كۇز كەلىپ كەزەكتى وقۋ ماۋسىمى باستالدى. بارلىق وڭىرلەردە ءبىلىم كۇنى مەرەكەسىن اتاپ ءوتىپ جاتىر. وسى ورايدا مەن بارلىق سۇيكىمدى بۇلدىرشىندەرىمىزدى شىن جۇرەكتەن ءبىلىم كۇنىمەن قۇتتىقتايمىن! وسى قۋانىشتى ساتپەن بىرگە اسسامبلەياسىنىڭ «جومارت جان» جوباسى مەن «مەكتەپكە جول» اكسياسى اياسىندا قازاقستان كۇردتەرىنىڭ «باربانگ» اسسوسياسياسى اتقارعان ءبىرقاتار يگى ىستەر جايلى قىسقاشا ءبولىسۋدى ءجون كوردىم.
العاشقى شارا 17 شىلدە كۇنى جامبىل وبلىسىنىڭ قاراتاۋ اۋدانىنا قاراستى قاسقابۇلاق اۋىلىندا ءوتتى. بالالارعا ارناپ كونسەرت ۇيىمداستىرىلىپ، مەكتەپ سومكەلەرى مەن كەرەك-جاراقتار سىيعا تاراتىلدى.
وسى يگى باستاما جامبىل وبلىسىنىڭ گرودەكوۆو مەن جاس وركەن اۋىلدارىندا جانە تاراز قالاسىندا جالعاستى.
ايرىقشا اتاپ وتكىم كەلەتىنى – شۋ قالاسىنا سومكە مەن كەڭسە تاۋارلارىن جەتكىزىپ، بالالارعا تاراتۋ ءىسىن ءوزىم تىكەلەي ۇيىمداستىردىم.
26 تامىز كۇنى الماتى قالاسىنداعى دوستىق ۇيىندە قازاقستان كۇردتەرىنىڭ «باربانگ» اسسوسياسياسى مەن رەسپۋبليكالىق دوستىق ءۇيى بىرلەسىپ «مەكتەپكە جول» اكسياسىن وتكىزدى. شارا بارىسىندا بالالارعا سىيلىقتار بەرىلىپ، ارنايى داستارقان جايىلدى.
الماتى وبلىسىندا دا بۇل ءداستۇر جالعاسىن تاۋىپ ەسىك قالاسى مەن بورالداي، بەساعاش، قارابۇلاق، تۇيمەبايەۆ اۋىلدارىندا بۇلدىرشىندەرگە وقۋ قۇرالدارى تارتۋ ەتىلدى.
الماتى قالاسىندا بۇل اكسيا اسسامبلەياسىنىڭ قالالىق قۇرىلىمدارىمەن بىرلەسىپ قانا ەمەس، جەكە باستامالارىمىز ارقىلى دا جۇزەگە استى. 28 تامىز كۇنى اسسامبلەيا قۇرىلىمدارىمەن بىرگە الماتى قالاسىنداعى №207 مەكتەپتە «مەكتەپكە جول» شاراسى ءوتتى.
بۇل جيىنعا الماتى قالاسى اقساقالدار كەڭەسىنىڭ ءتوراعاسى بولات وسپانوۆ، قازاقستان ۇيعىرلارىنىڭ رەسپۋبليكالىق ەتنومادەني ورتالىعىنىڭ ءتوراعاسى دولكۋتناي الييەۆ، الماتى قالالىق وزبەك ەتنومادەني ورتالىعى ءتوراعاسىنىڭ ورىنباسارى ابدۋحاليل ۋرالبايەۆ جانە «اسسامبلەيا جاستارى» رقب الماتى قالالىق وكىلدىگىنىڭ ءتوراعا ورىنباسارى موحاممەدسارۋار ومار قاتىستى.
شارا بارىسىندا كوپتەگەن وتباسىلارعا قارجىلاي كومەك كورسەتىلدى. كەيبىر جانۇيالارعا مەكتەپ فورماسى مەن قىستىق كيىمدەر سىيعا تارتىلدى.
قازاقستان كۇردتەرىنىڭ «باربانگ» اسسوسياسياسى جىل سايىن اسسامبلەيامەن بىرگە بالالار مەن ولاردىڭ وتباسىنا قولداۋ كورسەتىپ كەلەدى. بۇل – ءاربىر بالانىڭ ءبىلىم الۋ جولىندا تەڭ مۇمكىندىككە يە بولۋىنا جاسالعان ناقتى قادام. ويتكەنى بالالار – بولاشاق، ءبىزدىڭ ەڭ اسىل ارمانىمىز بەن ۇلكەن ءۇمىتىمىزدىڭ يەلەرى.