2025 جىلعى 23 ساۋىردە ازەربايجاننىڭ جەتەكشى زياتكەرلىك ورتالىعى سانالاتىن حالىقارالىق قاتىناستاردى تالداۋ ورتالىعىندا (حقتو) قازاقستان-ازەربايجان ساراپتامالىق كەڭەسىنىڭ ءتورتىنشى وتىرىسى ءوتتى. ءىس-شاراعا قازاقستاننىڭ ازەربايجانداعى ەلشىسى ءالىم بايەل، حقتو ءتوراعاسى ەلشى فاريد شافييەۆ، قازاقستاننىڭ ستراتەگيالىق زەرتتەۋلەر ينستيتۋتىنىڭ ديرەكتورى ەركىن تۇقىموۆ، دەپۋتاتتار، قازاقستان مەن ازەربايجاننىڭ جەتەكشى ساراپشىلارى، سونداي-اق ب ا ق وكىلدەرى قاتىستى.
ەلشى ءا. بايەل ءوز سوزىندە قازاقستان-ازەربايجان قارىم-قاتىناستارىنىڭ جاڭا دەڭگەيگە شىققانىن ەرەكشە اتاپ ءوتتى، بۇعان سوڭعى كەزەڭدە قازاقستان پرەزيدەنتى قاسىم-جومارت توقايەۆتىڭ ازەربايجانعا جانە ازەربايجان پرەزيدەنتى يلحام الييەۆتىڭ قازاقستانعا جاساعان ءبىرقاتار ساپارلارى دالەل.
ءا. بايەل بيىل قازاقستاننىڭ ازەربايجانعا بيدايدىڭ ەڭ ءىرى جەتكىزۋشىسى بولعانىن حابارلادى. قازاقستان بيدايى 2025 جىلدىڭ ءبىرىنشى توقسانىنىڭ قورىتىندىسى بويىنشا ازەربايجان يمپورتىنىڭ جالپى كولەمىنىڭ 80% قۇرادى. بۇل ەكى ەلدىڭ ءتيىستى قۇرىلىمدارىنىڭ ءوزارا ارەكەتتەسۋىنىڭ ارقاسىندا مۇمكىن بولدى. اتاپ ايتقاندا، وتكەن جىلى قازاقستاننىڭ باكۋداعى ەلشىلىگىندە ءوزارا ساۋدانى ۇلعايتۋعا باعىتتالعان اۋىل شارۋاشىلىعى فورۋمى ۇيىمداستىرىلعان بولاتىن.
سونداي-اق، ديپلومات اعىمداعى جىلدىڭ ناۋرىز ايىندا باكۋ قالاسىندا ەكىجاقتى قاتىناستار تاريحىندا العاش رەت 23 قازاقستاندىق ۋنيۆەرسيتەتتىڭ قاتىسۋىمەن قازاقستاننىڭ جوعارى ءبىلىم كۇندەرى وتكىزىلگەنىن اتاپ ءوتتى. ەكى مەملەكەتتىڭ جوعارى وقۋ ورىندارى اراسىندا 40 مەموراندۋمعا قول قويىلدى.
ءا. بايەل سونىمەن قاتار حالىقارالىق ۇيىمدار اياسىنداعى قازاقستان مەن ازەربايجاننىڭ جەمىستى ىنتىماقتاستىعىن اتاپ ءوتتى. اتاپ ايتقاندا، ازەربايجان اوىسشك ءتوراعاسى بولدى، سونداي-اق بيىل استانادا ورنالاسقان ازىق-تۇلىك قاۋىپسىزدىگى جونىندەگى يسلام ۇيىمىنا كىرۋگە دايىندالۋدا. قازاقستان ءوز كەزەگىندە باكۋداعى يىۇ ەڭبەك ورتالىعىنا قوسىلۋعا دايىن. تۇركى ينتەگراسياسى قازاقستان ءۇشىن دە، ازەربايجان ءۇشىن دە باسىمدىق بولىپ قالا بەرمەك. ەلشىنىڭ ايتۋىنشا، ەلدەرىمىز جالپى تۇركى ىنتىماقتاستىعىنىڭ لوكوموتيۆىنە اينالدى. كاسپييدىڭ ەكى جاعىندا ورنالاسقان، ازەربايجان مەن قازاقستان ەۋرازيانىڭ كولىك-لوگيستيكالىق ارحيتەكتۋراسىندا دا شەشۋشى ءرول ويناۋدا.
فاريد شافييەۆ ءوز سوزىندە ساراپشىلار دەڭگەيىندەگى تۇراقتى كەزدەسۋلەردىڭ جانە اكادەميالىق دەرەككوزدەردى قالىپتاستىرۋ بويىنشا بىرلەسكەن جۇمىستىڭ ماڭىزدىلىعىن اتاپ ءوتتى. سونىمەن قاتار، ول بولاشاقتا ساراپتامالىق كەڭەس وتىرىستارى ازەربايجان مەن قازاقستاننىڭ جوعارى وقۋ ورىندارىنىڭ قاتىسۋىمەن وتكىزىلۋى مۇمكىن ەكەنىن اتاپ ءوتتى.
ەركىن تۇقىموۆ ءوز سوزىندە ازەربايجان قازاقستاننىڭ وڭتۇستىك كاۆكازداعى نەگىزگى سەرىكتەسى ەكەنىن بەلگىلەي وتىرىپ، سوڭعى جىلدارى ەكى ەل اراسىنداعى قاتىناستاردىڭ جاندانعانىن اتاپ ءوتتى. ول بۇل سەرىكتەستىك ورتاق ستراتەگيالىق كوزقاراس پەن ءوزارا قولداۋعا نەگىزدەلگەنىن ايتتى. قسزي ديرەكتورى سونداي-اق ساراپتامالىق كەڭەستىڭ كەلەسى وتىرىستارىن قازاقستان مەن ازەربايجاننىڭ ءتۇرلى قالالارىندا وتكىزۋدى ۇسىندى.
كەزدەسۋ اياسىندا ەنەرگەتيكالىق، كولىكتىك-لوگيستيكالىق ىنتىماقتاستىق، عىلىمي-ساراپتامالىق كووپەراسيا، مادەني-گۋمانيتارلىق بايلانىستار جانە جاستار ساياساتى ماسەلەلەرى بويىنشا ساراپشىلاردىڭ پىكىرلەرى مەن ۇسىنىستارى تالقىلاندى.