ازاپتاۋ تۋرالى ىستەر باقىلاۋعا الىندى.
بۇگىنگى پالاتا وتىرىسىندا ازاپتاۋ تۋرالى زاڭ جوباسىن قاراۋ بارىسىندا ىشكى ىستەر مينيسترلىگىنىڭ باسشىسىنا قىلمىستىق-اتقارۋ مەكەمەلەرى مەن پوليسيانىڭ قىزمەتتىك عيماراتتارىنا مىندەتتى تۇردە بەينەباقىلاۋ ورناتۋ تۋرالى ەرەجەنى زاڭنامالىق دەڭگەيدە بەكىتۋ ۇسىنىلدى، دەپ حابارلايدى Almaty-akshamy.kz Egemen.kz-كە سىلتەمە جاساپ.
سەنات سپيكەرى قۇقىق قورعاۋ ورگاندارىنىڭ عيماراتتارى بەينەباقىلاۋدا بولاتىنى جانە بارلىق ىس-ارەكەتتەر تىركەلەتىنى تۋرالى جاقىندا قابىلدانعان ەرەجە ماڭىزدى جانە ۋاقتىلى بولعانىن اتاپ ءوتتى. بۇل ءتاسىل بەلگىلى ءبىر ادامدارعا زاڭسىز ارەكەتتەردىڭ قولدانىلعانىن دالەلدەۋگە سەپتىگىن تيگىزەدى.
وسىعان بايلانىستى ماۋلەن اشىمبايەۆ قۇقىق قورعاۋ ورگاندارىنىڭ بارلىق عيماراتتارىندا بەينەجازبا بولۋى تۋرالى ناقتى تالاپتى زاڭناماعا جازۋدىڭ قاجەتتىگى تۋرالى ءسوز قوزعادى.
«ءبىز قىلمىستىق كودەكسكە ازاپتاعانى ءۇشىن جازانى كۇشەيتەتىن ەرەجەلەردى ەنگىزدىك، بۇل وتە دۇرىس. قۇقىق قورعاۋ ورگاندارىنىڭ ارەكەتتەرىنە، كەيبىر قىزمەتكەرلەردىڭ زورلىق-زومبىلىعىنا قاتىستى كوپتەگەن شاعىم تۇسەتىنىن ايتا كەتۋ كەرەك. سەناتقا دا ونداي شاعىمدار كەلىپ جاتىر. ءبىراق تاجىريبە كورسەتىپ وتىرعانداي، مۇنداي ىستەردىڭ باسىم كوپشىلىگى سوتقا دەيىن جەتپەيدى، ويتكەنى زورلىق-زومبىلىق، ازاپتاۋ جانە ت.ب. بولعان فاكتىلەردى دالەلدەۋ، انىقتاۋ وتە قيىن. وسىعان بايلانىستى، ءبىز جاقىندا عانا پروكۋراتۋرامەن بىرلەسىپ قۇقىق قورعاۋ ورگاندارىنىڭ بارلىق قىزمەتتىك عيماراتتارىنا بەينەباقىلاۋ ورناتۋدى تالاپ ەتەتىن ەرەجە قابىلداعانىڭىزدى بىلەمىز»، - دەپ اتاپ ءوتتى ماۋلەن اشىمبايەۆ.
وسىعان دەيىن مەملەكەت باسشىسى قاسىم-جومارت توقايەۆ قۇقىق قورعاۋ ورگاندارىندا بەينەباقىلاۋدا كورىنبەيتىن جەرلەر بولماۋى ءتيىس ەكەنىن ايتقان ەدى.