قاسىم-جومارت توقايەۆ ازيا دامۋ بانكىنىڭ پرەزيدەنتى ماساسۋگۋ اساكاۆانى قابىلدادى
بەينەبايلانىس رەجيمىندە وتكەن كەزدەسۋ بارىسىندا قازاقستان مەن ازيا دامۋ بانكى اراسىنداعى ىنتىماقتاستىقتىڭ پەرسپەكتيۆالارى تالقىلاندى، دەپ حابارلايدى almaty-akshamy.kz
قاسىم-جومارت توقايەۆ ماساسۋگۋ اساكاۆانى قارجى ينستيتۋتىنىڭ باسشىسى لاۋازىمىنا سايلانۋىمەن قۇتتىقتاپ، ازيا دامۋ بانكىنىڭ قازاقستاننىڭ الەۋمەتتىك-ەكونوميكالىق دامۋىنا قوسقان ۇلەسىن جوعارى باعالادى.
– 27 جىل ىشىندەگى ىنتىماقتاستىق اياسىندا ازيا دامۋ بانكى قازاقستاننىڭ ەكونوميكاسىنا 6 ميلليارد دوللارعا جۋىق ينۆەستيسيا قۇيدى. بۇل قارجى ايتارلىقتاي قوماقتى جانە ىنتىماقتاستىعىمىزدىڭ تابىستى دامىعانىن ايعاقتايدى. اراداعى ىنتىماقتاستىقتى جوعارى باعالايمىز جانە ۇزاق مەرزىمدى ءارى ءوزارا ءتيىمدى بايلانىستاردى قولداۋعا نيەتتىمىز، – دەدى مەملەكەت باسشىسى.
سونداي-اق كەزدەسۋدە 2022-2026 جىلدارعا ارنالعان قازاقستان مەن ازيا دامۋ بانكى اراسىنداعى سەرىكتەستىكتىڭ جاڭا ستراتەگياسىن ازىرلەۋ ماسەلەسىنە ەرەكشە ءمان بەرىلدى.
– ازيا دامۋ بانكىنىڭ قازاقستانعا قاتىستى جاڭا ستراتەگياسىندا ءبىزدىڭ ۇلتتىق باسىمدىقتارىمىز بەن جوسپارلارىمىز، سونداي-اق مەملەكەتتىك باسقارۋدىڭ جاڭا ۇلگىسى، ەكونوميكانى ءارتاراپتاندىرۋ جانە جاسىل ەكونوميكالىق ءوسىم، تەڭگەرىمدى اۋماقتىق دامۋ، ساۋدا-ەكونوميكالىق ىنتىماقتاستىق، سيفرلاندىرۋ ماسەلەلەرى تولىق ەسكەرىلەتىنىنە سەنىمدىمىن، – دەدى قاسىم-جومارت توقايەۆ.
قازاقستان پرەزيدەنتى ازيا دامۋ بانكىنىڭ باسشىسىنا ەلىمىزدەگى ىشكى جالپى ءونىم دەڭگەيىنىڭ ارتقانى، ينفلياسياعا قارسى قابىلدانعان شارالار، كولىك-لوگيستيكا ينفراقۇرىلىمىن دامىتۋ، شاعىن جانە ورتا بيزنەسكە كورسەتىلىپ وتىرعان قولداۋ شارالارى تۋرالى ايتتى.
ءوز كەزەگىندە ماساسۋگۋ اساكاۆا قازاقستانداعى پاندەمياعا قارسى قابىلدانعان شارالارعا وڭ باعا بەردى.
– COVID-19 ىندەتىنە قارسى باعىتتالعان كۇش-جىگەرلەرىڭىز تۋرالى حاباردارمىن. ۇكىمەتتەرىڭىز بەلسەندى شارالاردى جۇزەگە اسىرىپ، ۆيرۋستىڭ ءورشۋىن تەجەۋ ءۇشىن ناقتى شەشىمدەر قابىلداپ وتىر. ەل ەكونوميكاسىنا جانە حالىقتىڭ ءال-اۋقاتىنا كەرى اسەر ەتكەن پاندەميانىڭ سالدارىن جەڭىلدەتۋ ماقساتىندا ىشكى جالپى ءونىمنىڭ 9،5 پايىز كولەمىندەگى داعدارىسقا قارسى شارالاردىڭ اۋقىمدى پاكەتىن قابىلداعانىڭىزدى قولدايمىز، – دەدى ازيا دامۋ بانكىنىڭ باسشىسى.