قازاقستان رەسپۋبليكاسىنىڭ ازەربايجانداعى ەلشىسى ءالىم بايەل ازەربايجاننىڭ دەنساۋلىق ساقتاۋ ءمينيسترى تەيمۋر مۋسايەۆپەن كەزدەستى.
قازاقستاندىق ديپلومات ەكىجاقتى قارىم-قاتىناستاردىڭ جوعارى دەڭگەيى مەن ديناميكاسىن اتاپ ءوتتى. ەلشى ەمدىك تۋريزم ماقساتىندا ازەربايجانعا كەلەتىن قازاقستاندىقتار سانىنىڭ جىل سايىن ارتىپ كەلە جاتقانىنا، ءوز كەزەگىندە ازەربايجان ازاماتتارىنىڭ قازاقستاننىڭ مەديسينالىق وقۋ ورىندارىندا تابىستى ءبىلىم الىپ جاتقانىنا نازار اۋداردى، دەپ حابارلايدى aqshamnews.kz.
ازەربايجاندىق مينيستر ەكى ەل اراسىندا دەنساۋلىق ساقتاۋ سالاسىنداعى قاتىناستاردى دامىتۋ ءۇشىن ۇلكەن الەۋەتتىڭ بار ەكەندىگىن اتاپ ءوتتى. ت. مۋسايەۆ ەلدەرىمىز دارى-دارمەكتەردى ءوندىرۋ بويىنشا بىرلەسىپ جۇمىس ىستەي الار ەدى دەگەن پىكىرىن ايتتى. سونىمەن قاتار، مينيستر مەديسينالىق مەكەمەلەردى اككرەديتاسيالاۋ جانە ساپاسىن باقىلاۋ سالاسىنداعى قازاقستاندىق تابىستى تاجىريبەنى زەردەلەۋگە جانە ازەربايجاندا ەنگىزۋگە قىزىعۋشىلىق ءبىلدىردى.
ەلشى ءا. بايەل قازاقستاندىق كومپانيالاردىڭ ازەربايجاندا، ونىڭ ىشىندە قاراباقتا مەديسينالىق نىسانداردىڭ قۇرىلىسىنا اتسالىسۋعا دايىن ەكەنىن مالىمدەدى. مينيستر ت. مۇسايەۆ بۇل باستامانى وڭ قابىلداپ، وسى باعىتتا ىنتىماقتاستىق جاساۋعا دايىن ەكەندىكتەرىن جەتكىزدى.
كەزدەسۋ بارىسىندا ت. مۇسايەۆ ازەربايجاننىڭ قازاقستان پرەزيدەنتى قاسىم-جومارت توقايەۆ ۇسىنعان العاشقى مەديسينالىق-سانيتارلىق كومەك جونىندەگى ەلدەر كواليسياسىن قۇرۋ تۋرالى باستامانى قولدايتىنىن اتاپ ءوتتى. مەديسينا سالاسىن حالىقارىلىق دەڭگەيدە دامىتۋعا باعىتتالعان بۇل باستامانى مەملەكەت باسشىسى 2023 جىلعى 23 قازاندا وتكەن الماتى دەكلاراسياسىنىڭ 45 جىلدىعىنا جانە استانا دەكلاراسياسىنىڭ 5 جىلدىعىنا ارنالعان جاھاندىق كونفەرەنسيا بارىسىندا ۇسىنعان بولاتىن.