باكۋدەگى تۇركى ساۋدا ورتالىعىندا قازاقستاننىڭ ءازىربايجانداعى ەلشىلىگىنىڭ ۇيىمداستىرۋىمەن قازاقستاننىڭ ساۋدا پاۆيلونىنىڭ سالتاناتتى اشىلۋى ءوتتى، دەپ حابارلايدى aqshamnews.kz
ءىس-شاراعا قازاقستاننىڭ ءازىربايجانداعى ەلشىسى ءالىم بايەل، قىرعىزستان مەن تۇرىكمەنستان ەلشىلەرى، ءازىربايجاننىڭ شاعىن جانە ورتا بيزنەستى دامىتۋ اگەنتتىگىنىڭ (KOBIA) ءتوراعاسى ورحان مامەدوۆ، ءقازاقستان-ازىربايجان ىسكەرلىك كەڭەسىنىڭ تەڭ ءتوراعاسى داۋرەن بيموۆ، تۇركى ساۋدا ورتالىعىنىڭ ديرەكتورى يىلماز وكۋكلۋ، پارلامەنت دەپۋتاتتارى مەن جۋرناليستەر قاتىستى.
ەلشى ءا. بايەل ءوز سوزىندە: «بۇگىندە جاھاندىق گەوساياسي جانە گەوەكونوميكالىق ترانسفورماسيا جاعدايىندا ءوڭىرىمىزدىڭ ءرولىنىڭ ارتىپ كەلە جاتقانىن كورىپ وتىرمىز. تۇركى الەمى حالىقارالىق ارەنادا ماڭىزدى ويىنشى بولا الادى جانە بولۋعا ءتيىس. ارينە، كەز كەلگەن وداق، كەز كەلگەن ينتەگراسيا بەرىك ەكونوميكالىق ىرگەتاسقا نەگىزدەلۋى كەرەك. وسى تۇرعىدان العاندا، مۇنداي باستامالار وتە قۋانتادى. ونىڭ ۇستىنە، ولار تومەننەن جوعارى قاراي دامۋدا — ياعني كوبىنەسە ءبىزدىڭ كاسىپكەرلەردىڭ ۇسىنىستارى نەگىزىندە جانە ءتيىستى قۇرىلىمداردىڭ قولداۋى ارقاسىندا»، – دەدى.
تۇركى ساۋدا ورتالىعى تمۇ ەلدەرىنىڭ كاسىپكەرلەرىنە ءوز ونىمدەرىن تانىستىرۋ، ىسكەرلىك بايلانىس ورناتۋ جانە حالىقارالىق نارىقتارعا شىعۋ ءۇشىن تۇراقتى الاڭ ۇسىنادى. پاۆيلوندار تمۇ ەلدەرىنىڭ ۇلتتىق تاۋارلارىن، قولونەر بۇيىمدارىن جانە گاسترونومياسىن پاش ەتەتىن مادەنيەت جانە ساۋدا الاڭدارى رەتىندە قۇرىلعان. ءار ەلدىڭ مادەنيەتىن كورسەتەتىن ءداستۇرلى ديزاين مەن اتموسفەراعا ەرەكشە كوڭىل بولىنگەن.
و. مامەدوۆ اتالعان ساۋدا الاڭدارىنىڭ تۇركى ەلدەرى اراسىنداعى ەكونوميكالىق ىنتىماقتاستىق جانە تاۋارلار مەن قىزمەتتەر الماسۋداعى ماڭىزدىلىعىن اتاپ ءوتتى. كاسىپكەر د. بيموۆ وسى باستاما بەرىپ وتىرعان مۇمكىندىكتەرگە نازار اۋدارىپ، ادەتتە كاسىپكەرلەر ەڭسەرۋى كەرەك كەدەرگىلەردىڭ كوپ بولىگى بۇدان ءارى ساۋدا پاۆيلوندارى ارقىلى رەتتەلەتىنىن ايتتى.
ءىس-شارا بارىسىندا تۇركى حالىقتارىنىڭ ءداستۇرلى تاعامدارى ۇسىنىلعان ۇلتتىق سارىندا بەزەندىرىلگەن كيىز ۇيلەر دە تانىستىرىلدى.
سونىمەن قاتار، اتالعان ءىس-شارا اياسىنداعى كونسەرتتىك باعدارلامادا قازاق بىلىمگەرلەرىنىڭ ورىنداۋىنداعى نۇرعيسا تىلەندييەۆتىڭ شىعارمالارى مەن كورنەكتى كومپوزيتوردىڭ 100 جىلدىعىنا ارنالعان پرەزەنتاسيا ۇسىنىلدى.