جىل ۇلكەن ناتيجە بەردى، ەرەكشە قاجەتتىلىكتەرى بار بالالارعا ەرەكشە كوڭىل ءبولىندى
2022 جىلدىڭ 7 جەلتوقسانىندا ساعات 11.00-دە قازاقستان رەسپۋبليكاسى مەملەكەتتىك ورتالىق مۋزەيىندە بالالار جىلىنا ارنالعان «ۇلى دالا ۇرپاقتارى» رەسپۋبليكالىق فەستيۆالى وتەدى، دەپ حابارلايدى Almaty-akshamy.kz.
بيىل قازاقستان رەسپۋبليكاسى مەملەكەتتىك ورتالىق مۋزەيىندە بالالار جىلىنا ارنالعان شارالار وتە اۋقىمدى جانە ناتيجەلى بولدى. 2022 جىل بويى جاسوسپىرىمدەرگە ارنالعان باعدارلامالاردى، باستامالارى مەن يدەيالارىن قولداۋ، شىعارماشىلىق جانە ينتەللەكتۋالدى دامىتۋعا باعىتتالعان جارقىن ءىس-شارالار، اكسيالار، ءىس-شارالار، فەستيۆالدار، كۆەستتەر، سپارتاكيادالار وتكىزىلدى. ول ءبىزدىڭ رەسپۋبليكا بالالارىنىڭ مۋزىكا، ونەر، شىعارماشىلىق، قولونەر، سپورت، ت.ب. ءتۇرلى سالالار مەن باعىتتارداعى ۇلكەن جەتىستەرى مەن كورسەتكىشتەرىن پاش ەتتى. جىل ۇلكەن ناتيجە بەردى، ەرەكشە قاجەتتىلىكتەرى بار بالالارعا ەرەكشە كوڭىل ءبولىندى. مەكتەپ وقۋشىلارى، بالالار ۇيلەرى مەن مەكتەپ-ينتەرناتتارى اراسىندا ۇلتتىق ويىنداردان سپورتتىق تۋرنيرلەر، «مۋزەي كۋبوگى» سپارتاكياداسى، «دارىندى بالالار شەرۋى» رەسپۋبليكالىق فەستيۆالى، شەبەرلىك ساباقتار، حالىقارالىق، رەسپۋبليكالىق بالالار كورمەلەرى، ت.ب. ۇيىمداستىرىلدى. قازىرگى ۋاقىتتا مۋزەيدە بالالار كوۆوركينگ ورتالىعى جانە «ولكەتانۋ»، «بۇلاق»، «جاس ەكسكۋرسيا جۇرگىزۋشىسى» ۇيىرمەلەرى جۇمىس ىستەيدى.
2022 جىلدىڭ 7 جەلتوقسانىندا قازاقستان رەسپۋبليكاسى ورتالىق مۋزەيىندە بالالار جىلىنىڭ جابىلۋىنا ارنالعان فەستيۆال اياسىندا كەلەسى ءىس-شارالار جوسپارلانىپ وتىر:
- بالالار مۋزىكالىق ۇجىمدارىنىڭ قاتىسۋىمەن كونسەرت – «فيەستا» شوۋ-بالەتى، №5 وقۋشىلار ءۇيى، الماتى قالاسى وقۋشىلار سارايى، ك.بايسەيىتوۆا اتىنداعى دارىندى بالالارعا ارنالعان رەسپۋبليكالىق مامانداندىرىلعان مۋزىكالىق مەكتەپ-ينتەرناتى؛
- «ۇلى دالا ۇرپاقتارى» بالالار شىعارماشىلىعىنىڭ رەسپۋبليكالىق كورمە-بايقاۋىنىڭ اشىلۋى جانە بايقاۋ جەڭىمپازدارىن ماراپاتتاۋ. كورمەدە ەلىمىزدىڭ ءارتۇرلى وڭىرلەرىنەن (الماتى جانە ماڭعىستاۋ وبلىسى، الماتى، اقتاۋ، اتىراۋ، شىمكەنت، پەتروپاۆل، پاۆلودار، تاراز قالالارى) ىرىكتەلگەن دارىندى بالالاردىڭ 500-گە جۋىق شىعارماشىلىق جۇمىستارى ۇسىنىلادى. ونەر تۋىندىلارىنىڭ ىشىندە تالانتتى بالالاردىڭ (اعاش، مەتالل، پلاستماسسا، ماتا، ءجۇن، شي، ت.ب.) جۇمىستارىندا بەينەلەنگەن ءارتۇرلى تۇرلەر مەن تەحنيكالاردى، ماتەريالداردى، تاقىرىپتار مەن يدەيالاردى كورسەتەتىن كەسكىندەمە، گرافيكا، ساندىك-قولدانبالى ونەر بۇيىمدارى بار.
- قالانىڭ جالپى ءبىلىم بەرەتىن مەكتەپتەرى مەن مەكتەپ-ينتەرناتتارى اراسىندا ۇلتتىق ويىنداردان «مۋزەي كۋبوگى» قالالالىق سپارتاكياداسىنىڭ جەڭىمپازدارىن ماراپاتتاۋ (مۋزەيدەن كۋبوك ۇسىنىلادى)؛
- مۋزەيدىڭ ۇزدىك جاس ەكسكۋرسيا جۇرگىزۋشىسىن ماراپاتتاۋ – «جاس ەكسكۋرسيا جۇرگىزۋشىسى» ۇيىرمەسىنە قاتىسۋشىلار؛
- مەكتەپ وقۋشىلارى اراسىنداعى «مەنىڭ قالامداعى مۋزەي» رەسپۋبليكالىق عىلىمي جوبالار بايقاۋىنىڭ قورىتىندىسىن شىعارۋ.
بۇل كۇنى بالالار ن.ساس اتىنداعى ورىس مەملەكەتتىك اكادەميالىق بالالار مەن جاسوسپىرىمدەر تەاترىنىڭ قويىلىمدارىن («الدار كوسە» قويىلىمىن) جانە قۋىرشاق تەاترىن تاماشالاي الادى. سونىمەن قاتار، و.تاڭسىقبايەۆ اتىنداعى الماتى ساندىك-قولدانبالى ونەر كوللەدجىنەن جانە الماتى قالاسىنىڭ كوركەمسۋرەت ستۋديالارىنان، ونەردىڭ ءارتۇرلى باعىتتارى بويىنشا شەبەرلىك ساباقتارى ۇيىمداستىرىلادى.