بىرىككەن اراب امىرلىكتەرىندە، باسقا دا يسلام ەلدەرى سەكىلدى كوپتەگەن تىيىمدار بار. ءبىرازى تۇسىنىكتى، ال كەيبىرەۋلەرى تۋريستەردى تاڭعالدىرماي قويماسى انىق. جەرگىلىكتى بيلىك قوناقتارعا بارىنشا جۇمساق قاراۋعا تىرىسادى، الايدا، سوعان قاراماستان، مىنا تىيىمداردى بىلە جۇرگەن ءجون. ويتكەنى ونىڭ سالدارى ءسىزدى تىعىرىققا تىرەۋى مۇمكىن. Tonkosti باسىلىمى باا-دەگى تىيىمداردى ءتىزىپ جازدى ، دەپ حابارلايدى اlmaty-akshamy.kz Tengritravel.kz-كە سىلتەمە جاساپ.
قوعامدىق كولىكتە تاماقتانۋعا جانە سۋسىن ىشۋگە بولمايدى
كوكنار تۇقىمى قوسىلعان ازىق-تۇلىك الىپ جۇرۋگە بولمايدى
باا-دە ەسىرتكىگە قارسى زاڭ قاتال. ءتىپتى سالىستىرمالى تۇردە زيانسىز كوكنار تۇقىمدارىنا تىيىم سالىنعان (ولار اپيىن جاساۋ ءۇشىن قولدانىلادى). سوندىقتان، ەگەر ءسىز كورشى اسحانادان سۇيىكتى كوكنار قوسىلعان توقاشتى سومكەڭىزگە سالۋدى ويلاساڭىز، بۇل يدەيادان باس تارتقان ءجون.
لاس كولىكپەن جۇرۋگە بولمايدى
جەرگىلىكتى زاڭ بويىنشا لاس كولىكتەر «قالانىڭ كوركىن بۇزىپ، قوعام دەنساۋلىعىنا زيان كەلتىرەدى». كولىك جۋۋدان جالتارساڭىز، 350 مىڭ تەڭگە ايىپپۇل ارقالاۋىڭىز مۇمكىن.
ادامداردى رۇقساتسىز سۋرەتكە تۇسىرۋگە بولمايدى
ءباا زاڭناماسى جەكە ومىرگە قول سۇعۋشىلىقتى قاتاڭ تۇردە باقىلايدى. ەگەر بىرەۋدى رۇقساتسىز سۋرەتكە تۇسىرسە وتە قاتال جازالانادى: قۇقىق بۇزۋشىلارعا قوماقتى ايىپپۇلدار، ءتىپتى تۇرمەگە قاماۋ جازاسى تاعايىندالادى، اسىرەسە سۋرەتتەر الەۋمەتتىك جەلىلەر سياقتى كوپشىلىككە جاريالانسا جاعداي ءتىپتى ۋشىعادى.
2015 جىلى باا-دە كۇيەۋىمەن بىرگە تۇرعان اۋستراليالىق سۋرەتشى مۇگەدەكتەرگە ارنالعان ورىنداردا تۇرعان كولىكتىڭ سۋرەتىن Facebook پاراقشاسىندا جاريالاعانى ءۇشىن 1،2 ميلليون تەڭگە ايىپپۇل تولەپ، ەلدەن شىعارىلعان.
قوعامدىق ورىنداردا بيلەۋگە بولمايدى
امىرلىكتەرگە دەمالۋعا كەلىپ، اۋەجايدا قۋانىشتان بيلەگىڭىز كەلسە، قوناقۇيگە جەتكەنگە دەيىن بارىنشا ءوزىڭىزدى ۇستاڭىز. جۇرت الدىندا بيلەۋ بۇل ەلدە ءتارتىپسىز قىلىق رەتىندە ەسەپتەلەدى. تەك بەلگىلەنگەن جەرلەردە، مىسالى، ءوزىڭىز توقتاعان ءۇي نەمەسە ليسەنزيالانعان تۇنگى كلۋبتاردا، بيلەۋگە رۇقسات.
