ازەربايجان استاناسىندا قازاقستان رەسپۋبليكاسى ەلشىلىگىنىڭ ۇيىمداستىرۋىمەن وتان قورعاۋشى كۇنىنە ارنالعان سالتاناتتى قابىلداۋ ءوتتى. ءىس-شاراعا ديپلوماتيالىق كورپۋستىڭ، ازەربايجاننىڭ اسكەري باسشىلىعىنىڭ، زيالى قاۋىم مەن ساراپشىلار قاۋىمداستىعىنىڭ وكىلدەرى، سونداي-اق ازەربايجاندا تۇراتىن وتانداستار قاتىستى.
قابىلداۋ 7 مامىر — قازاقستان رەسپۋبليكاسى قارۋلى كۇشتەرىنىڭ قۇرىلعان كۇنىنە ورايلاستىرىلدى. بۇل كۇن جاۋىنگەرلىك باتىلدىق، وتانسۇيگىشتىك پەن وتاندى قورعاۋ سيمۆولىنا اينالدى.
قازاقستاننىڭ ازەربايجانداعى ەلشىسى ءالىم بايەل قۇتتىقتاۋ سوزىندە ەكى مەملەكەت اراسىنداعى قاتىناستار بارلىق باعىتتار بويىنشا قارقىندى دامىپ كەلە جاتقانىن اتاپ ءوتتى. «قازاقستان مەن ازەربايجان — ستراتەگيالىق سەرىكتەستەر مەن وداقتاستار. ىنتىماقتاستىعىمىزدىڭ ساياسي جانە قورعانىس سالالارىندا تەرەڭدەي تۇسكەنى قۋانتادى. حالىقتارىمىز اراسىنداعى باۋىرلاستىق بايلانىستارى بولاشاقتا تەك نىعايا تۇسەتىنىنە سەنىمدىمىن»، - دەدى ديپلومات.
ءا. بايەل سوڭعى كەزەڭدە ەكى ەل قورعانىس ۆەدومستۆولارى بىرلەسكەن ءىس-شارالار سانىنىڭ ەداۋىر وسكەنىن اتاپ ءوتتى. ماسەلەن، 2023 جىلى «حازري» بىرلەسكەن اسكەري-تەڭىز جاتتىعۋلارى، ال 2024 جىلى «بىرلەستىك» جانە «التىن قىران» بىرلەسكەن ەكىجاقتى وقۋ جاتتىعۋلارى وتكىزىلدى. سونداي-اق، ەلشى قاتىسۋشىلارعا قازاقستان بىتىمگەرلەرىنىڭ جەتىستىكتەرى تۋرالى ايتىپ بەردى. ونىڭ ايتۋىنشا، 2024 جىلى بۇۇ-نىڭ گولان بيىكتىكتەرىندەگى ميسسياسى قۇرامىندا قازاقستان كونتينگەنتىنىڭ دەربەس ورنالاستىرىلۋى قازاقستان بىتىمگەرلەرى دايىندىعىنىڭ جوعارى دەڭگەيىنىڭ ايعاعى بولدى.
ازەربايجانداعى قازاقستاننىڭ اسكەري اتتاشەسى راۋان كەمالي قازاقستان قارۋلى كۇشتەرىن جاڭعىرتۋ جانە زاماناۋي اسكەري تەحنيكامەن جابدىقتاۋ جونىندە ايتىپ بەردى.
ءىس-شارانىڭ قۇرمەتتى قوناعى ازەربايجان رەسپۋبليكاسى اسكەري-تەڭىز كۇشتەرىنىڭ قولباسشىسى، 1-دارەجەلى كاپيتان شاحين مامەدوۆ بولدى. ول ەكى ەل اراسىنداعى اسكەري-تەحنيكالىق ىنتىماقتاستىق دەڭگەيىن جوعارى باعالاپ، قازاق ارىپتەستەرىنە سەنىمدى سەرىكتەستىك ءۇشىن العىسىن ءبىلدىردى.
قابىلداۋ اياسىندا قوناقتارعا قازاقستان ارمياسىنىڭ تاريحى مەن زاماناۋي كەلبەتىنە ارنالعان مۋلتيمەديالىق ەكسپوزيسيا ۇسىنىلدى. سونداي-اق، ءىس-شاراعا قاتىسۋشىلار ۇلتتىق تاعامداردان ءدام تاتىپ، كونسەرتتىك باعدارلامانى تاماشالادى.
جاس ۇرپاققا ەرەكشە كوڭىل ءبولىندى: ءىس-شارا ۇلتتىق سانانى قالىپتاستىرۋداعى ارميانىڭ ءرولىن كورسەتەتىن پاتريوتتىق پرەزەنتاسيالارمەن سۇيەمەلدەندى.
قازاقستاننان تىس جەرلەردە وتان قورعاۋشىلار كۇنىن مەرەكەلەۋ مادەني بايلانىستار مەن دياسپورامەن قارىم-قاتىناستاردى نىعايتۋعا عانا ەمەس، سونىمەن قاتار ەلىمىزدىڭ جاھاندىق قاۋىپسىزدىكتىڭ سەنىمدى سەرىكتەسى جانە بەلسەندى قاتىسۋشىسى رەتىندە حالىقارالىق ارەنادا وڭ ءيميدجىن قالىپتاستىرۋعا ىقپال ەتەدى.