الماتى قالاسىنىڭ الاتاۋ اۋدانىنداعى كوميۋنيتي ورتالىعىندا «سىبايلاس جەمقورلىققا قارسى ۆولونتەرلىك» جوباسىنىڭ ءفرونت-وفيسى اشىلدى. جوبا الماتى قالاسى اكىمدىگى مەن ق ر سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتىنىڭ قولداۋىمەن جۇزەگە اسىرىلىپ كەلەدى، دەپ حابارلايدى aqshamnews.kz
اشىلۋ راسىمىنە ق ر سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتى پريەۆەنسيا باسقارماسىنىڭ باسشىسى قانات سالىمبايەۆ، بەلسەندى ۆولونتەرلەر مەن قوعام وكىلدەرى قاتىستى.
سالتاناتتى شارا بارىسىندا قانات سالىمبايەۆ جوبا اياسىندا اتقارىلعان جۇمىستارعا توقتالىپ، ونىڭ نەگىزگى باعىتتارىن ناقتىلاپ ءوتتى. سونىمەن قاتار، ۆولونتەرلەرگە تاجىريبەلىك كەڭەستەر بەرىپ، باستامالارىنا ساتتىلىك تىلەدى.
«بۇل فرونت-وفيستەر جاستاردىڭ سىبايلاس جەمقورلىققا قارسى مادەنيەتىن قالىپتاستىرۋعا، ازاماتتىق جاۋاپكەرشىلىگىن ارتتىرۋعا ارنالعان ماڭىزدى الاڭ. ۆولونتەرلەر – قوعامدىق سانانى جاڭارتاتىن، وزگەرىس اكەلەتىن جاڭا بۋىن وكىلدەرى»، – دەدى قانات سالىمبايەۆ.
ايتا كەتەيىك، جوبا ىسكە قوسىلعاننان بەرى الماتى قالاسىنداعى كوميۋنيتي ورتالىقتارىندا، جوعارى وقۋ ورىندارىندا 200-دەن استام ۆولونتەر بىرىگىپ، 10-نان استام سەمينار، دوڭگەلەك ۇستەل جانە اقپاراتتىق كەزدەسۋ وتكىزگەن. اتالعان شارالار ارقىلى 1 000-نان استام ازامات قامتىلدى. ۆولونتەرلەر قوعاممەن تىعىز بايلانىستا جۇمىس ىستەپ، تەك اقپاراتتىق-اعارتۋشىلىق شارالارمەن شەكتەلمەي، ناقتى ناتيجەلەرگە دە قول جەتكىزۋدە.
ماسەلەن، جوبا باستالعالى بەرى جالپى سوماسى 2،3 ملرد تەڭگەگە باعالانعان ارتىق باعامەن ساتىپ الۋ ارەكەتتەرى انىقتالىپ، ءتيىستى ورگانداردىڭ نازارىنا ۇسىنىلدى. بۇل – ۆولونتەرلەردىڭ سىبايلاس جەمقورلىقتىڭ الدىن الۋعا باعىتتالعان ناقتى ۇلەسىنىڭ ايقىن كورىنىسى.
ۇيىمداستىرۋشىلاردىڭ ايتۋىنشا، مۇنداي فرونت-وفيستەر الداعى ۋاقىتتا قالانىڭ بارلىق اۋدانىندا اشىلادى. بۇل باستاما جاستاردىڭ بەلسەندىلىگىن ارتتىرىپ قانا قويماي، قوعامدا ادىلدىك، اشىقتىق پەن سەنىم اتموسفەراسىن قالىپتاستىرۋعا سەرپىن بەرمەك.