىز. سول ءۇشىن كەڭەستە ءسوز سويلەگەن ارىپتەستەرىممەن بىرگە پرەزيدەنتىمىزدىڭ ءسوزىن قولدايمىن. ايتارىم - ءاربىر قازاقستاندىق مەملەكەتتىك ءتىلدى جانە قازاق ءتىلىن مەڭگەرۋى كەرەك. قازاقستاندىق بولعاندىقتان، بىلۋگە ءتيىستى»، - دەيدى ەتنومادەني ورتالىق باسشىسى.
شايماردان نۇرىموۆ باسقارىپ وتىرعان ەتنومادەني ورتالىقتا دا مەملەكەتتىك ءتىلدى ۇيرەنۋ ماسەلەسى العا قويىلعان. ايتۋىنشا، قازاقستان ۇيعىرلارىنىڭ بىرلەستىگى كوپ جىلداردان بەرى وسى باعىتتا جۇمىس ىستەپ كەلە جاتىر. قازاق ءتىلىن ۇيرەتۋ توپتارى اشىلعان. وندا مۇعالىمدەر ءتىل ۇيرەتىپ، كوپتەگەن كەزدەسۋلەر وتەدى.
سونىمەن قاتار، سپيكەر پرەزيدەنتتىڭ اسسامبلەيا كەڭەسىندە دوستىق ۇيلەرىن اشۋ باستاماسىن قولدايتىنىن ايتتى.
«پرەزيدەنتىمىز دوستىق ۇيلەرى جايىندا وتە جاقسى پىكىرلەرىن ءبىلدىردى. دوستىق ۇيلەرى تەك جينالىس اشاتىن ورىن ەمەس، ول قازاقستانداعى ءارتۇرلى ەتنوس وكىلدەرىنىڭ بىر-بىرىمەن تۋىسقانداي ارالاسىپ، ءىس-شارالار وتكىزەتىن ورىن بولسىن دەپ ايتتى. ءبىزدىڭ الماتىداعى دوستىق ءۇيى شىن مانىندە وسى كۇنگە دەيىن دە سونداي ءىس-شارالارعا اتسالىسىپ كەلگەن. ۇيعىر مادەني ورتالىعى ايىنا ءبىر رەت سونداي كەڭ اۋقىمداعى ءىس-شارالار وتكىزىپ تۇرادى»، - دەيدى شايماردان نۇرىموۆ.
ەتنوورتالىق جاقىندا تاۋەلسىزدىكتىڭ تورقالى تويىنا ارنالعان ۇلكەن ءىس-شارا وتكىزگەن.