سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ ەۋروپا مەن ورتالىق ازياداعى سۋ رەسۋرستارىن باسقارۋدىڭ جاھاندىق پراكتيكاسى جەتەكشىسى ۋينستون يۋ باستاعان دۇنيەجۇزىلىك بانك وكىلدەرىمەن كەزدەستى.
ەسكە سالا كەتەيىك، وسىعان دەيىن مەملەكەت باسشىسى ەلىمىزگە ينۆەستورلاردى تارتۋ بويىنشا بەلسەندى جۇمىس جۇرگىزۋدى تاپسىرعان بولاتىن.
دۇنيەجۇزىلىك بانك وكىلدەرى ارال تەڭىزىن قالپىنا كەلتىرۋدىڭ قازاقستان ءۇشىن عانا ەمەس، بۇكىل ورتالىق ازيا ءۇشىن دە ماڭىزى جوعارى ەكەنىن جانە جوبانىڭ ءبىرىنشى كەزەڭى ءساتتى جۇزەگە اسقانىن اتاپ ءوتتى. ايتۋىنشا، الەمدىك قاۋىمداستىق تەڭىزدىڭ تاعدىرىنا الاڭداۋشىلىق تانىتۋدا، دەپ حابارلايدى aqshamnews.kz سۋ رەسۋرستارى جانە يرريگاسيا مينيسترلىگىنە سىلتەمە جاساپ.
سونداي-اق، دۇنيەجۇزىلىك بانك وكىلدەرى قازاقستانعا وڭىرلىك باعدارلامانى ازىرلەۋگە قاتىسۋدى ۇسىندى، ونىڭ شەڭبەرىندە ورتالىق ازيانىڭ بارلىق مەملەكەتتەرىندە ۇقساس جوبالار ىسكە اسىرىلاتىن بولادى. مۇنداي جوبا اياسىندا يرريگاسيا جانە درەناج جۇيەلەرىن جاڭعىرتۋ بويىنشا بىرلەسكەن جۇمىستى جالعاستىرۋعا بولاتىنىن اتاپ ءوتتى.
نۇرجان نۇرجىگىتوۆ ءوز كەزەگىندە دۇنيەجۇزىلىك بانك وكىلدەرىنە ترانسشەكارالىق وزەندەردەگى سۋ رەسۋرستارىن ەسەپكە الۋ مەن مونيتورينگ جۇمىسىن اۆتوماتتاندىرۋ بويىنشا جۇمىسقا قوسىلۋدى ۇسىندى.
«ءبىز دۇنيەجۇزىلىك بانكپەن جانە باسقا دا حالىقارالىق قارجى ينستيتۋتتارىمەن ۇزاق جانە تابىستى جۇمىس ىستەپ كەلەمىز. ارال تەڭىزىن ساقتاۋ سەكىلدى شىن مانىندە اۋقىمدى جوبالاردى ىسكە اسىرۋعا شەتەلدىك ارىپتەستەرىمىزدى بەلسەندى تارتامىز، سونداي-اق كورشى ەلدەرمەن دە ءوزارا ءىس-قيمىل جاسايمىز. دۇنيەجۇزىلىك بانكپەن جوبانىڭ ەكىنشى كەزەڭىندەگى بىرلەسكەن جۇمىسىمىز العاشقى كەزەڭ ناتيجەسىنە ساي تابىستى بولادى دەپ سەنەمىن»،- دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.