استانا پروكۋراتۋراسىنىڭ مالىمەتىنە سايكەس دەمالىس كەزەڭىندە جەكەمەنشىك بالاباقشالاردىڭ قىزمەتكەرلەرى ورىنداردى ساقتاۋ ءۇشىن اتا-انالاردان نەگىزسىز اقى العان. قاداعالاۋ ورگانىنىڭ ارالاسۋىنان كەيىن شارتتار قولدانىستاعى زاڭناماعا سايكەستەندىرىلدى. بۇنى مەكتەپكە دەيىنگى مەكەمەلەرگە تەكسەرىس جۇرگىزۋ كەزىندە انىقتاعان، دەپ حابارلايدى aqshamnews.kz.
سونداي-اق بالاباقشادا جالاقىسى زاڭسىز ەسەپتەلگەن جالعان قىزمەتكەرلەر جۇمىسقا ورنالاستىرىلعانى بەلگىلى بولدى. انىقتالعان جىمقىرۋ فاكتىلەرى بويىنشا قىلمىستىق كودەكستىڭ 189-بابى نەگىزىندە سوتقا دەيىنگى تەرگەۋ باستالدى.
«جەكەمەنشىك بالاباقشالاردا مەرزىمى وتكەن دارىلىك زاتتار ساقتالعان. سونىمەن قاتار قۇرامىندا سىناپ بار شامداردى ساقتاۋ جانە جويۋ كەزىندەگى بۇزۋشىلىقتار انىقتالدى. قاداعالاۋ اكتىلەرى بويىنشا بۇزۋشىلىقتاردى دەرەۋ جويۋ ءۇشىن شارالار قابىلداندى، كىنالى تۇلعالار جاۋاپقا تارتىلدى»، - دەپ مالىمدەدى استانا قالالىق پروكۋراتۋراسى.