1945 جىلدىڭ 30 ساۋىرىندە قان مايداننىڭ ءتۇيىنىنىڭ دالەلى بولىپ، رەيحستاگتا جەڭىس تۋى جەلبىرەپ تۇردى. فاشيستىك گەرمانيانىڭ باس عيماراتىنا ءبىرىنشى بولىپ جەڭىس تۋىن تىككەن – قازاق وفيسەرى راقىمجان قوشقاربايەۆ بولاتىن.
راقىمجان قوشقاربايەۆ مايدانعا 18 جاسىندا اتتانىپ، ودەر مەن شپرەە وزەندەرىن باسىپ الۋعا قاتىسقان. بەرلين ءۇشىن بولعان شەشۋشى شايقاستا ونىڭ ۆزۆودى العى شەپكە ورنالاستى. ولار الدىمەن كورولدىك الاڭعا، «گيمملەر ۇيىنە» جەتەدى. مۇندا لەيتەنانت قوشقاربايەۆقا تاريحي ماڭىزى بار – رەيحستاگ عيماراتىنىڭ ۇستىنە قىزىل تۋدى كوتەرۋ تۋرالى بۇيرىق بەرىلەدى. «گيمملەر ۇيىنەن» رەيحستاگقا دەيىنگى قاشىقتىق بار بولعانى 300 مەتر. ءبىراق بۇل اشىق الاڭ بولعاندىقتان، جان-جاقتان اتقىلاعان وقتاردان قورعانۋ كەرەك ەدى. وسى قاشىقتىقتى جاۋىنگەر گريگوريي بۋلاتوۆپەن 7،5 ساعاتتا ءجۇرىپ ءوتىپ، 30 ءساۋىر كۇنى ساعات 18:30-دا رەيحستاگتىڭ الدىنا قىزىل تۋ تىگىلدى.
ەرەن ەرلىگى ءۇشىن ءۇشىن راقىمجان قوشقاربايەۆ قىزىل تۋ وردەنىمەن، 1-دارەجەلى وتان سوعىسى وردەندەرىمەن، جاۋىنگەرلىك قىزىل تۋ جانە «بەرليندى العانى ءۇشىن» مەدالدارىمەن ماراپاتتالعان. 1999 جىلى «حالىق قاھارمانى» اتاعى بەرىلدى.
سوعىستان كەيىن راقىمجان قوشقاربايەۆ الماتى قالاسى حالىق دەپۋتاتتارى كەڭەسىنىڭ دەپۋتاتى بولىپ سايلاندى. ول سوعىس ارداگەرلەرى كوميتەتى مەن كەڭەس-گەرمان دوستىق قوعامىنىڭ قازاق بولىمشەسى ءتورالقاسىنىڭ مۇشەسى بولدى. سوعىستاعى ەستەلىكتەرى تۋرالى «جەڭىس تۋى»، «داۋىل: 1410-شى كۇن» كىتاپتارىن جازدى.