تالقىلاۋدىڭ نەگىزگى تاقىرىبى يننوۆاسيالىق تەحنولوگيالار سالاسىن دامىتۋدىڭ زاماناۋي جاھاندىق سىن-قاتەرلەرى بولماق.
الماتىدا Digital Almaty 2023 سيفرلىق فورۋمى باستالدى، دەپ حابارلايدى Almaty-akshamy.kz.
الماتى قالاسىنىڭ اكىمى فورۋمعا قاتىسۋشىلاردى قۇتتىقتادى.
«قۇرمەتتى فورۋمعا قاتىسۋشىلار! سىزدەردى Digital Almaty بەسىنشى مەرەيتويلىق فورۋمىنىڭ اشىلۋىمەن قۇتتىقتايمىن. سيفرلىق ترانسفورماسيا ماسەلەلەرىنىڭ وزەكتىلىگىن اسىرا باعالاۋ مۇمكىن ەمەس. الەم جىلدام وزگەرۋدە، كەڭ تارالعان سيفرلاندىرۋ وسى پروگرەستىڭ نەگىزگى قوزعالتقىشتارىنىڭ ءبىرى بولىپ تابىلادى»، – دەدى ەربولات دوسايەۆ.
فورۋمنىڭ مازمۇندى كۇن ءتارتىبى ءبىزدىڭ كوز الدىمىزدا بولىپ جاتقان تەكتونيكالىق وزگەرىستەردىڭ كەڭ اۋقىمىن كورسەتەدى. مەملەكەتتىك باسقارۋدىڭ سيفرلىق ترانسفورماسياسى، روبوتتاندىرۋ، كيبەرقاۋىپسىزدىك، قارۋلى كۇشتەردى سيفرلاندىرۋ، ءبىلىم بەرۋ جۇيەلەرى، قالالىق موبيلدىلىك جانە «اقىلدى قالا» تۇجىرىمدامالارى Digital Almaty فورۋمىندا ەكى كۇن بويى تالقىلاناتىن تاقىرىپتاردىڭ ءبىر بولىگى عانا ەكەنىن باسا ايتتى.
«ءبىز Digital Almaty فورۋمىنىڭ كوپتەگەن قاتىسۋشىلاردى جيناعانىن كورىپ وتىرمىز، بۇل وعان سيفرلىق يندۋستريا سالاسىنداعى ماماندار تاراپىنان ۇلكەن قىزىعۋشىلىقتى كورسەتەدى. فورۋم پروگرەسكە دەگەن سەنىممەن بىرىكتىرىلگەن پىكىرلەستەردى جينايتىن شىن مانىندە حالىقارالىق الاڭعا اينالعانىن ايتۋ ورىندى»، - دەدى مەگاپوليس باسشىسى.
ونىڭ ايتۋى بويىنشا، الماتى قازاقستاننىڭ ەڭ ءىرى مەگاپوليسى رەتىندە سيفرلىق ترانسفورماسيالار فارۆاتەرىندە سەنىمدى تۇردە العا جىلجۋدا. الماتىدا سيفرلاندىرۋدىڭ ەنۋ دەڭگەيى قازاقستانداعى ەڭ جوعارى كورسەتكىشتەردىڭ ءبىرى بولىپ تابىلادى: بۇگىندە ءبىزدىڭ قالامىزدا مەملەكەتتىك قىزمەتتەردىڭ 96%-ى سيفرلىق فورماتتا جۇرگىزىلەدى. بۇل كورسەتكىش ۇنەمى ءوسىپ كەلە جاتىر.
ايتا كەتۋ كەرەك، وتكەن جىلدىڭ شىلدەسىندە الماتى العاش رەت Thoughtlab (نيۋ-يورك) الەمدىك جەتەكشى زەرتتەۋ كومپانياسىنىڭ نۇسقاسى بويىنشا سيفرلىق دامۋ ستراتەگيالارىنىڭ ازىرلىگى دارەجەسى جونىندە ازيا قالالارىنىڭ العاشقى بەستىگىنە كىرسە، بىلتىر قىركۇيەك ايىندا الماتى Almaty Data Lakeء-بىرىڭعاي دەرەكتەر قويماسى جوباسىمەن IEEE Smart Cities Awards Contest حالىقارالىق «اقىلدى قالالار» بايقاۋىنىڭ ءفيناليسى اتانعان.
قالانى دامىتۋ باعدارلاماسىنداعى 7 نەگىزگى باسىمدىقتىڭ ءبىرى «الماتى – سمارت-سيتي» قۇرۋ بولىپ تابىلادى. وسى جىلدىڭ كۇزىنە قاراي سينگاپۋر جانە شانحاي سياقتى مەگاپوليستەرگە ۇقساس قالانىڭ «سيفرلىق ەگىزىن» قۇرۋدى باستاۋ جوسپارلانۋدا.
«الماتىنىڭ ودان ءارى دامۋى ءۇشىن ماڭىزدى جوبالار قالانى باسقارۋدى جاقسارتۋعا مۇمكىندىك بەرەتىن وزگە دە جۇيەلى پلاتفورمالىق شەشىمدەر بولىپ تابىلادى. بۇل قالانىڭ ءبىرىڭعاي دەرەكتەر قويماسى، گەواناليتيكانىڭ ءبىرىڭعاي پلاتفورماسى. ءبىرىڭعاي بەينەمونيتورينگ جۇيەسى بيىل الماتىنىڭ 80%-ىن قامتيدى. بۇل – ەڭ الدىمەن، جايلى قالالىق ورتا قۇرۋ جانە قالا تۇرعىندارى مەن قوناقتارىنىڭ قاۋىپسىزدىگىن قامتاماسىز ەتۋ. سىزدەرگە الداعى كۇندەرى پايدالى جانە ناتيجەلى پىكىرتالاستار، كەزدەسۋلەر تىلەيمىن جانە الماتىدا ۋاقىتتارىڭىزدى جاقسى وتكىزۋلەرىڭىزگە تىلەكتەسپىن!» - دەدى قالا باسشىسى ەربولات دوسايەۆ.
