كاراچي قالاسىندا قازاقستان مەن پاكىستان اراسىنداعى بيزنەس-فورۋم ءوتتى. ءىس-شاراعا ەكى ەلدىڭ 500-دەن استام بيزنەس جانە مەملەكەتتىك قۇرىلىم وكىلدەرى قاتىستى.
فورۋمعا ناقتى مامىلەلەر مەن ۇزاق مەرزىمدى ارىپتەستىككە باعىتتالعان كاسىپكەرلەردىڭ بەلسەندىلىگى ەرەكشە سەرپىن بەردى. ءىس-شارا اياسىندا بىرنەشە كوممەرسيالىق كەلىسىمدەرگە قول قويىلدى. سونىڭ ىشىندە قازاقستاندىق Optima Development كومپانياسى مەن پاكىستاندىق Friesland Campina Engro اراسىندا جالپى سوماسى 10 ملن اقش دوللارىن قۇرايتىن كەلىسىمشارت جاسالدى. قۇجات قازاقستانعا ىرىمشىك، يوگۋرت جانە كونديتەرلىك ونىمدەر وندىرىسىنە قولدانىلاتىن سۋسىزداندىرىلعان ءسۇت مايىن جەتكىزۋدى كوزدەيدى.
«بۇل پاكىستانمەن وسىنداي اۋقىمداعى العاشقى كەلىسىمدەردىڭ ءبىرى. بۇل ءبىر رەتتىك تاۋار جەتكىزۋ ەمەس، ۇزاق مەرزىمدى ءارى ستراتەگيالىق سەرىكتەستىكتىڭ باستاۋى دەپ ەسەپتەيمىز. 240 ميلليون حالقى بار پاكىستان – قازاقستان ءۇشىن زور ەكسپورتتىق الەۋەتكە يە ەل»، - دەدى Optima Development كومپانياسىنىڭ باس ديرەكتورى جانات باسان ۇلى.
قازاقستان رەسپۋبليكاسى ساۋدا جانە ينتەگراسيا مينيسترلىگىنە قاراستى QazTrade ساۋدا ساياساتىن دامىتۋ ورتالىعىنىڭ دەرەكتەرىنە سايكەس، 2023–2024 جىلدارى قازاقستان مەن پاكىستان اراسىنداعى تاۋار اينالىمى 2،1%-عا ءوسىپ، 53،6 ملن دوللارعا جەتكەن. قازاقستاننان پاكىستانعا ەكسپورت كولەمى 2،1 ەسەگە ارتىپ، 11،8 ملن دوللارعا دەيىن وسكەن. ەكسپورتتىڭ نەگىزگى بولىگىن اۋىل شارۋاشىلىعى ونىمدەرى: پياز، سارىمساق، زىعىر تۇقىمى، بۇرشاق تۇقىمداستار جانە مەتالل كونسترۋكسيالار قۇرايدى. ال پاكىستاننان يمپورت كولەمى 41،9 ملن اقش دوللارىن قۇرادى. ونىڭ ىشىندە سيترۋس جەمىستەرى، دارىلىك پرەپاراتتار مەن توقىما بۇيىمدارى بار.
سونداي-اق، فورۋم اياسىندا قازاقستانعا كاراچي مەن گۆادار پورتتارىنا قولجەتىمدىلىكتى قامتاماسىز ەتەتىن ترانزيتتىك ساۋدا تۋرالى كەلىسىمگە قول قويىلدى. بۇل قۇجات ەكى ەل اراسىنداعى جاڭا كولىك-لوگيستيكالىق باعىتتاردى دامىتۋعا جانە ەكونوميكالىق بايلانىستى نىعايتۋعا نەگىز قالايدى.