تاراپتار وزەكتى ماسەلەلەردى تالقىلادى
قازاقستاننىڭ سىرتقى ىستەر ءمينيسترى مۇحتار تىلەۋبەردى ماسكەۋگە جاساعان ءىس-ساپارىندا رەسەيلىك ارىپتەسى سەرگەي لاۆروۆپەن كەزدەستى. تاراپتار رەسەي مەن ۋكراينا اراسىنداعى كەلىسسوزدەردى، ەكونوميكالىق سانكسيالار مەن بيولوگيالىق قاۋىپسىزدىك سياقتى ءبىرقاتار وزەكتى ماسەلەنى تالقىلادى، دەپ حابارلايدى Almaty-akshamy.kz 24.kz-كە سىلتەمە جاساپ.
مۇحتار تىلەۋبەردى جوسپاردا ءتورتىنشى دەڭگەيدەگى بيولوگيالىق زەرتحانا قۇرىلىسى بار ەكەنىن ايتىپ، ەلىمىزدىڭ حالىقارالىق ىنتىماقتاستىقتى دامىتۋعا نيەتتى ەكەنىن ءبىلدىردى.
مۇحتار تىلەۋبەردى، ق ر سىرتقى ىستەر ءمينيسترى:
- كۇن تارتىبىندەگى بيولوگيالىق قاۋىپسىزدىك – وزەكتى ماسەلەردىڭ ءبىرى. اسىرەسە كوروناۆيرۋس پاندەمياسىنان كەيىن بۇل ماسەلەنىڭ ماڭىزدىلىعى ارتا ءتۇستى. وسى ورايدا ءبىز رەسەيمەن بىرلەسە ارەكەت ەتىپ وتىرمىز. پرەزيدەنتىمىز قاسىم-جومارت توقايەۆتىڭ بۇۇ جۇيەسىندە بيولوگيالىق قاۋىپسىزدىك جونىندە حالىقارالىق اگەنتتىك قۇرىلۋى كەرەك دەگەن باستاماسىن رەسەيلىك ارىپتەستەردىڭ قولداۋ بىلدىرگەنىنە قۋانىشتىمىز. بۇگىن 4-دەڭگەيدەگى بيولوگيالىق زەرتحانانىڭ قۇرىلىسى بويىنشا جوسپارىمىزبەن بولىستىك. بۇل اشىق پروسەسس. ءبىز حالىقارالىق ىنتىماقتاستىققا دايىنبىز. بۇل سالادا ەلىمىزگە رەسەيلىك عالىمدار مەن زەرتحانا ماماندارى دا شاقىرىلادى، - دەدى.
ەكى ەلدىڭ مينيسترلەرى ايماقارالىق جانە شەكاراداعى سەرىكتەستىكتى نىعايتۋ، ەنەرگەتيكالىق-جانارماي، سونىمەن قاتار عارىش سالاسىنداعى تۇيتكىلدەرگە دە ەرەكشە توقتالدى. كەزدەسۋ مەملەكەتارالىق ديپلوماتيالىق قاتىناستىڭ 30 جىلدىعىنا وراي وتەتىن ءىس شارالار جوسپارىن ماقۇلداۋمەن اياقتالدى.
مۇحتار تىلەۋبەردى، ق ر سىرتقى ىستەر ءمينيسترى:
– ارينە قازىرگى جاعدايعا بايلانىستى مەملەكەتتەردىڭ اراسىندا حالىقارالىق ىنتىماقتاستىقتى ودان ءارى دامىتۋ جانە دە ايماقتىق حالىقارالىق ۇيىمداردا ءبىزدىڭ قارىم -قاتىناستاردى ودان ءارى نىعايتۋ ماسەلەلەرى تالقىلاندى.
سەرگەي لاۆروۆ، رف سىرتقى ىستەر ءمينيسترى:
– ءبىز وزىمىزگە جانە جۇڭگو حالىق رەسپۋبليكاسى سياقتى وزگە ەلدەردەگى سەرىكتەستەرگە سەنىم ارتۋىمىز كەرەك. بۇل تەندەنسياعا وڭتۇسىك شىعىس ازيا ەلدەرى دە تارتىلىپ جاتىر. ونىڭ ىشىندە ۇندىستانمەن ىنتىماقتاستىعىمىز قارقىندى دامىپ كەلەدى. كولىك ءدالىزىن قۇرۋ بويىنشا سەرىكتەستىك ورناۋدا. بۇل ءوز كەزەگىندە ەۋرازيالىق ەكونوميكالىق وداققا دا ءتيىمدى.