سەبەبى، كورشىلەس ەلدەردە «ستەلس-وميكرون» شتامى تىركەلىپ جاتىر.
«ەگەمەن قازاقستان» باسىلىمىنا سۇحبات بەرگەن پرەمەر-مينيستردىڭ ورىنباسارى ەرالى توعجانوۆ وسىلاي دەدى، دەپ حابارلايدى Almaty-akshamy.kz
ۆيسە-پرەمەردىڭ ايتۋىنشا، ءقاۋىپ بارىنشا تومەندەگەن. بۇگىندە وسى ۆيرۋسپەن اۋىرۋدىڭ ەڭ ءتومەنگى دەڭگەيى ساقتالىپ تۇر، ياعني ءتاۋلىگىنە شامامەن 20 ناۋقاستاي عانا انىقتالىپ وتىر.
«ىندەت قارقىنىنىڭ ءباسەڭدەۋىنە قازاقستاندا عانا ەمەس، بۇكىل الەمدە جاعدايدىڭ تۇراقتانعانى ىقپال ەتىپ جاتىر. ارينە، ءبىز جاڭا «رەسيديۆتەردى» جوققا شىعارمايمىز، جاڭا شتامداردىڭ پايدا بولۋىن ەسكەرە وتىرىپ، ارقانى كەڭگە سالۋعا ءالى ەرتە ەكەنىن بىلەمىز. ەڭ باستىسى، ءبىز كوروناۆيرۋسپەن كۇرەسۋدى ۇيرەندىك. بۇگىندە قالىپتى ءومىرگە ورالۋدىڭ ۋاقىتى كەلدى دەپ ويلايمىن. ادامداردىڭ تىنىش ءومىر سۇرۋىنە، تولىققاندى جۇمىس ىستەۋىنە، قورىقپاي قارىم-قاتىناس جاساۋىنا مۇمكىندىك بولۋى كەرەك. وسىنداي مۇمكىندىكتەردى كەڭەيتۋ ماقساتىندا ءبىز ەڭ ماڭىزدى شەكتەۋلەردىڭ ءبىرىن جويدىق، كورشىلەس ءۇش ەلمەن: رەسەي، وزبەكستان ءجانە قىرعىزستانمەن قۇرلىق شەكاراسىن اشتىق. كوپتەگەن مەملەكەتپەن اۋە قاتىناسى قايتا جانداندى. 57 ەل ءۇشىن ۆيزاسىز رەجىم قالپىنا كەلتىرىلدى. بۇل رەتتە قازاقستانعا كىرەردە پتر-تەستىلەۋدى ءمىندەتتى شارت رەتىندە قالدىردىق. ويتكەنى بۇل – ەپيدەميالىق جاعدايدى باقىلاۋعا كومەكتەسەتىن شارالاردىڭ ءبىرى. سونىمەن قاتار ۇجىمداردا، ادامدار كوپ جينالاتىن جەرلەردە ماسكا تاعۋ تالابىن كۇءشىندە قالدىردىق. حالىق، نەگىزىنەن، وسىعان داعدىلانىپ تا قالدى. جاپونيا، قىتاي، سينگاپۋر سياقتى كوپتەگەن ەلدە پاندەميادان بۇرىن دا ماسكا تاعۋ رەجىمى قالىپتى جاعدايعا اينالعان، سەبەبى جۇقپالى اۋرۋلاردىڭ باسقا دا كوپتەگەن ءتۇرى بار»، - دەدى ەرالى توعجانوۆ.