قىلمىس جاساپ سوتتالعان ادامداردى جۇمىسپەن قامتۋ دا كۇن تارتىبىنەن تۇسپەگەن ماسەلە. جازاسىن وتەپ جاتقاندار دا بوس وتىرماي، كاسىپپەن اينالىسۋعا ءتيىس. تۇزەۋ مەكەمەلەرىنىڭ اۋماعىندا شاعىن ءوندىرىس ورىندارىن اشۋ، مىنە، وسى ءتۇيىنىن شەشۋگە ايتارلىقتاي ىقپال ەتۋدە.
ق ر ىشكى ىستەر مينيسترلىگى قىلمىستىق-اتقارۋ جۇيەسى كوميتەتىنە قاراستى №11 مەكەمەسىندەگى بوس عيماراتتاردىڭ بىرىندە «Azeris» جيھاز سەحى اشىلدى. اشىلۋ راسىمىنە الماتى قالاسى، الماتى جانە جەتىسۋ وبلىستارى بويىنشا قىلمىستىق-اتقارۋ جۇيەسى دەپارتامەنتىنىڭ سوتتالعانداردىڭ ەڭبەگىن ۇيىمداستىرۋ ءبولىمىنىڭ ينسپەكتورى ادىلەت پودپولكوۆنيگى ەرىك رايىمقۇلوۆ، «اتامەكەن» كاسىپكەرلەر پالاتاسىنىڭ بيزنەستى قورعاۋ جانە اكىمشىلىك توسقاۋىلداردى تومەندەتۋ ءبولىمىنىڭ باسشىسى ەركەبۇلان بەيمبەت جانە مەكەمە باستىعى ادىلەت پودپولكوۆنيگى ميراس تولۋبايەۆ قاتىستى.
– «Azeris» جيھاز جاساپ شىعاراتىن سەحىنا جازاسىن وتەپ جاتقان 8 ءجاسوسپىرىم جۇمىسقا تۇردى. ولارعا ەڭبەكاقى تولەنەدى. جازالى جاسوسپىرىمدەر اتالعان سەحتا زور ىنتامەن جۇمىس ىستەۋدە. ءبىر جاعىنان ءقازىر سۇرانىسقا يە جيھاز جاساۋ كاسىبىن مەڭگەرسە، ەكىنشى جاعىنان تابىس تاۋىپ، سوتپەن بەلگىلەنگەن شىعىندارىن وتەۋگە جانە از دا بولسا اتا-انالارى مەن باۋىرلارىنا قارجىلاي كومەك بەرۋگە مۇمكىندىك تۋعانىنا قۋانىشتى. سونىمەن قاتار، ەڭبەككە ارالاسا ءجۇرىپ شەبەرلىكتەرىن شىڭدايدى. بوستاندىققا شىققان سوڭ كاسىبى بويىنشا جۇمىسقا ورنالاسا الادى، – دەيدى №11 مەكەمەنىڭ سوتتالعانداردىڭ ەڭبەگىن ۇيىمداستىرۋ توبىنىڭ اعا ينسپەكتورى ادىلەت كاپيتانى تولۋناي نيزاموۆا.