باعانى قايتا قاراماساق، وندا جاقىندا مۇناي ونىمدەرىنىڭ تاپشىلىعىنا تاپ بولامىز - ۇكىمەت باسشىسى

ۇكىمەت باسشىسى ءاليحان سمايىلوۆ جانار-جاعارماي باعاسىنا قاتىستى مالىمدەمە جاسادى.

كەشە ەنەرگەتيكا مينيسترلىگى جانار-جاعارماي باعاسىنىڭ كوتەرىلەتىنىن ايتقان بولاتىن. وسى شەشىمگە قاتىستى ۇكىمەت باسشىسى ءاليحان سمايىلوۆ پىكىر ءبىلدىردى، دەپ حابارلايدى Almaty-akshamy.kz.

«وسىنداي شەشىم قابىلداۋعا ءماجبۇر بولدىق. ياعني، باعانى قايتا قاراماساق، وندا جاقىندا مۇناي ونىمدەرىنىڭ تاپشىلىعىنا تاپ بولامىز. بىزدە ديزەل وتىنىن قولدانۋ جىلىنا ءبىر ادامعا 300 ليتردەن كەلەدى. ال رەسەيدە بۇل كورسەتكىش - 225 ليتر، قىرعىزستاندا - 90 جانە وزبەكستاندا - 44 ليتر. مەملەكەت جانار-جاعارماي ءوندىرىسىن ۇلعايتۋ بويىنشا ءتيىستى شارالار قابىلداۋدا. سوڭعى بەس جىلدا بەنزين ءوندىرىسى 70 پايىزعا، ال ديزەل وتىنى 33 پايىزعا ءوستى»، - دەدى ءاليحان سمايىلوۆ ۇكىمەت وتىرىسىنان كەيىن ب ا ق وكىلدەرىنە مالىمدەمە جاساي تۇرىپ.

ونىڭ ايتۋىنشا، مۇناي كومپانيالارى جوعارى قارقىنمەن جۇمىس ىستەپ جاتىر.

«دەگەنمەن جانار-جاعارماي نارىعىندا تاپشىلىق ماسەلەسى ازايار ەمەس. قازاقستاندىق ارزان جانار-جاعارماي ءارتۇرلى جولمەن كورشى ەلدەرگە كەتىپ جاتىر. وسىلايشا وتاندىق ارزان جانار-جاعارماي ءوزىمىزدىڭ مۇددەسىنە ەمەس، كورشى مەملەكەتتەردىڭ ەكونوميكاسىنا جۇمىس ىستەپ وتىر»، - دەيدى پرەمەر-مينيستر.