1 ماۋسىم – بالالاردى قورعاۋ كۇنىنە ايرىقشا ءمان بەرىلەدى. بۇگىنگى بالالار – بولاشاعىمىزدىڭ كەلبەتى. بالالارعا وتباسىندا، مەكتەپتە جانە قوعامدا اقاۋسىز تالىم-تاربيە بەرۋ، ءقاۋىپسىز ورتا جاراتۋ، تۇلعالىق قالىپتاسۋىنا جاعداي جاساۋ تۇتاس قوعامنىڭ ورتاق اتقاراتىن مىندەتى.
بۇگىن قالاداعى ءبىلىم بەرۋ مەكەمەلەرىندە بالالاردىڭ قۇقىقتىق ساۋاتىن ارتتىرۋ، قاۋىپسىزدىكتى ماسەلەلەرىنە كوڭىل اۋدارتۋ ماقساتىندا ماڭىزدى ءىس-شارالار ءوتتى.
بوستاندىق اۋدانىنداعى №70 مەكتەپ بالالاردىڭ قۇقىقتىق تانىمىن تەرەڭدەتۋ ءىسىن قىزىقتى سايىس تۇرىندە ۇيىمداستىردى. "بالالار قاۋىپسىزدىگى – باستى نازاردا" دەپ اتالاتىن كۆەست-سايىسىنا ءتۇرلى سىنىپ وقۋشىلارى قاتىسىپ، قۇقىق پەن قاۋىپسىزدىك جانە ءتارتىپ تاقىرىپتارىندا ءوز بىلىمدەرىن كورسەتتى.
وقۋشىلار سايىس بارىسىندا وزدەرىن پوليسيا وكىلدەرى رەتىندە كورسەتىپ، قاۋىپسىزدىك پەن ءتارتىپتىڭ، قوعام تىنىشتىعىنىڭ ماڭىزدى كەپىلدەرىن، قۇقىقتىق تاقىرىپتاردى تالقىلادى. پوليسەي فورماسىن كيگەن وقۋشىلار وزدەرىن قوعام اماندىعىن ساقتاۋشى رەتىندە سەزىنە الدى.
بالالارعا زاڭ مەن ءتارتىپتى، ءتۇرلى ورتاداعى قاۋىپسىزدىك ماسەلەلەرىن تۇسىندىرۋدە ءوزارا اقىل-وي سايسى فورماتىن قولدانۋدىڭ ناتيجەسى جوعارى دەپ سانايدى مەكتەپ ۇجىمى. مەكتەپتەگى بۇل ماڭىزدى ءىس-شاراعا يۋۆەنالدى پوليسيا وكىلدەرى دە قاتىسىپ، سايىسكەرلەردى باعالادى جانە جەڭىمپازداردى ماراپاتتادى.
№70 مەكتەپتىڭ ديرەكتورى زاۋرەش بەيسەمبايەۆا ءار مەكتەپتىڭ پەداگوگيكالىق ۇجىمىنىڭ باستى مىندەتى – ءاربىر بالانىڭ قاۋىپسىزدىگىن قامتاماسىز ەتۋ ەكەنىن، ول ءۇشىن كەشەندى ءتاسىل قاجەتتىگىن باسا ايتىپ ءوتتى. ايتالىق، مەكتەپتىڭ تەحنيكالىق قاۋىپسىزدىك قۇرالدارىمەن (كۇزەت، تۋرنيكەتتەر، بەينەكامەرالار) جابدىقتالۋى – بۇل الماتى قالاسى ءبىلىم باسقارماسى تاراپىنان بارلىق مەكتەپتەردە تولىق قامتاماسىز ەتىلگەنىن باسا بەلگىلەدى. سونىمەن قاتار، وقۋشىلارمەن جانە ولاردىڭ اتا-انالارىمەن دە جۇمىس جۇرگىزىلۋى قاجەت دەپ سانايدى زاۋرەش تۇرسىنبەك قىزى.
"قۇقىقتىق ءتارتىپتى قامتاماسىز ەتۋ ماقساتىندا مەكتەپ بوستاندىق اۋدانىنىڭ پب-مەن تىعىز ىنتىماقتاستىقتا جۇمىس ىستەيدى. ولار 6 "ءا" سىنىپ وقۋشىلارىنان قۇرالعان "جاس ساقشى" توبىن ۇيىمداستىردى. بيىلعى وقۋ جىلى بارىسىندا مەكتەپ ينسپەكتورلارى ۇلكەن جۇمىس اتقاردى. "جاس ساقشى" توبىنىڭ وقۋشىلارى باستاۋىش سىنىپ وقۋشىلارىمەن جۇمىس جۇرگىزىپ، ولاردى ساباقتان قالماۋعا، كەشىكپەۋگە، مەكتەپ ەرەجەلەرىنە باعىنۋعا، ءقاۋىپتى زاتتاردى اكەلمەۋگە، مەكتەپ مۇلكىن ساقتاۋعا، مەكتەپ وقۋشىلارى مەن قىزمەتكەرلەرىن قۇرمەتتەۋگە ۇيرەتەدى. بالالاردىڭ پوليسەي فورماسىن كيۋى – ءوز الدىنا، ولارعا پوليسەي بەينەسىنە ساي بولۋعا دەگەن جاۋاپكەرشىلىك جۇكتەيدى"، - دەيدى №70 مەكتەپ ديرەكتورى زاۋرەش بەيسەمبايەۆا.