بالالار دا قاتىگەز بوپ بارادى

بۋللينگ بالاباقشادان باستالادى.

الماتىداعى بالاباقشادا كىشكەنتاي بالانى ءوز قاتارلاستارى ۇرىپ، تەۋىپ تاستاعان. بالالاردى قاراۋسىز قالدىرعان بالاباقشا تاربيەشىسىنە قاتاڭ سوگىس جاريالاندى، دەپ حابارلايدى Almaty-akshamy.kz ZTB پابليگىنە سىلتەمە جاساپ.

بۇل ماسەلەگە بايلانىستى زارداپ شەككەن بالانىڭ اتا-اناسى ءوز شاعىمىن الەۋمەتتىك جەلىگە جاريالادى. وقيعا 21 اقپان كۇنى الماتىداعى №51 بالاباقشادا بولعان. كامەراعا بالالاردىڭ ءوز قۇرداسىن اياۋسىز ۇرىپ-سوققان ءساتى ءتۇسىپ قالعان.

ولار مۇنداي وقيعا بۇرىن وسى بالاباقشادا بولعانىن اتاپ ءوتتى. الماتى قالاسىنىڭ ءبىلىم باسقارماسى اتالعان جاعدايعا بايلانىستى تۇسىنىكتەمە بەردى.

«№51 بوبەكجاي-بالاباقشاسىنىڭ تاربيەشى وقىس وقيعا كەزىندە بالالارعا تۇسكى اس الىپ جاتقانىن، باسقا بولمەدە بولعانىن ايتتى. سوندىقتان بالالاردىڭ ىس-ارەكەتىن باقىلاي المادى. بالاباقشا اكىمشىلىگىنىڭ بۇيرىعىمەن ءتارتىپ بۇزۋشىلىقتار ءۇشىن تاربيەشىگە قاتاڭ سوگىس تۇرىندە تارتىپتىك جازا قولدانىلدى. باقىلاۋ جاساماعانى ءۇشىن بالاباقشا مەڭگەرۋشىسى دە تارتىپتىك جازاعا تارتىلدى»، - دەلىنگەن الماتى قالاسى ءبىلىم باسقارماسىنىڭ حابارلاماسىندا.