قازاقستان رەسپۋبليكاسى ەنەرگەتيكا ۆيسە-مينيسترى الىبەك جاماۋوۆ «بەينەۋ-بوزوي-شىمكەنت» ماگيسترالدىق گاز قۇبىرىنىڭ ەكىنشى جەلىسىن سالۋ جوسپارلانعان ۋچاسكەگە جۇمىس ساپارىمەن باردى. ساپار ماقساتى — ەنەرگەتيكا سالاسىنداعى ەلىمىزدىڭ ءىرى ينفراقۇرىلىمدىق جوبالارىنىڭ ءبىرى بويىنشا قۇرىلىس كەزەڭىنە دايىندىق بارىسىن باقىلاۋ.
ساپار بارىسىندا ۆيسە-مينيستر قۇرىلىس-مونتاج جۇمىستارىنىڭ كەزەڭدەرىمەن تانىسىپ، مەردىگەر ۇيىمداردىڭ وكىلدەرىمەن جۇمىس كەڭەسىن وتكىزدى. سونداي-اق، ولارمەن لوگيستيكا، تەحنيكامەن قامتاماسىز ەتۋ جانە جەرگىلىكتى اتقارۋشى ورگاندارمەن ۇيلەستىرۋ ماسەلەلەرىن تالقىلادى. ەرەكشە نازار جۇمىس كەستەسىنىڭ ساقتالۋىنا، قۇرىلىس ساپاسىنا جانە نىسانداردىڭ تەحنيكالىق دايىندىعىنا اۋدارىلدى.
"بەينەۋ-بوزوي-شىمكەنت" گاز قۇبىرىنىڭ ەكىنشى جەلىسىن ىسكە اسىرۋ — ەلىمىزدىڭ ەنەرگەتيكالىق قاۋىپسىزدىگى ءۇشىن ستراتەگيالىق ماڭىزعا يە جانە وتىن-ەنەرگەتيكا كەشەنىنىڭ ورنىقتى دامۋى سالاسىنداعى مەملەكەتتىك ساياساتتىڭ باسىم باعىتى»، — دەپ اتاپ ءوتتى ق ر ەنەرگەتيكا ۆيسە-مينيسترى الىبەك جاماۋوۆ.
جوبا ەكى كەزەڭدە جۇزەگە اسىرىلادى. ناتيجەسىندە گاز قۇبىرىنىڭ وتكىزۋ قابىلەتى جىلىنا 15 ملرد تەكشە مەترگە دەيىن ارتادى. بۇل ەلىمىزدىڭ وڭتۇستىك، ورتالىق جانە سولتۇستىك وڭىرلەرىن تۇراقتى گازبەن قامتاماسىز ەتۋگە مۇمكىندىك بەرەدى.
ايتا كەتەيىك، جوبا قازاقستان رەسپۋبليكاسى ۇكىمەتى مەن كاتار مەملەكەتى ۇكىمەتى اراسىنداعى كەلىسىم اياسىندا كاتارلىق ينۆەستورمەن بىرلەسىپ جۇزەگە اسىرىلاتىن بولادى. كاتارلىق ينۆەستورعا قازاقستان تاراپىنان جانە QazaqGaz كومپانياسى ارقىلى جوبانى ءساتتى ىسكە اسىرۋ ءۇشىن بارلىق قاجەتتى جاعداي جاسالعان.