باعدادتا قازاقستان پاۆيلونى اشىلدى
قازاق كيىز ءۇيى يراكتىڭ جىل سايىنعى «Iraqi Tourism–2023» حالىقارالىق تۋريستىك فورۋمىنىڭ ناعىز سانىنە اينالدى
قازاقستاننىڭ يوردانياداعى ەلشىلىگى «Hala Kazakhstan» تۋريستىك كومپانياسىمەن بىرلەسىپ، باعداد قالاسىندا قازاقستان پاۆيلونىن اشتى، دەپ حابارلايدى Almaty-akshamy.kz ءسىم باسپا ءسوز قىزمەتىنە سىلتەمە جاساپ.
ەلىمىزدىڭ ستەندى جانە ءداستۇرلى قازاق كيىز ءۇيى يراكتىڭ جىل سايىنعى «Iraqi Tourism–2023» حالىقارالىق تۋريستىك فورۋمىنىڭ ناعىز سانىنە اينالدى. پاۆيلونعا يراكتىڭ مادەنيەت، تۋريزم جانە كونە زاتتار ءمينيسترى احمەد فاكاك ءال-بادراني كىرىپ-شىقتى.
فورۋم اياسىندا يراكتىڭ تۋريستىك كومپانيالارىمەن ەكىجاقتى كەزدەسۋلەر ءوتتى، سونداي-اق ەلىمىزدىڭ تۋريستىك جانە ينۆەستيسيالىق الەۋەتى تانىستىرىلدى. اتالعان ءىس-شاراعا قازاقستاننىڭ قاتىسۋى يراك ازاماتتارىنىڭ اسا قىزىعۋشىلىعىن تۋدىردى.
سونىمەن قاتار ەلشىلىك قىزمەتكەرلەرىنىڭ باعدادقا ساپارى شەڭبەرىندە جەرگىلىكتى ساۋدا پالاتاسىنىڭ پرەزيدەنتى فاريس ال-حامداديمەن جانە يراك تەمىر جولدارىنىڭ باس ديرەكتورى يۋنيس حالەد دجاۆاديمەن كەزدەسۋلەر وتكىزىلدى. كەلىسسوزدەر بارىسىندا قازاقستان-يراك ساۋدا-ەكونوميكالىق، كولىك جانە ينۆەستيسيالىق ىنتىماقتاستىعىن دامىتۋ پەرسپەكتيۆالارى، سونداي-اق تاۋار اينالىمىن ۇلعايتۋعا جانە بىرلەسكەن جوبالاردى ىسكە اسىرۋعا باعىتتالعان ناقتى قادامدار تالقىلاندى.
يراك تاراپى ءتيىستى شارتتىق-قۇقىقتىق بازانى قالىپتاستىرۋعا مۇددەلىلىگىن جانە ەكىجاقتى قاتىناستاردى ودان ءارى جانداندىرۋعا دايىندىعىن ءبىلدىردى.