بالاباقشالارعا قاتىستى تالاپتار وزگەرەدى

ءمينيستردىڭ ايتۋىنشا، جەكە مەنشىك بالاباقشالاردىڭ ليسەنزياسىن قايتارۋ ءۇشىن زاڭعا وزگەرىس ەنگىزۋ كەرەك.

بەينەباقىلاۋ جۇيەسىن ورناتۋعا قاتىستى ناقتى تالاپ بولادى، دەپ حابارلايدى Almaty-akshamy.kz

ءبىلىم جانە عىلىم ءمينيسترى اسحات ايماعامبەتوۆ بالاباقشالارعا قاتىستى تالاپتاردىڭ وزگەرەتىنىن مالىمدەدى.

ءمينيستردىڭ ايتۋىنشا، جەكە مەنشىك بالاباقشالاردىڭ ليسەنزياسىن قايتارۋ ءۇشىن زاڭعا وزگەرىس ەنگىزۋ كەرەك.

«ول ءۇشىن ءبىز ماجىلىسكە، سەناتقا كەلۋىمىز كەرەك. وسى ەكى پالاتادا ءبارىن قورعاپ، دەپۋتاتتاردىڭ قولداۋىن الۋىمىز كەرەك. وعان ۋاقىت قاجەت. بۇعان دەيىن ءبىز بىرنەشە رەت وسى نورمانى ەنگىزۋگە تىرىسقانبىز. وكىنىشكە قاراي، ءالى كۇنگە دەيىن زاڭعا ەنگەن جوق. ءبىراق ءبىزدىڭ ۇستانىمىمىز ءبىر، ليسەنزيالاۋ قاجەت. مەيلى، مەملەكەتتىك بولسىن، مەيلى، جەكە مەنشىك بولسىن، بارلىق بالاباقشاعا بىردەي تالاپ قويۋ قاجەت»، - دەدى ايماعامبەتوۆ.

مينيستر بالاباقشالارعا ليسەنزيا بەرۋ ماسەلەسىن اياعىنا دەيىن جەتكىزۋگە مۇددەلى.

بۇدان بولەك، تاعى ءبىر بۇيرىققا وزگەرىس ەنگىزىلىپ جاتىر.

«ءبىز 122ء-شى بۇيرىققا وزگەرىستەردى ەنگىزىلىپ جاتىرمىز. ول وزگەرىستەر وسى ايدا ەنۋى كەرەك. وندا ءبىز مەملەكەتتىك تاپسىرىس الاتىن بالاباقشالارعا تالاپتار قوياتىن بولامىز. بىرىنشىدەن، سوندا ىستەيتىن تاربيەشىلەردىڭ بىلىكتىلىگىنە تالاپ قويىلادى. ولاردىڭ مىندەتتى تۇردە ءتيىستى ءبىلىمى بولۋى كەرەك. ەكىنشىدەن، سانى بويىنشا، بىزدە تيپتىك شتات بار. سول شتاتقا سايكەستىك بولۋى شارت»، - دەپ اتاپ كورسەتتى ايماعامبەتوۆ.

سونىمەن قاتار، بەينەباقىلاۋ جۇيەسىن ورناتۋعا قاتىستى ناقتى تالاپ بولادى. ءبىلىم بەرۋ مەن ءتارتىپ ماسەلەسى دە ەسكەرىلەدى.