فەدەراسيا باسشىسىنىڭ كانديداتۋراسىن كەزەكتى كونفەرەنسيادا داۋىس بەرگەن بارلىق 16 قاتىسۋشى ءبىراۋىزدان قولدادى
2 جەلتوقسان كۇنى استانادا قازاقستان دزيۋدو فەدەراسياسىنىڭ كەزەكتى كونفەرەنسياسى ءوتتى. شارادا وسى سپورت ءتۇرى بويىنشا ءبىر جىلدىڭ ىشىندە اتقارىلعان جۇمىستار قورىتىندىلانىپ، سالانىڭ ايماقتاعى جاي-كۇيى مەن دامۋىنىڭ بارىسى تۋرالى ەسەپ تىڭدالدى. كونفەرەنسيا بارىسىندا قازاقستان دزيۋدو فەدەراسياسىنىڭ پرەزيدەنتى لاۋازىمىنا «قازاقتەلەكوم» اق باسقارما ءتوراعاسى قۋانىشبەك ەسەكەيەۆ سايلاندى، دەپ حابارلايدى Almaty-akshamy.kz.
جيىنعا ق ر مادەنيەت جانە سپورت ۆيسە-مينيسترى سەرىك جاراسبايەۆ، ق ر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى سامات ەرعالييەۆ، قازاقستان ۇوك باس ديرەكتورى سەرىك قاسقاباسوۆ، ق ر دزيۋدو فەدەراسياسىنىڭ باس حاتشىسى اسحات جىتكەيەۆ، سونداي-اق وڭىرلىك دزيۋدو فەدەراسياسىنىڭ پرەزيدەنتتەرى مەن ۆيسە-پرەزيدەنتتەرى قاتىستى.
فەدەراسيا باسشىسىنىڭ كانديداتۋراسىن كەزەكتى كونفەرەنسيادا داۋىس بەرگەن بارلىق 16 قاتىسۋشى ءبىراۋىزدان قولدادى. وسى جاۋاپتى لاۋازىمعا لايىقتى دەپ «قازاقتەلەكوم» اق باسقارماسىنىڭ ءتوراعاسىن تاڭداۋ بەكەر ەمەس، قۋانىشبەك ەسەكەيەۆ ءوزىنىڭ نەگىزگى قىزمەتىنەن بولەك، وتاندىق سپورتپەن بايلانىستى بىرنەشە قۇرىلىمداردا ءتيىمدى قىزمەتىمەن كوزگە تۇسكەن.
ەستەرىڭىزگە سالا كەتەيىك، 2018 جىلى قازاقستاندا كيبەرسپورت رەسمي قىزمەتىن باستاعان ساتتەن بەرى ەسەكەيەۆ مىرزا Qazaq CyberSport Federation - قازاقستاندىق كيبەرسپورت فەدەراسياسىن باسقاردى. ونىڭ باسشىلىعىمەن وسى فەدەراسيا قىسقا مەرزىم ىشىندە تۇراقتى تۇردە وتەتىن ۇلتتىق تۋرنيرلەردىڭ تۇتاس جەلىسىن، سونىڭ ىشىندە قر-نىڭ كيبەرسپورتتان رەسمي بىرىنشىلىگى - قازاقستان رەسپۋبليكاسىنىڭ كۋبوگىن ورىستەتە الدى.
بۇدان باسقا، Qazaq CyberSport Federation قىسقا مەرزىمدە قازاقستاندىق جانە حالىقارالىق تۋرنيرلەردى وتكىزۋ ءۇشىن قاجەتتى ينفراقۇرىلىمدى قۇردى، ال وتاندىق كيبەراتلەتتەر مەن كوماندالار تاياۋ جانە الىس شەتەلدەردەن كەلگەن قارسىلاستارمەن باسەكەلەستىكتە ولاردىڭ شەشۋشى كەزەڭدەرىنە جولدامالار الا وتىرىپ، ەڭ بەدەلدى الەمدىك ءىس-شارالاردىڭ تۇراقتى قاتىسۋشىلارى بولىپ تابىلادى.
سونىمەن قاتار، «قازاقتەلەكوم» اق باسقارما باسشىسى «Qazaqstan Barysy» قازاق كۇرەسىن قولداۋ جانە دامىتۋ قوعامدىق قورىنىڭ قامقورشىلىق كەڭەسىنىڭ ءتوراعاسى بولىپ تابىلادى، ول وسى سپورت تۇرىنەن «قازاقستان بارىسى» نەگىزگى ءتۋرنيرىن ەلدە جانە شەتەلدە تانىمال ەتۋگە ەلەۋلى ۇلەسىن قوسىپ كەلەدى.
