بالاباقشالار كەزەڭ-كەزەڭىمەن ليسەنزيالانادى – اسحات ايماعامبەتوۆ

بالاباقشالاردىڭ 80%-ى باقىلاۋدان وتە الماعان

ق ر وقۋ-اعارتۋ ءميينسترى اسحات ايماعامبەتوۆ مەكتەپكە دەيىنگى ۇيىمداردى ليسەنزيالاۋ قالاي جۇرگىزىلەتىنىن ءتۇسىندىردى، دەپ حابارلايدى Almaty-akshamy.kz قازاقپارات-قا سىلتەمە جاساپ.

«2011 جىلدان بەرى بالاباقشالار جۇمىسىن باستاۋ ءۇشىن ليسەنزيا المايدى، تەك قانا جۇمىسىن باستاعانى تۋرالى حابارلاما بەرەدى. 2021 جىلعا دەيىن ولار مەملەكەتتىك باقىلاۋ ياعني اتتەستاتتاۋدان دا تولىعىمەن بوساتىلعان. ليسەنزيادان بوساتۋ تۋرالى شەشىم جەكەمەنشىك سەكتوردىڭ جىلدام دامۋىنا، بالاباقشامەن قامتۋدى 99 پايىزعا جەتكىزۋگە اسەر ەتتى. ءبىراق، سونىمەن قاتار، ول ساپانى قامتاماسىز ەتۋگە دە تەرىس اسەرىن تيگىزدى»، - دەپ اتاپ ءوتتى مينيستر ۇكىمەتتىڭ بۇگىنگى وتىرىسىندا. 

مينيستر سوڭعى كەزدەرى بالاباقشالاردىڭ جۇمىسى بويىنشا اتا-انالاردىڭ ارىزدارى جيىلەپ كەتكەنىن ايتتى. 

«وسىعان قاراي، 2021 جىلى مەملەكەتتىك باقىلاۋدى قايتا ەنگىزدىك. ونىڭ ناتيجەلەرى دە پروبلەمالاردى كورسەتىپ وتىر، بالاباقشالاردىڭ 80%-ى باقىلاۋدان وتە المادى. ولار اتتەستاسيادان وتپەۋىنە بايلانىستى، فورمالدى تۇردە جابىلادى، ءبىراق ليسەنزيا بويىنشا تالاپ بولماعانان كەيىن سول عيماراتتا، سول پروبلەمالارمەن قايتا اشىلىپ جۇمىسىن جالعاستىرا بەرەدى. وسىعان وراي، بالالاردىڭ قاۋىپسىزدىگىن قامتاماسىز ەتۋ، تاربيە ساپاسىن ارتتىرۋ، ماقساتىندا بالاباقشالاردى كەزەڭ-كەزەڭمەن ليسەنزيالاۋ ەنگىزىلەدى»، - دەدى ا. ايماعامبەتوۆ.

سايكەسىنشە، جاڭادان اشىلاتىن بالاباقشالار ەندى ليسەنزيا الىپ، بارلىق تالاپتارعا ساي ەكەنىن كورسەتىپ جۇمىسىن باستايتىن بولادى. ال ءقازىر جۇمىس ىستەپ جاتقان بالاباقشالار، تاۋەكەلدەردى باسقارۋ جۇيەسى نەگىزىندە كەزەڭ-كەزەڭمەن ليسەنزيالانادى.