بانكنوتالاردىڭ تارالىمى 5 ميلليون دانامەن شەكتەلگەن.
9 مامىردا ۇلى جەڭىستىڭ 80 جىلدىعىنا ارناپ نومينالى 1 000 تەڭگەلىك مەرەيتويلىق بانكنوتا اينالىمعا شىعادى، دەپ حابارلايدى aqshamnews.kz ۇلتتىق بانككە سىلتەمە جاساپ.
مەرەيتويلىق بانكنوتانىڭ ديزاينى:
بانكنوتالاردىڭ ءتۇسى – قوڭىر-سارعىلت.
الدىڭعى بەتىندە:
28 گۆاردياشى-پانفيلوۆشىلار اتىنداعى ساياباعى داڭق مەموريالى بەينەلەنگەن؛
ميكرو-وپتيكالىق قورعانىس جولاعى. بانكنوتا بۇرىشىن وزگەرتكەن كەزدە جولاقتا تەرەڭدىكتىڭ، كولەمنىڭ جانە جىلتىردىڭ ءۇش ولشەمدى اسەرى، سونداي-اق ماڭگىلىك الاۋ مەن ۇشىپ بارا جاتقان تىرنالار كورىنەدى. تىرنالار سيلۋەتى – جاقسىلىق پەن ءۇمىتتىڭ بەينەسى.
ەكىنشى بەتىندە:
تاريحي مۇراعاتتىق سۋرەتتەردىڭ ۇزىندىلەرىمەن قازاقستان كارتاسى بەينەلەنگەن؛
ەرلىك، تاباندىلىق پەن باتىرلىقتىڭ سيمۆولى رەتىندە وتان سوعىسى وردەنى كورسەتىلگەن.
نومينالى 1 000 تەڭگەلىك مەرەيتويلىق بانكنوتا ءوز قۇنىنا ساي قازاقستان رەسپۋبليكاسىنىڭ بۇكىل اۋماعىندا تولەمنىڭ بارلىق ءتۇرى بويىنشا قابىلداۋعا جارامدى. سونداي-اق بانكتىك شوتقا سالۋعا، رەسپۋبليكانىڭ بارلىق بانكىندە اۋدارۋعا جانە ۇساقتالۋعا مىندەتتى.