سالاۋاتتى ءومىر سالتىن دامىتۋعا باعىتتالعان شارا
زاماناۋي تەحنولوگيالار قاشىقتىق پەن جۇگىرۋ جىلدامدىعىن باقىلاپ قانا قويماي، ەلىمىزدىڭ كەز كەلگەن تۇرعىنىنا بۇقارالىق جارىسقا قاتىسۋعا جاعداي جاساپ وتىر، دەپ حابارلايدى Almaty-akshamy.kz
ونلاين ءۇردىستىڭ تيىمدىلىگىن مەدەت ساعىندىقوۆ تا قۇپتايدى. رەسپۋبليكالىق مارافونعا ينتەرنەت قوسىمشاسى ارقىلى تىركەلىپ، سپورتتاعى جەتىستىگىن بايقاپ كورمەكشى.
«اۋىرىپ قالعاننان كەيىن دەنساۋلىعىمدى دۇرىستايمىن دەپ اپتاسىنا 1-2 رەت جۇگىرۋگە شىققان بولاتىنمىن. سول ادەتكە اينالىپ كەتتى. سودان جۇيەلى تۇردە جۇگىرىپ، ءقازىر دەنساۋلىعىم جاقسى»، - دەيدى سپورتشى
مارافون باستالعالى مەدەت ساعىندىقوۆ 65 شاقىرىمدى باعىندىردى. ءتيىستى مەجەگە قازاننىڭ سوڭىنا دەيىن جەتۋدى كوزدەيدى. رەسپۋبليكالىق چەللەندج قورىتىندىسى شىققانشا تاعى 100 كيلومەتردى ەڭسەرۋ ويدا بار. وسى ۋاقىت ارالىعىندا اۋەسقوي سپورتشىنى قولداپ، بۇقارالىق جۇگىرۋگە قوسىلعان جاندار دا تابىلدى.
اۋەسقوي سپورتشىلاردىڭ ايتۋىنشا، جۇگىرۋ – سپورتتىڭ ەڭ ءتيىمدى ءتۇرى. سەبەبى ول ءۇشىن تەك ىڭعايلى اياق كيىم مەن نيەتتەن وزگە ەش نارسە قاجەت ەمەس.
اتالعان بايقاۋعا كەز كەلگەن قازاقستاندىقتىڭ قاتىسۋىنا بولادى. ول ءۇشىن جوباعا تىركەلىپ، ءموبيلدى قوسىمشانى كوشىرىپ الۋ كەرەك. 1 قازان مەن 30 قاراشا ارالىعىندا 100 شاقىرىمدى باعىندىرعاندار اقتىق سىنعا جولداما الادى. جۇلدە قورى – 1 500 000 تەڭگە.