قالامىزدا قوعامدىق كولىكتەردىڭ جول-كولىك وقيعاسى ۇشىراۋى جيىلەپ كەتتى.
جىل باسىنان بەرى اۆتوبۋستاردىڭ قاتىسۋىمەن 89 كولىك اپاتى بولدى. سالدارىنان ءتورت ادام قازا تاپتى، دەپ حابارلايدى Almaty-akshamy.kz قالالىق پوليسيا دەپارتامەنتىنىڭ باسپا ءسوز قىزمەتىنە سىلتەمە جاساپ.
«بيىلعى جىلدىڭ ءۇش ايىندا مەگاپوليستە 89 جول-كولىك اپاتى بولدى. سالدارىنان 4 ادام قازا تاۋىپ، 105 ادام ءتۇرلى دەنە جاراقاتىن الدى»، - دەپ حابارلادى قالالىق پوليسيا دەپارتامەنتىنىڭ باسپا ءسوز قىزمەتى.
الماتى قالالىق پوليسيا دەپارتامەنتىنىڭ رەسمي اقپاراتىنا سايكەس، 2021 جىلى قوعامدىق كولىك جۇرگىزۋشىلەرىنىڭ كىناسىنەن 264 جول-كولىك وقيعاسى ورىن الىپ، سونىڭ سالدارىنان 9 ادام قازا تاۋىپ، تاعى 344 ادام جاراقات العان.
سونداي-اق جىل باسىنان بەرى قالا جولدارىندا موپەدتەردىڭ قاتىسۋىمەن 62 جول-كولىك وقيعاسى تىركەلدى. 72 ادام زارداپ شەكتى. جول قوزعالىسى ەرەجەلەرىن بۇزعانى ءۇشىن موپەد تىزگىندەگەن 38 ادام اكىمشىلىك جاۋاپقا تارتىلدى. ايتا كەتەيىك، D ساناتىنداعى جۇرگىزۋشى كۋالىگى 25 جاسقا تولعان جانە كەمىندە 5 جىل، ونىڭ ىشىندە D1 ساناتى بويىنشا كولىك جۇرگىزۋ ءوتىلى 3 جىلدان كەم ەمەس ادامدارعا بەرىلەدى.
الماتى قالالىق ءىىد كولىك جۇرگىزۋشىلەرىنە جول ەرەجەسىن ساقتاپ، جىلدامدىقتى شەكتەن تىس اسىرماۋدى ەسكە سالدى.