مونيتورينگ كەزىندە زەينەتاقى مەن جاردەماقى الىپ جۇرگەن 100 مىڭ 103 ادامنىڭ تۇرعىلىقتى مەكەنجايى بويىنشا تىركەلمەگەنى انىقتالعان، دەپ حابارلايدى aqshamnews.kz
قازاقستاندا تۇرعىلىقتى تىركەۋى جوق ازاماتتارعا زەينەتاقى مەن جاردەماقىنى تولەۋ توقتاتىلۋى مۇمكىن. ەڭبەك جانە حالىقتى الەۋمەتتىك قورعاۋ مينيسترلىگى «الەۋمەتتىك كودەكسكە مىندەتتى الەۋمەتتىك ساقتاندىرۋ جانە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا قاتىستى رەتتەۋشى ساياساتتىڭ كونسۋلتاتيۆتىك قۇجاتىن ازىرلەدى.
الەۋمەتتىك كودەكسكە سايكەس، ەل اۋماعىندا تۇراقتى تۇراتىن قازاقستان ازاماتتارىنا، قانداستارعا جانە شەتەلدىكتەرگە زەينەتاقى مەن جاردەماقى تولەنەدى. الايدا مونيتورينگ كەزىندە زەينەتاقى مەن جاردەماقى الىپ جۇرگەن 100 مىڭ 103 ادامنىڭ تۇرعىلىقتى مەكەنجايى بويىنشا تىركەلمەگەنى انىقتالعان. ال 28 مىڭنان استام ادامنىڭ ۋاقىتشا تىركەۋى عانا بار.
وسىعان بايلانىستى مينيسترلىك مەملەكەتتىك ورگانداردىڭ اقپاراتتىق بازاسىندا تۇرعىلىقتى مەكەنجايى بويىنشا تىركەۋى جوق ازاماتتارعا زەينەتاقى مەن جاردەماقىنى تولەۋدى ۋاقىتشا توقتاتا تۇرۋدى ۇسىنىپ وتىر. ۆەدومستۆو بۇل شارا بيۋدجەت قاراجاتىن ۇنەمدەۋگە وڭ اسەر ەتەدى دەپ سانايدى.
سونىمەن قاتار ەڭبەك مينيسترلىگى ارنايى الەۋمەتتىك قىزمەتتەر كورسەتۋ ورتالىقتارىندا، مىسالى قارتتار ۇيىندە تۇراتىن جانە تۇرمەدە وتىرعان ادامداردىڭ زەينەتاقىسى مەن جاردەماقى تولەمىن ۋاقىتشا توقتاتۋدى جوسپارلاپ وتىر. ويتكەنى مەملەكەت ولاردى اسىراۋعا ونسىز دا كوپ اقشا جۇمسايدى، ونىڭ ۇستىنە زەينەتاقىسى مەن جاردەماقىسىن تولەيدى. ال بۇل مەملەكەتتىڭ بيۋدجەتىنە اۋىر سالماق سالادى دەيدى ۆەدومستۆو.
مينيسترلىك وسى نورمالاردى ۇسىنار الدىندا حالىقارالىق تاجىريبەنى زەرتتەگەن.
قۇجات «اشىق نقا» پورتالىندا جاريالانعان.