الماتىداعى وقۋشىلار سارايىندا قالا اكىمىنىڭ ورىنباسارى اسەم ءنۇسىپوۆا ءبىلىم مەن عىلىمدا، ونەر مەن سپورتتا ۇزدىك جەتىستىكتەرگە جەتكەن وقۋشىلارمەن كەزدەستى. بۇل ءىس-شارا مەملەكەت باسشىسىنىڭ تاپسىرماسىمەن جاريالانعان «قازاقستان بالالارى» ونكۇندىگى اياسىندا ءوتىپ جاتقان «بالا ءۇنى» اتتى تاقىرىپتىق كۇنىنە ورايلاستىرىلدى.
كەزدەسۋگە الەم ەلدەرىندە ەل نامىسىن قورعاپ جۇرگەن دارىندى بالالار جينالدى. ولاردىڭ قاتارىندا جاۋتىكوۆ اتىنداعى وليمپيادا، ازيا-تىنىق مۇحيتى ماتەماتيكالىق وليمپياداسى، «جىبەك جولى» ينتەللەكتۋالدى جارىستارىنىڭ جۇلدەگەرلەرى، ءتىپتى حيۋستون، بەيجىڭ، ماسكەۋ، تاشكەنت سەكىلدى ءىرى قالالاردا وتكەن جارىستاردا توپ جارىپ، بىرنەشە رەت جەڭىس تۇعىرىنان كورىنگەندەر دە بار. سونداي-اق، جيىنعا سوزگە شەشەن جاس وراتارلار، قالامى جۇيرىك جاس جازۋشىلار، ونەرتاپقىش روبوتوتەحنيكتەر، اۋەزدى انشى-ۆوكاليستەر مەن شىمىر سپورتشىلار دا قاتىستى.
«سىزدەر – الماتىنىڭ زياتكەرلىك الەۋەتىسىزدەر. ءبىز ارقايسىڭىزبەن ماقتانامىز. سىزدەردىڭ بۇگىنگى جەتىستىكتەرىڭىز – ەرتەڭگى ەلدىڭ تىرەگى بولماق. بۇل تەك سىزدەردىڭ عانا ەمەس، اتا-انالارىڭىز بەن ۇستازدارىڭىزدىڭ دا ەڭبەگى. ءبىز سىزدەرگە جايلى جاعداي جاساۋدى ءارى قاراي جالعاستىرا بەرەمىز. سىزدەردىڭ ۇسىنىستاردى مىندەتتى تۇردە ەلەپ-ەسكەرەتىن بولامىز. كەلە جاتقان مەرەكەلەرىڭىز قۇتتى بولسىن! جازعى دەمالىستارىڭىز جاقسى ءوتسىن!»، – دەدى قالا اكىمىنىڭ ورىنباسارى اسەم ءنۇسىپوۆا.
كەزدەسۋ وتە جىلى، ەركىن فورماتتا ءوتتى. وقۋشىلار ءوز جوبالارىن تانىستىرىپ، ءبىلىم بەرۋ، عىلىم مەن قالانىڭ دامۋى تۋرالى ۇسىنىستارىن ورتاعا سالدى.
ايتا كەتەيىك، الماتىدا بالالارعا ارنالعان قوسىمشا ءبىلىم بەرۋ كەڭ دامىپ كەلەدى. ءقازىردىڭ وزىندە بۇل باعىتتا 141 ۇيىم جۇمىس ىستەيدى: 7 وقۋشىلار ءۇيى، 8 مۋزىكا مەكتەبى، ونەر مەكتەبى مەن 122 جەكە ستۋديا بار. جاقىندا كۇردەلى جوندەۋدەن وتكەن وقۋشىلار سارايى بالالارعا ەسىك اشتى. مۇندا زەرتحانالار، كوۆوركينگتەر، ەلىمىزدەگى ەڭ ءىرى وبسەرۆاتوريا ورنالاسقان. سونداي-اق الاتاۋ مەن ناۋرىزباي اۋداندارىندا ەكى زاماناۋي ورتالىق اشىلىپ، «سامعاۋ» ورتالىعى مەن «جاس قانات»، «اينابۇلاق»، «سايالى» شاعىناۋداندارىندا جاڭا شىعارماشىلىق ۇيىرمەلەر ىسكە قوسىلادى. بۇل – بالالاردىڭ جان-جاقتى دامۋىنا جاسالعان ناقتى قادام.
