24 ءساۋىر كۇنى جەتىسۋ اۋدانىنداعى ورتالىق زيراتتا ارنايى سەنبىلىك وتكىزىلدى. ءىس-شارا رەسپۋبليكا كولەمىندەگى «تازا قازاقستان» اكسياسى اياسىندا ءارى ۇلى جەڭىستىڭ 80 جىلدىعىنا وراي ۇيىمداستىرىلدى، دەپ حابارلايدى aqshamnews.kz.
الماتى قالاسىنىڭ جاستار ساياساتى باسقارماسىنىڭ قولداۋىمەن وتكەن سەنبىلىك ەكولوگيالىق مادەنيەت پەن ەلگە دەگەن سۇيىسپەنشىلىكتى قالىپتاستىرۋدى باستى ماقسات ەتتى. ءىس-شاراعا قالالىق كوميۋنيتي-ورتالىقتاردىڭ ەرىكتىلەرىن قامتىعان جۇزگە جۋىق ەكوبەلسەندى مەن قالا جاستارى اتسالىستى. جالپى اكسياعا 200 ادام، 7 ارنايى تەحنيكا قاتىستىرىلىپ، 50 تەكشە مەتر قوقىس شىعارىلدى.
سەنبىلىككە قاتىسۋشىلار ورتالىق زيرات اۋماعىن تازارتا وتىرىپ، ەل تاريحىنا ەلەۋلى ۇلكەس قوسقان اعابۋىن وكىلدەرىنىڭ رۋحىنا تاعزىم ەتتى.
– بۇل شارانىڭ نەگىزگى ماقساتى – جاستار اراسىندا ەكولوگيالىق مادەنيەتتى قالىپتاستىرۋ جانە ەل تاريحىنا، ۇلى وتان سوعىسىنا قاتىسقان ارداگەرلەردىڭ رۋحىنا دەگەن قۇرمەتتى نىعايتۋ. جاقىندا عانا ەلوردادا مەملەكەت باسشىسىنىڭ قاتىسۋىمەن وتكەن «تازا قازاقستان» ەكوفەستيۆالىنە قاتىسقان بولاتىنمىن. بۇگىنگى شارا – سونىڭ جالعاسى ىسپەتتى. بۇل باستاما بۇگىندە ۇلكەن قوزعالىسقا اينالدى. وعان قالا تۇرعىندارى، اسىرەسە جاستار بەلسەندى قاتىسىپ كەلەدى، – دەيدى الماتى قالاسى جەتىسۋ كوميۋنيتي ورتالىعىنىڭ جەتەكشىسى اكەجان كەڭەس.
«ريتۋالدىق قىزمەتتەر كومبيناتىنىڭ» باس ينجەنەرى ەسبول ءنۇسىپوۆ جاستاردىڭ كورسەتىپ وتىرعان كومەگىن كەز كەلگەن ۋاقىتتا جوعارى باعالايتىنىن ايتتى:
– بۇگىنگى اكسيانىڭ تاربيەلىك ءمانى زور. جاس ۇرپاق بەيبىت اسپان ءۇشىن جانىن قيعان باتىرلاردى ۇمىتپاي، قۇرمەتتەۋى ءتيىس. ءبىز ەرىكتىلەردىڭ ەڭبەگىنە العىس بىلدىرەمىز جانە ەستەلىك ورىندارىندا تازالىق پەن ءتارتىپتى قولداۋعا ءاردايىم شاقىرامىز.
بوستاندىق اۋداندىق كوميۋنيتي-ورتالىعىنىڭ جەتەكشىسى توعجان داۋىل ەرىكتىلەر قاتارىنداعى قالا جوو ستۋدەنتتەرى تازالىقتى ساقتاۋ شارالارىنا ۇنەمى بەلسەنە قاتىساتىنىن جانە بۇل جولى دا مەموريالدى رەتكە كەلتىرۋ باستاماسىنا بىردەن ءۇن قوسقانىن اتاپ ءوتتى.
ۇيىمداستىرۋشىلاردىڭ ايتۋىنشا، مۇنداي شارالار ارقىلى جاستار بويىندا تابيعاتقا دەگەن جاناشىرلىقتى، ەل تاريحىنا دەگەن قۇرمەتتى سىڭىرەدى. سەنبىلىك بارىسىندا زيرات اۋماعى مەن وعان ىرگەلەس سكۆەر تازارتىلىپ، قورشاعان ورتا قالپىنا كەلتىرىلدى.