تۇركسىب اۋدانى توتەنشە جاعدايلار باسقارماسى 19 قازان – قۇتقارۋشىلار كۇنىن مەرەكەلەۋ قارساڭىندا «اشىق ەسىك» كۇنىن وتكىزدى.
كاسىپتىك مەرەكە قارساڭىندا №11 ورتكە ءسوندىرۋ-قۇتقارۋ قىزمەتى ءبولىمىنىڭ بازاسىندا ۇيىمداستىرىلعان سالتاناتتى جيىندا سالانىڭ جەتەكشى ماماندارى جيىلعان قاۋىمعا جەتىجۇتتىڭ ءبىرى – ءورت اپاتىمەن بەتپە-بەت كەلىپ، كوكالا تۇتىنگە كومىلسە دە، الاۋمەن ارپالىساتىن جالىندى جانكەشتى ماماندىقتىڭ قىر-سىرىن اشىپ بەرگەندەي. ماماندار جيىلعان جاسوسپىرىمدەرگە توتەنشە جاعدايلار قىزمەتشىلەرىن دايارلايتىن وقۋ ورىندارى جايلى اقپارات تا بەرىلدى. اپات ايتىپ كەلمەس، وسى كۇنگە دەيىن ءورت ءسوندىرۋشى-قۇتقارۋشى ماماندار سول «ءتىلسىز جاۋ» اتالاتىن دۇلەي اپاتتان قانشاما ادامدى اراشالاپ، سونشاما قوعام مەن مەملەكەت مۇلكىن قۇتقارىپ قالعانىن ستاتيستيكا سايراپ ايتىپ بەرەدى.
جاۋىنگەر ماماندىقتىڭ جاۋاپكەرشىلىگى قات-قابات، قيىندىعى مەن قىزىعى قاتار جۇرەدى. توڭىرەكتىڭ بەلسەندى تۇرعىندارى، بالاباقشا مەن مەكتەپ وقۋشىلارى بۇل كۇنى ءورت ءسوندىرۋ-قۇتقارۋ قىزمەتىنىڭ قۇرال جابدىقتارى، ءورت ءسوندىرۋ تەحنيكالارى مەن سايماندارىمەن تانىستىرىلدى. «ارۋاق رازى بولماي، ءتىرى بايماس» دەگەن، 1989 جىلعى ماۋسىمدا «الماتى-2» تەمىرجول بەكەتىندە بولعان الاپات ءورت اپاتى كەزىندە ەرلىكپەن قازا تاپقان ءورت ءسوندىرۋشى قىزمەتشىلەردىڭ رۋحىنا باعىشتالعان ەسكەرتكىش-بەلگىگە گۇلشوعىرىن قويۋ ءراسىمى ءوتتى. ءورت ءسوندىرۋ-قۇتقارۋ قىزمەتىنىڭ ارداگەرلەرى وتكەن قىزمەتتىك شاقتى ەسكە الىپ، جاستارعا اق تىلەگىن ارنادى.
كاسىبي مەرەكە قارساڭىندا ۇيىمداستىرىلعان بۇل شارانىڭ ماقساتى – قوعام مەن ەلدىڭ قاۋىپسىزدىگىنە ولشەۋسىز ۇلەس قوسىپ وتىرعان ءورت ءسوندىرۋ-قۇتقارۋ قىزمەتىنە وسكەلەڭ ۇرپاقتىڭ نازارىن اۋدارۋ. ءورت ءسوندىرۋشى-قۇتقارۋشى ماماندىعىنىڭ ءقادىرىن ارتتىرۋ قاجەت. جاس ورەندەردىڭ قاراپايىم ءورت قاۋىپسىزدىگى ەرەجەسىنە ءمان بەرىپ، ونىڭ نەگىزىنە كوڭىل ءبولۋىن قالاپ، وقۋشىلارعا وسى سالادا قولدانىلاتىن ارناۋلى قۇرال-جابدىقتاردى كوزبەن كورىپ، قولمەن ۇستاۋعا جاعداي جاسالدى.
«ءورت – ءتىلسىز جاۋ ەكەنى ءسوزسىز. وسىعان وراي، قاراپايىم ءورت قاۋىپسىزدىگى ەرەجەسىن، قۇتقارۋ داعدىسىن بالاباقشادان باستاپ ۇيرەتسەك، كەرەمەت ەمەس پە. وسىنى ويلاستىردىق. مەكتەپ وقۋشىلارى اراسىندا بۇل ماماندىققا قىزىعۋشىلىق از ەمەس. وسى ءبىر قىزىعۋشىلىق كاسىپتىك داعدىعا اينالىپ، ولاردىڭ ءبىرازىنىڭ بولاشاقتا ءبىزدىڭ قاتارىمىزعا قوسىلۋىنا يگى اسەر ەتەر دەگەن ويدامىز. ءيا، بۇل – وڭاي كاسىپ ەمەس، قيىندىعى مەن قىزىعى قاتار جۇرەتىن ماماندىق. قىزىعى دەگەندە، «العىسپەن ەر كوگەرەر» قازاقتىڭ دانالىق ءسوزىن ايتامىن. قىزمەتىمەن ءقادىرلى بولىپ، ەل-جۇرتتىڭ العىسىن الىپ جۇرگەنگە نە جەتسىن»، – دەيدى ق ر توتەنشە جاعدايلار مينيسترلىگىنىڭ ارداگەرى، قورداعى (زاپاستاعى) ورتكە قارسى قىزمەت پودپولكوۆنيگى گۇلشات داۋرەنبەكوۆا.