15 مامىر كۇنى اقش پرەزيدەنتى دونالد ترامپ تاياۋ شىعىسقا ساپارى اياسىندا بىرىككەن اراب امىرلىكتەرىنە باردى. ترامپتىڭ ۇشاعى ابۋ-دابيگە قونىپ، ونى ءباا پرەزيدەنتى شەيح مۇحاممەد بەن زايد ءال ناحايان قارسى الدى. اقش پرەزيدەنتىن اۋەجايدا ءداستۇرلى "حاليدجي" بيىمەن قارسى العان قىزداردىڭ ونەرى جەلىدە قىزۋ تالقىلانىپ جاتىر. ولاردىڭ ۇزىن شاشتارىن شايقاپ بيلەۋى – كورگەن جاندى تاڭعالدىرماي قويمايدى. اqshamnews.kz ءتىلشىسى ەرەكشە ءبيدىڭ قايدان شىققانىن تارقاتادى.
"حاليدجي" - قانداي بي؟
"حاليدجي" ءسوزى اراب تىلىنەن اۋدارعاندا "شىعاناق" دەگەن ماعىنا بەرەدى. بۇل بي – اراب تۇبەگىندەگى پارسى شىعاناعى ەلدەرىنە ورتاق مادەني مۇرا. ناقتىراق ايتساق، ساۋد ارابياسى، كۋۆەيت، ءباا، باحرەين، ومان، كاتار سىندى ەلدەردىڭ ۇلتتىق داستۇرىنە ەنگەن بي ءتۇرى.
شاشپەن بيلەۋدىڭ ەرەكشەلىگى
بۇل ءبيدىڭ ەرەكشەلىگى – شاش قيمىلدارىنا نەگىزدەلۋى. ءبيشى قىزدار ۇزىن شاشتارىن تەربەپ، شايقاپ، ءار ءتۇرلى باعىتقا ءيىپ، وزىنە ءتان ورنەكپەن بيلەيدى. بۇل قيمىلدار نازىكتىك پەن ىشكى قۋاتتى بەينەلەيدى. شاش – ايەلدىڭ سۇلۋلىعى مەن ەركىندىگىنىڭ سيمۆولى رەتىندە قاراستىرىلادى.
سۋرەت: اشىق دەرەككوز
قاي كەزدە ورىندالادى؟
"حاليدجي" ءبيى تەك رەسمي كەزدەسۋلەردە عانا ەمەس، ۇيلەنۋ تويلارىندا، مەرەكەلەردە، قىز-كەلىنشەكتەردىڭ جينالىستارىندا دا ورىندالادى. بۇل – تەك بي ەمەس، اراب مادەنيەتىنىڭ نازىك كودى، داستۇرگە دەگەن قۇرمەتتىڭ كورىنىسى.
ترامپقا اسەرى قانداي بولدى؟
جەلى قولدانۋشىلارىنىڭ ايتۋىنشا، ترامپ بۇل ءداستۇرلى ءبيدى جىلى قابىلداعان. الەمدىك ساياسات ساحناسىنىڭ تۇلعاسى ءۇشىن بۇل ەرەكشە قارسى الۋ ءساتى ءارى شىعىس مادەنيەتىنىڭ ايقىن كورىنىسى بولدى.
ترامپ الداعى كۇندەرى ابۋ-دابيدەگى شەيح زايد مەشىتىنە بارادى جانە «قاسر ءال-ۆاتان» پرەزيدەنتتىك سارايىندا رەسمي قابىلداۋدا بولادى. 16 مامىر كۇنى دە امەريكا پرەزيدەنتىنىڭ قاتىسۋىمەن باا-دە ءبىرقاتار ءىس-شارالار وتەدى دەپ جوسپارلانىپ وتىر.