جولدا كولىك اپاتىن سۋرەتكە تۇسىرۋگە بولمايدى
باا-دە ساياحاتتاۋ كەزىندە سۋرەتكە ءتۇسىرۋ كەزىندە جەتى رەت ولشەپ، ءبىر رەت كەسكەنىڭىز ءجون. مۇندا ادامداردىڭ رۇقساتىنسىز سۋرەتكە ءتۇسىرۋ تىيىمىنان بولەك، ۇكىمەتتىك عيماراتتاردى، اسكەري نىسانداردى، سوت جانە سارايلاردى سۋرەتكە تۇسىرۋگە بولمايدى. اسىرەسە، جولداعى اپاتتاردى جانە باسقا دا وقىس جاعدايلاردى فوتو/ۆيدەوعا تۇسىرۋگە تىيىم سالىنعان. بۇل ءۇشىن ءسىز 6 ميلليوننان 350 ميلليون تەڭگەگە دەيىن ايىپپۇل تولەۋىڭىز مۇمكىن.
جۇرت الدىندا ءوز سەزىمىڭدى بىلدىرۋگە بولمايدى
باا-دە قوعامدىق ورىنداردا قول ۇستاسىپ جۇرۋگە، سۇيىسۋگە جانە قۇشاقتاسۋعا بولمايدى (باسقا دا ينتيم دۇنيەلەرىن ايتپاسا دا بەلگىلى).
جەرگىلىكتى بيلىك ادەتتە تۋريستەردىڭ مۇنداي مىنەز-قۇلقىنا كوز جۇمادى، الايدا ولاردى جاۋاپكەرشىلىككە تارتقان جاعدايلار بار. مىسالى، 2010 جىلى ۇلىبريتانيادان كەلگەن ەرلى-زايىپتىلار قاماۋعا الىنىپ، ادەتتەگى ءسۇيىسۋ ءۇشىن ادەپسىز مىنەز-قۇلىق جاسادى دەپ ايىپتالدى. جىگىت پەن قىز ايىپتاۋعا قارسى بولىپ، وزدەرىنىڭ كىناسىز ەكەندەرىن دالەلدەمەك بولعان، ءبىراق ولار ءبىر اي تۇرمەدە وتىردى، سودان كەيىن جەر اۋدارىلدى.
بالاعات ءسوز ايتۋعا بولمايدى
امىرلىكتەر بالاعات سوزدەرگە قاتىستى وتە كونسەرۆاتيۆتى، تەك داۋىستاپ ايتىلعان بالاعات سوزدەر تۋرالى عانا ەمەس، سونىمەن قاتار جازباشا ءتىل تۋرالى، مىسالى، الەۋمەتتىك جەلىلەردە جانە ءتىپتى جەكە حات الماسۋداعى مەسسەندجەرلەردەگى سوزدەر ءۇشىن جاۋاپ بەرۋگە تۋرا كەلەدى.
ەگەر ءسىز اراب تىلىندە سويلەمەسەڭىز، قۋانۋعا اسىقپاڭىز: تىيىم-يشاراعا دا قاتىستى. مىسالى، 2017 جىلى ۇلىبريتانيادان كەلگەن IT-كەڭەسشى جولداعى وقيعا كەزىندە ادەپسىز قىلىق كورسەتكەنى ءۇشىن قامالىپ، 6 ايعا باس بوستاندىعىنان ايىرىلدى.
كولىكتى باياۋ جۇرگىزۋگە بولمايدى
سونىمەن قاتار، ءباا جولدارىندا جول بەلگىلەرىندە كورسەتىلگەن ەسكەرتۋلەردە قالاي تۇر، سول جىلدامدىقتى ساقتاعان دۇرىس، جىلدام نەمەسە باياۋ جۇرۋگە رۇقسات ەتىلمەيدى. كولىكتى باياۋ جۇرگىزگەنى ءۇشىن جۇرگىزۋشى 100 دوللار (43 مىڭ تەڭگە) ايىپپۇل ارقالايدى. بۇل تۋرالى Travel-بلوگەر اناستاسيا بەلوزەروۆا ايتتى.