قۋانىشبەك ەسەكەيەۆ كونفەرەنسيا قاتىسۋشىلارىنا كورسەتكەن سەنىمى ءۇشىن العىس ءبىلدىرىپ، قازاقستان دزيۋدو تاريحىندا كوپتەگەن داڭقتى بەتتەردىڭ جازىلعانىن جانە ەلىمىزدە وسى وليمپيادالىق سپورت ءتۇرىنىڭ تانىمالدىعى قازاقستاندىقتاردىڭ حالىقارالىق ارەنالارداعى جەتىستىكتەرىن ساقتاپ قانا قويماي، كوبەيتۋگە مۇمكىندىك بەرەتىنىن اتاپ ءوتتى.
«بالۋاندىق ءداستۇرى جوعارى دەڭگەيدە قالىپتاسقان قازاقستان حالقى ءۇشىن دزيۋدو ونەرى دە جات ەمەس. بارشامىز بىلەمىز، ەلىمىزدە بالۋاندىق ونەردىڭ تاريحى تەرەڭ، ارىگە بارماي-اق، جاۋىرىنى جەرگە تيمەگەن قاجىمۇقان، بالۋان شولاق اتالارىمىزدان باستاپ، بۇگىندە الەمدىك دەڭگەيدە توپ جارعان تالاي تۇيە بالۋاندارىمىزدى اۋىز تولتىرىپ ايتا الامىز. بۇگىندە "قازاقستان بارىسىن" الەم بىلەدى، بۇل سالانىڭ ءسوزسىز كوشباسشىلارى، اتى اڭىزعا اينالعان شوقتىعى بيىك سپورتشىلارىمىزدىڭ توبى قالىپتاسقان. مىنە، وسى سەكىلدى قازاقستاندىق دزيۋدو ونەرىنىڭ دە جۇلدىزدارىن قالىپتاستىرۋىمىز كەرەك. وتاندىق دزيۋدو ونەرى ءالى دە ءوزىنىڭ مۇمكىندىكتەرىن تولىققاندى كورسەتكەن جوق، اۋىلداردا بەلدەسىپ وسكەن تالاي قاراكوزدەن چەمپيوندار جاسايمىز»، - دەپ اتاپ ءوتتى جاڭا سايلانعان قازاقستان دزيۋدو فەدەراسياسىنىڭ پرەزيدەنتى قۋانىشبەك ەسەكەيەۆ.
سونداي-اق، كونفەرەنسيا بارىسىندا ەل وڭىرلەرىندە دزيۋدونىڭ دامۋى، فەدەراسيانىڭ 2022 جىلى سپورتتىق ءىس-شارالاردى وتكىزۋى جانە ق ر ۇلتتىق قۇراماسىنىڭ 2024 جىلى فرانسيادا وتەتىن وليمپيادا ويىندارىنا دايىندىق بارىسى تۋرالى ەسەپتەر تىڭدالدى. اتاپ ايتۋ كەرەك، دزيۋدو - سپورتسۇيەر قاۋىم ءۇشىن، جاستار ءۇشىن اسا قىزىقتى ءارى تارتىمدى سپورت ءتۇرى. التى جىل بۇرىن الماتىدا دزيۋدو اكادەمياسى اشىلعان بولاتىن، وندا بولاشاعىنان ءۇمىت كۇتتىرەر جاس سپورتشىلار قازاقستان ۇلتتىق قۇراماسىنىڭ مۇشەلەرىمەن بىرگە جاتتىعۋىنا مۇمكىندىگى بار. بۇگىنگى تاڭدا قازاقستاندا دزيۋدومەن اينالىساتىن سپورتشىلار سانى 90 مىڭعا جۋىقتادى. بۇل كورسەتكىش كۇرت ۇلعايۋى ابدەن مۇمكىن، سەبەبى ءدال وسى سپورت تۇرىنە باۋليتىن سەكسيالار مەن كلۋبتار سانى ءبىر عانا استانانىڭ وزىندە ءبىر جىلدا 3 ەسە ارتقان، ياعني 2021 جىلى دزيۋدو كۇرەسىن دامىتاتىن 11 سپورت كلۋب جۇمىس ىستەسە، بۇگىندە مۇنداي ورتالىقتار سانى 35-كە جەتتى.