ەل پرەزيدەنتى قاسىم-جومارت توقايەۆتىڭ قازاقستان حالقىنا جولداۋى ەل كوڭىلىنە قونىمدى ءارى جاعىمدى جاڭالىقتارعا تولى بولدى. سونىڭ ىشىندەگى ەڭ ەرەكشە رەفورمالارىنىڭ ءبىرى − ۇلتتىق قوردان وسكەلەڭ ۇرپاققا كامەلەت جاسىنا تولعانعا دەيىن بولىنەتىن قارجىلىق ۇلەسى جايىندا. «ەل بولامىن دەسەڭ، بەسىگىڭدى تۇزە» دەگەن قاناتتى ءسوزدى بولاشاق جاستاردىڭ قولىندا ەكەنىن، ولارعا جاساعان تاربيەلىك جانە قارجىلىق ينۆەستيسيانىڭ بەكەرگە كەتپەيتىنىن اتالارىمىز ءبىلىپ ايتسا كەرەك.
ولاي بولسا، بۇگىنگى جاڭا رەفورما ونىڭ جارقىن دالەلى ىسپەتتەس. بالالارعا جاعداي جاساۋ، ولارعا كومەك قولىن سوزۋ، قولداۋ ۇلكەندەردىڭ مىندەتى، پارىزى. جاستايىنان قولداۋ كورىپ وسكەن بالا «ۇيادا نە كورسەڭ، ۇشقاندا سونى الارسىڭ» دەگەندەي، بولاشاقتا ەلىنە جاناشىر، قامقور بولاتىنى ءسوزسىز.
بۇل رەفورما − جاڭا قازاقستاندى قۇرۋداعى العىشارتتاردىڭ ءبىرى. ەل پرەزيدەنتىنىڭ بۇل كورەگەندىلىگى قولداۋعا تۇرارلىق قۇپتارلىق ءىس. مۇنداي ىستەردە جاڭا قازاقستانداعى جۇرت جاعدايىن جاقسارتاتىن جاقسى رەفورمالاردىڭ ورىندالۋى مەن جۇزەگە اسۋى قاداعالانۋى ءتيىس.
جاڭا قازاقستاندى قۇرۋ بالالاردان باستاۋ العانى كوڭىل قۋانتىپ قانا قويماي، بولاشاققا دەگەن سەنىمنىڭ قايتا جاندانۋىنا ۇلەس قوستى. ەندەشە، وسىنداي يگى ىستەرگە ۇيىتقى بولىپ وتىرعان پرەزيدەنتىمىزدىڭ جاڭا باستامالارىن قولداي وتىرىپ، ءارى قاراي دا جاڭا رەفورمالار كۇتەتىنىمىزدى ايتقىمىز كەلەدى.